ದೇಶ-ವಿದೇಶಿ ಪ್ರವಾಸಿಗರ ಆಕರ್ಷಣೆ: ಮಂಗಳೂರಿನಲ್ಲಿ ‘ಮ್ಯಾಂಗಳೂರ್ ಐ’ ಯೋಜನೆಗೆ ಸಿದ್ಧತೆ
ಮಂಗಳೂರು: ದೇಶ-ವಿದೇಶದ ಪ್ರವಾಸಿಗರನ್ನು ಮಂಗಳೂರಿಗೆ ಆಕರ್ಷಿಸುವ ಸಲುವಾಗಿ ‘ಮ್ಯಾಂಗಳೂರ್ ಐ’ ಯೋಜನೆಯೊಂದರ ನಿರ್ಮಾಣಕ್ಕೆ ಸಿದ್ಧತೆ ನಡೆದಿದೆ. ಈಗಾಗಲೆ ರಾಜ್ಯ ವಿಧಾನಸಭೆಯ ಸ್ಪೀಕರ್ ಯು.ಟಿ.ಖಾದರ್ ಮತ್ತು ದ.ಕ.ಜಿಲ್ಲಾ ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಬೆಂಗಳೂರಿನಲ್ಲಿ ಹಿರಿಯ ಅಧಿಕಾರಿಗಳ ಜೊತೆ ಚರ್ಚೆ ನಡೆಸಿದ್ದಾರೆ. ಹಾಗಾಗಿ ಈ ಯೋಜನೆ ಕಾರ್ಯಗತಗೊಂಡರೆ ಮಂಗಳೂರಿನ ಆಕರ್ಷಣೆ ಹೆಚ್ಚಲಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.
ದುಬೈಯ ದುಬೈ ಫ್ರೇಮ್, ಪ್ಯಾರಿಸ್ನ ಐಫೆಲ್ ಟವರ್ ಮಾದರಿಯಲ್ಲೇ ಮಂಗಳೂರಿನಲ್ಲೂ ‘ಮ್ಯಾಂಗಳೂರ್ ಐ’ ನಿರ್ಮಿಸಬೇಕು ಎಂಬ ಕನಸು ನನಸಾಗಲು ಯೋಜನೆ ರೂಪಿಸಲಾಗುತ್ತಿದೆ.
ವರ್ಷಂಪ್ರತಿ ಮಂಗಳೂರು ನಗರ ಸಹಿತ ಜಿಲ್ಲೆಗೆ ಲಕ್ಷಾಂತರ ಪ್ರವಾಸಿಗರು ದೇಶ- ವಿದೇಶದಿಂದ ಆಗಮಿಸುತ್ತಿರುವುದು ಗಮನಾರ್ಹ. ಇದಕ್ಕೆ ದ.ಕ. ಜಿಲ್ಲೆಯ ಕರಾವಳಿ ತೀರವು ಬೀಚ್, ಗ್ರಾಮಾಂತರ ಭಾಗವು ಪಶ್ಚಿಮ ಘಟ್ಟದ ಪ್ರಾಕೃತಿಕ ಸೊಬಗಿನೊಂದಿಗೆ ಧಾರ್ಮಿಕ, ಸಾಂಸ್ಕೃತಿಕ, ಜಾನಪದ ವೈವಿಧ್ಯತೆಯ ಪ್ರವಾಸಿ ತಾಣವಾಗಿ ಗುರುತಿಸಲ್ಪಟ್ಟಿರುವುದೇ ಕಾರಣವಾಗಿದೆ.
ಆದರೆ ಹೀಗೆ ಬಂದು ಹೋಗುವ ಪ್ರವಾಸಿಗರನ್ನು ಕೆಲವು ದಿನದ ಮಟ್ಟಿಗಾದರೂ ಮಂಗಳೂರಿನಲ್ಲೇ ತಂಗುವಂತೆ ಮಾಡುವ ಪ್ರಮುಖ ಪ್ರವಾಸಿ ತಾಣಗಳ ಕೊರತೆ ಇದೆ. ಇದಕ್ಕೆ ಪೂರಕವಾಗಿ ‘ಮ್ಯಾಂಗಳೂರು ಐ’ ಎಂಬ ಹೆಸರಿನ ಹೊಸ ಯೋಜನೆಗೆ ಸಿದ್ಧತೆ ನಡೆಸಲಾಗುತ್ತಿದೆ.
ನಗರದ ಕದ್ರಿ ಸಮೀಪದ ಕೆಪಿಟಿ ಬಳಿಯಿರುವ ಸ್ಕೇಟಿಂಗ್ ಗ್ರೌಂಡ್ ಬಳಿ ರಾಜ್ಯ ಪ್ರವಾಸೋದ್ಯಮ ಇಲಾಖೆಯಿಂದ ‘ಮ್ಯಾಂಗಳೂರ್ ಐ’ ಯೋಜನೆ ರೂಪಿಸಲು ಉದ್ದೇಶಿಸಲಾಗಿದೆ. ಮಂಗಳೂರು ವಿಮಾನ ನಿಲ್ದಾಣ, ರೈಲ್ವೆ ನಿಲ್ದಾಣ, ಬೀಚ್ ಹಾಗೂ ರಾಷ್ಟ್ರೀಯ ಹೆದ್ದಾರಿ ಸಂಪರ್ಕಿಸುವ ಸ್ಥಳ ಇದಾಗಿದ್ದು, ಈ ಬಗ್ಗೆ ಡಿಪಿಆರ್ ತಯಾರಿಸಿ ಸರಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಲು ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ಗೆ ಸ್ಪೀಕರ್ ಯು.ಟಿ.ಖಾದರ್ ನಿರ್ದೇಶನ ನೀಡಿದ್ದಾರೆ.
ದ.ಕ.ಜಿಲ್ಲೆಯು ಪ್ರವಾಸಿ ಕೇಂದ್ರವಾಗಿದೆ. ಇಲ್ಲಿಗೆ ದಿನನಿತ್ಯ ಸಾವಿರಾರು ಪ್ರವಾಸಿಗರು ಭೇಟಿ ನೀಡುತ್ತಾರೆ. ಹೀಗೆ ಬರುವವರು ಒಂದೆರೆಡು ದಿನದ ವೀಕ್ಷಣೆ ಮಾಡಿ ಬೇರೆ ಬೇರೆ ಕಡೆ ತೆರಳುತ್ತಾರೆ. ದೇಶ-ವಿದೇಶದ ಪ್ರವಾಸಿಗರನ್ನು ಕೆಲವು ದಿನದ ಮಟ್ಟಿಗೆ ಮಂಗಳೂರಿನಲ್ಲೇ ವಾಸ್ತವ್ಯ ಹೂಡುವಂತೆ ಮಾಡುವುದು ‘ಮ್ಯಾಂಗಳೂರು ಐ’ ಯೊಜನೆಯ ಉದ್ದೇಶವಾಗಿದೆ. ಜಿಲ್ಲೆಯ ಇತರ ಪ್ರವಾಸಿ ತಾಣಗಳನ್ನು ಅಭಿವೃದ್ಧಿಪಡಿಸಲು ಇದು ಪೂರಕವಾಗಿದೆ.
- ಯು.ಟಿ.ಖಾದರ್, ಸ್ಪೀಕರ್, ರಾಜ್ಯ ವಿಧಾನಸಭೆ
ಮ್ಯಾಂಗಳೂರು ಐ ಯೋಜನೆಗೆ ಸಂಬಂಧಿ ಸಿದಂತೆ ಉನ್ನತ ಮಟ್ಟದ ಅಧಿಕಾರಿಗಳ ಜತೆ ಬೆಂಗಳೂರಿನಲ್ಲಿ ಮಾತುಕತೆ ನಡೆಸಲಾಗಿದೆ. ಅಅಲ್ಲದೆ ಡಿಪಿಆರ್ ತಯಾರಿಸುವಂತೆ ನಿರ್ದೇಶನವೂ ಬಂದಿದ್ದು, ಅದರಂತೆ ಸಿದ್ಧತೆ ನಡೆಸಲಾಗುತ್ತಿದೆ.
-ಮುಲ್ಲೈ ಮುಗಿಲನ್, ದ.ಕ.ಜಿಲ್ಲಾಧಿಕಾರಿ
‘ಮ್ಯಾಂಗಳೂರು ಐ’ನಲ್ಲಿ ಏನಿರಲಿದೆ?
►ನಗರ ವೀಕ್ಷಣೆ, ಕಡಲಿನ ಸೌಂದರ್ಯ ವೀಕ್ಷಣೆಗೆ ‘ವ್ಯೆ ಪಾಯಿಂಟ್’ ರಚನೆ
►ಲೈಟ್ಹೌಸ್ ಮಾದರಿಯ ಅತೀ ಎತ್ತರದ ಕಟ್ಟಡ
►ಸ್ವಿಮ್ಮಿಂಗ್ ಪೂಲ್ನೊಂದಿಗೆ ಐಷಾರಾಮಿ ರೆಸ್ಟೋರೆಂಟ್
►ಶಾಪಿಂಗ್ ಸೆಂಟರ್, ಇನ್ಡೋರ್ ಗೇಮ್ಸ್
►ಮಕ್ಕಳ ಆಟಕ್ಕಾಗಿ ಅಮ್ಯೂಸ್ಮೆಂಟ್ ಪಾರ್ಕ್
►ತಳಮಹಡಿಯಲ್ಲಿ ಕನ್ವೆನ್ಶನ್ ಸೆಂಟರ್