ಅಹಮದಾಬಾದ್ ಗೆ ಬಂದಿಳಿದ ಅಮೆರಿಕದಿಂದ ಗಡೀಪಾರಿಗೊಳಗಾದ 33 ಗುಜರಾತಿಗಳು

ಅಹಮದಾಬಾದ್: ಅಮೆರಿಕ ಗಡೀಪಾರು ಮಾಡಿರುವ 104 ಭಾರತೀಯ ಅಕ್ರಮ ವಲಸಿಗರ ಪೈಕಿ 33 ಗುಜರಾತಿ ವಲಸಿಗರನ್ನು ಹೊತ್ತ ವಿಮಾನವೊಂದು ಗುರುವಾರ ಬೆಳಗ್ಗೆ ಅಮೃತಸರದಿಂದ ಅಹಮದಾಬಾದ್ ಗೆ ಬಂದಿಳಿಯಿತು ಎಂದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಕೆಲವು ಮಕ್ಕಳು ಹಾಗೂ ಮಹಿಳೆಯರು ಸೇರಿದಂತೆ 33 ವಲಸಿಗರು ಬಂದಿಳಿಯುತ್ತಿದ್ದಂತೆಯೆ, ಅವರನ್ನೆಲ್ಲ ಪೊಲೀಸರ ವಾಹನಗಳಲ್ಲಿ ಗುಜರಾತ್ ನ ಅವರ ಸ್ವಗ್ರಾಮಗಳಿಗೆ ಕಳಿಸಿಕೊಡಲಾಯಿತು ಎಂದು ಜಿ ವಲಯದ ಸಹಾಯಕ ಪೊಲೀಸ್ ಆಯುಕ್ತ ಆರ್.ಡಿ. ಓಝಾ ಹೇಳಿದ್ದಾರೆ.

ಈ ಕುರಿತು ವಿಮಾನ ನಿಲ್ದಾಣದ ಬಳಿ ಸುದ್ದಿಗಾರರೊಂದಿಗೆ ಮಾತನಾಡಿದ ಓಝಾ, “ಇಂದು ಬೆಳಗ್ಗೆ ಅಮೃತಸರದಿಂದ ಮಕ್ಕಳು ಹಾಗೂ ಮಹಿಳೆಯರು ಸೇರಿದಂತೆ 33 ವಲಸಿಗರನ್ನು ಹೊತ್ತ ವಿಮಾನವು ಅಹಮದಾಬಾದ್ ಗೆ ಬಂದಿಳಿಯಿತು. ಅವರೆಲ್ಲ ಅಮೆರಿಕದಿಂದ ಗಡೀಪಾರಿಗೊಳಗಾದ ವಲಸಿಗರಾಗಿದ್ದಾರೆ. ಅವರನ್ನೆಲ್ಲ ಅವರವರ ಸ್ವಗ್ರಾಮಗಳಿಗೆ ಕಳಿಸಿಕೊಡಲು ವಿಮಾನ ನಿಲ್ದಾಣದ ಬಳಿ ಪೊಲೀಸ್ ವಾಹನಗಳನ್ನು ನಿಯೋಜಿಸಿದ್ದೆವು” ಎಂದು ತಿಳಿಸಿದ್ದಾರೆ.

ಮಾಧ್ಯಮ ಮಂದಿ ಗಡೀಪಾರಿಗೊಳಗಾಗಿರುವ ವಲಸಿಗರೊಂದಿಗೆ ಮಾತನಾಡಲು ಯತ್ನಿಸಿದಾಗ, ಅವರೊಂದಿಗೆ ಮಾತನಾಡಲು ನಿರಾಕರಿಸಿದ ವಲಸಿಗರು, ಪೊಲೀಸ್ ವಾಹನಗಳಲ್ಲಿ ತಮ್ಮ ತಮ್ಮ ಸ್ವಗ್ರಾಮಗಳಿಗೆ ತೆರಳಿದರು ಎಂದು ವರದಿಯಾಗಿದೆ.

ಗಡೀಪಾರಿಗೊಳಗಾಗಿರುವ ಬಹುತೇಕರು ಮೆಹ್ಸಾನಾ, ಗಾಂಧಿನಗರ, ಪಟನ್, ವಡೋದರ ಹಾಗೂ ಖೇಡಾ ಜಿಲ್ಲೆಗಳಿಗೆ ಸೇರಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಗುಜರಾತ್ ನ 33 ಅಕ್ರಮ ಭಾರತೀಯ ವಲಸಿಗರು ಸೇರಿದಂತೆ ಒಟ್ಟು 104 ಅಕ್ರಮ ಭಾರತೀಯ ವಲಸಿಗರನ್ನು ಹೊತ್ತ ಅಮೆರಿಕ ಸೇನಾ ವಿಮಾನವು ಬುಧವಾರ ಪಂಜಾಬ್ ನ ಅಮೃತಸರಕ್ಕೆ ಬಂದಿಳಿಯಿತು.

ನಮ್ಮ ಮಕ್ಕಳು ಹೇಗೆ ಅಮೆರಿಕಕ್ಕೆ ತೆರಳಿದರು ಎಂಬುದು ನಮಗೆ ತಿಳಿದಿಲ್ಲ ಎಂದು ಗುಜರಾತ್ ನ ಅಕ್ರಮ ವಲಸಿಗರ ಕುಟುಂಬದ ಸದಸ್ಯರು ಅಳಲು ತೋಡಿಕೊಂಡಿದ್ದಾರೆ.