ಉದ್ಯೋಗ ಹೆಚ್ಚಿಸದೇ ಇದ್ದರೆ ಭಾರತ 2047ರ ಒಳಗೆ ಅಭಿವೃದ್ಧಿ ಹೊಂದಿದ ಆರ್ಥಿಕತೆಯಾಗಲು ಅಸಾಧ್ಯ: ವಿಶ್ವ ಬ್ಯಾಂಕ್
ಹೊಸದಿಲ್ಲಿ : ಉದ್ಯೋಗವನ್ನು ಹೆಚ್ಚಿಸಲು ಸುಧಾರಣೆಯನ್ನು ಪರಿಚಯಿಸದೇ ಇದ್ದರೆ, 2047ರ ವೇಳೆಗೆ ಅಭಿವೃದ್ಧಿ ಹೊಂದಿದ ಆರ್ಥಿಕತೆಯಾಗುವ ತನ್ನ ಗುರಿಯನ್ನು ಸಾಧಿಸಲು ಭಾರತಕ್ಕೆ ಸಾಧ್ಯವಾಗಲಾರದು ಎಂದು ವಿಶ್ವ ಬ್ಯಾಂಕ್ ನ ಹಿರಿಯ ಅಧಿಕಾರಿ ಹೇಳಿದ್ದಾರೆ.
2047ರ ವೇಳೆಗೆ ಭಾರತ ಅಭಿವೃದ್ಧಿ ಹೊಂದಿದ ಆರ್ಥಿಕತೆಯಾಗುವ ಗುರಿಯನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಹಲವು ಬಾರಿ ಒತ್ತಿ ಹೇಳಿದ್ದಾರೆ. ದೇಶ ಸ್ವಾತಂತ್ರ್ಯದ 100 ವರ್ಷ ಪೂರ್ಣಗೊಳಿಸುವ 2047 ಅಕ್ಟೋಬರ್ನಲ್ಲಿ ಭಾರತವನ್ನು ಅಭಿವೃದ್ಧಿ ಹೊಂದಿದ ದೇಶವನ್ನಾಗಿ ಮಾಡಬೇಕು ಅವರು ನಾಗರಿಕರನ್ನು ಆಗ್ರಹಿಸಿದ್ದಾರೆ.
ಆದರೆ, 2047ರ ಗುರಿಯನ್ನು ಸಾಧಿಸುವುದು ಉದ್ಯೋಗದಲ್ಲಿ ಸುಧಾರಣೆಯಾಗದೇ ಇದ್ದರೆ ಕನಸಾಗಿಯೇ ಉಳಿಯಲಿದೆ ಎಂದು ವಿಶ್ವ ಬ್ಯಾಂಕ್ ನ ದಕ್ಷಿಣ ಏಷ್ಯಾದ ಮುಖ್ಯ ಆರ್ಥಿಕ ತಜ್ಞ ಫ್ರಾನ್ಜಿಸ್ಕಾ ಒಹ್ನ್ಸೊರ್ಜೆ ಅವರು ಹೇಳಿದ್ದಾರೆ.
ನೂತನ ‘‘ಜಾಬ್ಸ್ ಫಾರ್ ರಿಸೈಲಿಯನ್ಸ್’’ ವರದಿಯಲ್ಲಿ ವಿಶ್ವ ಬ್ಯಾಂಕ್ ಮಂಗಳವಾರ, 2010ರಲ್ಲಿ ಉದಯೋನ್ಮುಖ ಮಾರುಕಟ್ಟೆಗಳು ಹಾಗೂ ಅಭಿವೃದ್ದಿ ಹೊಂದುತ್ತಿರುವ ಆರ್ಥಿಕತೆಗೆ ಹೋಲಿಸಿದರೆ ಭಾರತದ ಉದ್ಯೋಗದ ಬೆಳವಣಿಗೆ ದುರ್ಬಲವಾಗಿದೆ ಎಂದಿದೆ.
2000 ಹಾಗೂ 2022ರ ನಡುವೆ ಭಾರತದಲ್ಲಿ ಉದ್ಯೋಗದ ಅನುಪಾತ ನೇಪಾಳವನ್ನು ಹೊರತು ಪಡಿಸಿ ದಕ್ಷಿಣ ಏಷ್ಯಾದ ಇತರ ದೇಶಗಳಗಿಂತ ಅತಿ ಕಡಿಮೆಯಾಗಿದೆ ಎಂದು ವರದಿ ಹೇಳಿದೆ.