ಪಾಕಿಸ್ತಾನ | ಇನ್ನೂ ಎರಡು ಪೋಲಿಯೊ ಪ್ರಕರಣ ವರದಿ

ಇಸ್ಲಮಾಬಾದ್ : ಪಾಕಿಸ್ತಾನದಲ್ಲಿ ಮತ್ತೆ ಎರಡು ಪೋಲಿಯೊ ಪ್ರಕರಣ ವರದಿಯಾಗಿದ್ದು ಇದರೊಂದಿಗೆ ಒಟ್ಟು ಸಂಖ್ಯೆ 52ಕ್ಕೆ ಏರಿಕೆಯಾಗಿರುವುದಾಗಿ ವರದಿಯಾಗಿದೆ.

ಖೈಬರ್ ಪಖ್ತೂಂಕ್ವಾ ಪ್ರಾಂತದ ಡೆರಾ ಇಸ್ಮಾಯಿಲ್ ಖಾನ್ ಜಿಲ್ಲೆಯಲ್ಲಿ ಓರ್ವ ಬಾಲಕಿ ಹಾಗೂ ಬಾಲಕನಲ್ಲಿ `ವೈಲ್ಡ್ ಪೋಲಿಯೊ ವೈರಸ್ ಟೈಪ್ 1(ಡಬ್ಲ್ಯೂಪಿವಿ1) ಪ್ರಕರಣ ಪತ್ತೆಯಾಗಿದೆ. ಮಕ್ಕಳಿಂದ ಸಂಗ್ರಹಿಸಲಾದ ಮಾದರಿಗಳ ಅನುವಂಶಿಕ ಅನುಕ್ರಮವನ್ನು ನಡೆಸಲಾಗುತ್ತಿದೆ ಎಂದು ರಾಷ್ಟ್ರೀಯ ಆರೋಗ್ಯ ಸಂಸ್ಥೆಯ ಪೋಲಿಯೊ ನಿರ್ಮೂಲನೆಗೆ ಸಂಬಂಧಿಸಿದ ಪ್ರಾಂತೀಯ ಪ್ರಯೋಗಾಲಯದ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಪಾಕಿಸ್ತಾನದಲ್ಲಿ ಈ ವರ್ಷ ಇದುವರೆಗೆ ಪತ್ತೆಯಾಗಿರವ 52 ಪೋಲಿಯೊ ಪ್ರಕರಣಗಳಲ್ಲಿ 24 ಬಲೂಚಿಸ್ತಾನದಲ್ಲಿ ವರದಿಯಾಗಿದ್ದು ಬಲೂಚಿಸ್ತಾನದ ಡೆರಾ ಇಸ್ಮಾಯಿಲ್ ಖಾನ್ ಜಿಲ್ಲೆಯಲ್ಲೇ 7 ಪ್ರಕರಣ ಬೆಳಕಿಗೆ ಬಂದಿದೆ. ಸಿಂಧ್ ಪ್ರಾಂತದಲ್ಲಿ 13, ಖೈಬರ್ ಪಖ್ತೂಂಕ್ವಾದಲ್ಲಿ 13, ಪಂಜಾಬ್ ಮತ್ತು ಇಸ್ಲಮಾಬಾದ್‍ನಲ್ಲಿ ತಲಾ 1 ಪ್ರಕರಣ ವರದಿಯಾಗಿದೆ.