ಹಗ್ಗಿನ ಹನಿ

 ಕಾಯಕದ ನಗರವೆಂದೇ ಖ್ಯಾತಿಯನ್ನು ಪಡೆದಿರುವ ಮುಂಬೈಯಲ್ಲಿ, ಕನ್ನಡ ರೂಪುಗೊಂಡಿದ್ದು ಬದುಕಿನ ಅನಿವಾರ್ಯತೆಯ ಜೊತೆಗೆ. ಒಳನಾಡಿನ ಆರ್ಥಿಕ ಏರು ಪೇರುಗಳು, ಕರಾವಳಿಯ ಬೇರೆ ಬೇರೆ ಸಮುದಾಯಗಳು ಬದುಕು ಅರಸುತ್ತಾ ಮುಂಬೈಯ ಕಡೆಗೆ ನಡೆದವು. ಅಲ್ಲಿ ಅವರು ತುಳು ಮತ್ತು ಕನ್ನಡ ಎರಡು ಅಸ್ಮಿತೆಗಳ ಮೂಲಕ ತಮ್ಮನ್ನು ಜಾಹೀರು ಪಡಿಸಿದರು. ಮುಂಬೈಯಲ್ಲಿ ಕನ್ನಡ ಭಾಷೆ, ಸಂಸ್ಕೃತಿ ಉಳಿದು ಬೆಳೆದದ್ದು ತುಳುವ ತೊಟ್ಟಿಲಿನಲ್ಲಿ. ವೃತ್ತಿಯಿಂದ ಹೊಟೇಲ್ ಉದ್ಯಮಿಯಾಗಿರುವ ಬಾಬು ಶಿವ ಪೂಜಾರಿಯವರೂ ಈ ಹಿನ್ನೆಲೆಯಿಂದಲೇ ಬಂದವರು. ಉದ್ಯಮಿಯಾಗಿದ್ದರೂ, ಅವರ ಓದಿನ ಬೀಸು ದೊಡ್ಡದು. ವೇದದಿಂದ ಹಿಡಿದು ಆಧುನಿಕ ಸಾಹಿತ್ಯದವರೆಗೂ ಆಸಕ್ತಿ ಬೆಳೆಸಿಕೊಂಡ ಇವರು ಒಂದೇ ಧರ್ಮ, ಒಂದೇ ದೇವರು, ಒಂದೇ ಜಾತಿ ಎಂಬ ನಾರಾಯಣಗುರು ಆಶಯದಲ್ಲಿ ಬೆಳೆದವರು. ‘ಹಗ್ಗಿನ ಹನಿ’ ಬಾಬು ಶಿವಪೂಜಾರಿಯವರು ಪತ್ರಕರ್ತರಾಗಿ ವರ್ತಮಾನವನ್ನು ಹೇಗೆ ನೋಡಿದ್ದಾರೆ ಎನ್ನುವುದನ್ನು ಪ್ರಕಟಪಡಿಸುತ್ತದೆ. ಮುಂಬೈಯ ‘ಗುರುತು’ ಮಾಸ ಪತ್ರಿಕೆಯ ಸಂಪಾದಕರಾಗಿ ಇವರು ಬರೆದ ಸಂಪಾದಕೀಯ ಬರಹಗಳ ಸಂಗ್ರಹವೇ ಈ ‘ಹಗ್ಗಿನ ಹನಿ’. ಹಗ್ಗಿನ ಹನಿ ಕುಂದಾಪುರ ಗ್ರಾಮ್ಯ ಕನ್ನಡದಲ್ಲಿ ಬಳಕೆಯಲ್ಲಿರುವ ವಿಶಿಷ್ಟ ಪದಪುಂಜ. ಮುಂಗಾರಿನ ಮೊದಲ ದಿನಗಳ ಅಂದರೆ ಹಗ್ಗಿನ ತಿಂಗಳ ಮಳೆ ಹನಿಯನ್ನು ಹೀಗೆ ಕರೆಯುತ್ತಾರೆ.

ಕಾದ ಭೂಮಿಗೆ ಸುರಿದ ಮಳೆಯ ಹನಿಯಂತೆಯೇ ಇಲ್ಲಿರುವ ಎಲ್ಲ ಬರಹಗಳೂ ವೈಚಾರಿಕವಾಗಿ ಮತ್ತು ಸಾಂಸ್ಕೃತಿಕವಾಗಿ ನಮ್ಮನ್ನು ಮುಟ್ಟುತ್ತವೆ. ಸ್ತ್ರೀ ಚಳವಳಿ, ಡಾ. ಕ್ಯಾಪ್ಟನ್ ಲಕ್ಷ್ಮೀ ಸೆಹಗಲ್, ಮತಾಂತರ, ಮಂದಾರ್ತಿ, ಬೆನ್ನಿಹಿನ್, ಭ್ರಷ್ಟಾಚಾರ, ವೌಢ್ಯ...ಹೀಗೆ ಹತ್ತು ಹಲವು ವಿಷಯಗಳೆಡೆಗೆ ಸಂಪಾದಕೀಯದ ನೋಟ ಹರಿಯುತ್ತದೆ. ಇಲ್ಲಿ ಬಾಬು ಶಿವಪೂಜಾರಿಯವರ ಲೇಖನದ ಎಲ್ಲ ಉದ್ದೇಶಗಳೂ ನಾರಾಯಣ ಗುರುಗಳ ಆಶಯಕ್ಕೆ ಪೂರಕವಾಗಿಲ್ಲ ಎನ್ನುವುದೂ ಕೆಲವೆಡೆ ಮನದಟ್ಟಾಗುತ್ತದೆ. ಬಹುಶಃ ಅವರ ಬಾಲ್ಯದ ಓದಿನಲ್ಲಿ ವೈದಿಕ ಪ್ರಭಾವ ದಟ್ಟವಾಗಿರುವುದು ಇದಕ್ಕೆ ಕಾರಣವಾಗಿರಬಹುದು.

ಆದುದರಿಂದಲೇ ಅವರ ಕೆಲವು ಲೇಖನಗಳ ವಿಚಾರಗಳು ವಿರೋಧಾಭಾಸಗಳಿಂದ ಕೂಡಿವೆ. ಶೋಷಿತ ಸಮುದಾಯದಿಂದ ಬಂದ ಬಾಬು ಶಿವಪೂಜಾರಿ, ಆ ಶೋಷಣೆಗೆ ಕಾರಣವಾಗಿರುವ ವೈದಿಕ ಸಂಚನ್ನು ಪೂರ್ಣವಾಗಿ ಅರ್ಥ ಮಾಡಿಕೊಳ್ಳುವಲ್ಲಿ ಭಾಗಶಃ ಸೋತಿದ್ದಾರೇನೋ ಎಂದು ಅನಿಸುತ್ತದೆ. ಕೆಲವು ವಿಚಾರಗಳಿಗೆ ಸಂಬಂಧ ಪಟ್ಟಂತೆ, ವಿಷಯದ ಆಳಕ್ಕಿಳಿಯದೆ, ಮೇಲಿಂದ ಮೇಲಕ್ಕೆ ತೀರ್ಮಾನಕ್ಕೆ ಬಂದು ಬಿಡುತ್ತಾರೆ. ಆದರೂ ಇಲ್ಲಿರುವ ಹೆಚ್ಚಿನ ಲೇಖನಗಳು ನಮ್ಮನ್ನು ವಿಚಾರಕ್ಕೆ, ವಿಮರ್ಶೆಗೆ ಹಚ್ಚುವುದರಲ್ಲಿ ಅನುಮಾನವಿಲ್ಲ.
ಬಿಲ್ಲವ ಜಾಗೃತಿ ಬಳಗ ಮುಂಬೈ ಇವರು ಹೊರತಂದಿರುವ ಕೃತಿಯ ಮುಖಬೆಲೆ 300 ರೂ. ಆಸಕ್ತರು 2264 1816 ದೂರವಾಣಿಯನ್ನು ಸಂಪರ್ಕಿಸಬಹುದು.