ಓ ಮೆಣಸೇ...
Update: 2018-10-01 06:48 GMT
ರಾವಣ ಹುಟ್ಟಿದ್ದು ನೋಯ್ಡಿದಲ್ಲಿ -ಸುಬ್ರಮಣಿಯನ್ ಸ್ವಾಮಿ, ಬಿಜೆಪಿ ಮುಖಂಡ
ನೋಯ್ಡದಲ್ಲಿ ಯಾವ ಮಸೀದಿ ಒಡೆಯಬೇಕಾಗಿದೆ?
---------------------
ವಿಧಾನ ಸೌಧ ಬಿಗ್ ಬಝಾರ್, ರೇಸ್ ಕೋರ್ಸ್‌ನಂತೆ ಮನೋರಂಜನೆ ಕೇಂದ್ರವಾಗಿ ಮಾರ್ಪಟ್ಟಿದೆ - ವೀರಭದ್ರಪ್ಪ, ಸಾಹಿತಿ
ಸರಕಾರಕ್ಕೆ ಗೊತ್ತಾದರೆ ಅದಕ್ಕೂ ತೆರಿಗೆ ಹಾಕೀತು.
---------------------
ಆಯುಷ್ಮಾನ್‌ಭವ ಯೋಜನೆಯಲ್ಲಿ ಜಾತಿ, ಧರ್ಮಗಳ ತಾರತಮ್ಯ ಮಾಡುವುದಿಲ್ಲ -ನರೇಂದ್ರ ಮೋದಿ, ಪ್ರಧಾನಿ
ಅಂದರೆ ದಲಿತರಿಗೆ ಅಲ್ಲಿ ವಿಶೇಷ ಸವಲತ್ತು ಇಲ್ಲ ಎಂದಾಯಿತು.
---------------------
ಮಂಗಳೂರು ದಸರಾ ಉದ್ಘಾಟನೆಗೆ ಯಾರೂ ಬಾರದಿದ್ದರೆ ನಾನೇ ಉದ್ಘಾಟಿಸುತ್ತೇನೆ - ಜನಾರ್ದನ ಪೂಜಾರಿ, ಕಾಂಗ್ರೆಸ್ ಮುಖಂಡ
ಆದರೆ ಹುಲಿ ವೇಷವನ್ನು ಮಾತ್ರ ತಾವೇ ಕುಣಿದರೆ ಸರಿಯಾಗುವುದಿಲ್ಲ.
---------------------
ನುಸುಳುಕೋರರು ಗೆದ್ದಲು ಹುಳಗಳಿದ್ದಂತೆ - ಅಮಿತ್ ಶಾ, ಬಿಜೆಪಿ ಅಧ್ಯಕ್ಷ
ಅವರ ಕಟ್ಟಿದ ಹುತ್ತದಲ್ಲಿ ಬದುಕುವ ಹಾವುಗಳು ತಾವುಗಳು ಎನ್ನುವ ಆರೋಪವಿದೆ.
---------------------
ನನಗೆ ಬ್ಲಾಕ್‌ಮೇಲ್ ಗೊತ್ತಿಲ್ಲ, ಇ-ಮೇಲ್ ಮಾತ್ರ ಗೊತ್ತು -ಡಾ.ಸುಧಾಕರ, ಶಾಸಕ
ಇಮೇಲ್ ಮೂಲಕವೇ ಬ್ಲಾಕ್‌ಮೇಲ್ ಮಾಡುವವರಿದ್ದಾರೆ.
---------------------
ಒಬ್ಬ ಮುಖ್ಯಮಂತ್ರಿಯಲ್ಲಿ ಜನ ನಿರೀಕ್ಷೆ ಮಾಡುವುದು ಭಂಡತನವಲ್ಲ, ದೊಡ್ಡತನವನ್ನು - ಸಿ.ಟಿ.ರವಿ, ಶಾಸಕ
ಇದನ್ನು ಒಬ್ಬ ಶಾಸಕನಲ್ಲಿ ನಿರೀಕ್ಷೆ ಮಾಡಬಾರದೇ?
---------------------
ಮನೆ ಮತ್ತು ಸ್ಮಶಾನ ಯಾವತ್ತೂ ಚೆನ್ನಾಗಿರಬೇಕು - ನಳಿನ್‌ಕುಮಾರ್ ಕಟೀಲು, ಸಂಸದ
ಮನ ಚೆನ್ನಾಗಿಲ್ಲದಿದ್ದರೆ ಮನೆ ಸ್ಮಶಾನ.
---------------------
ಪತನದ ಅಂಚಿನಲ್ಲಿದೆ ಎಂದು ಭಾವಿಸಲಾಗಿದ್ದ ಜೆಡಿಎಸ್- ಕಾಂಗ್ರೆಸ್ ಸರಕಾರವನ್ನು ಮಾಜಿ ಸಿಎಂ ಸಿದ್ದರಾಮಯ್ಯ ಪಾರುಮಾಡಿದ್ದಾರೆ - ಎಚ್.ಡಿ.ದೇವೇಗೌಡ, ಮಾಜಿ ಪ್ರಧಾನಿ
ಎಷ್ಟು ದಿನಗಳ ಕಾಲ ಎನ್ನುವುದು ಪ್ರಶ್ನೆ.
---------------------
ಬಿಜೆಪಿ ಶಾಸಕರು ಮತ್ತು ಸಂಸದರು ಯಾವ ಉಪಯೋಗಕ್ಕೂ ಬಾರದ ಗೊಡ್ಡೆಮ್ಮೆಗಳು -ಶಾಮನೂರು ಶಿವಶಂಕರಪ್ಪ, ಶಾಸಕ
ಕಸಾಯಿಖಾನೆಗಳಿಗೆ ಸಾಗಿಸುವಾಗ ಜಾಗೃತೆ, ಗೋರಕ್ಷಕರಿದ್ದಾರೆ.
---------------------
ಎಐಸಿಸಿ ಅಧ್ಯಕ್ಷ ರಾಹುಲ್ ಗಾಂಧಿ ತಲೆಯಲ್ಲಿ ಮೆದುಳಿಲ್ಲ - ಪ್ರಹ್ಲಾದ್ ಜೋಷಿ, ಸಂಸದ
ತಲೆಯಲ್ಲಿ ಸೆಗಣಿ ಇಟ್ಟುಕೊಂಡವರ ಕಳವಳ.
---------------------
ಮತಬ್ಯಾಂಕ್ ರಾಜಕಾರಣ ದೇಶವನ್ನು ಗೆದ್ದಲಿನಂತೆ ತಿನ್ನುತ್ತಿದೆ - ನರೇಂದ್ರ ಮೋದಿ, ಪ್ರಧಾನಿ
ರಫೇಲ್ ಒಪ್ಪಂದದಲ್ಲಿ ತಿಂದದ್ದು ನೀವಲ್ಲ, ಗೆದ್ದಲು ಎನ್ನುತ್ತಿದ್ದೀರಾ?
---------------------
ನಾನು ಇನ್ನೊಬ್ಬರಿಗೆ ಸಚಿವ ಸ್ಥಾನ ಕೊಡಿಸುವಷ್ಟು ದೊಡ್ಡವನಲ್ಲ - ಡಿ.ಕೆ.ಶಿವಕುಮಾರ್, ಸಚಿವ
ಮುಖ್ಯಮಂತ್ರಿ ಸ್ಥಾನ ಕೊಡಿಸುವಷ್ಟು ಮಾತ್ರ ಎಂದಂತಾಯಿತು.
---------------------
ಆತ್ಮ ಶುದ್ಧಿ ಇರುವುದರಿಂದ ನನಗೆ ಯಾವುದರ ಭಯವೂ ಇಲ್ಲ - ರಾಘವೇಶ್ವರ ಸ್ವಾಮೀಜಿ, ರಾಮಚಂದ್ರಾಪುರ ಮಠ
ಅಕ್ರಮ ಸಂಬಂಧ ಸಕ್ರಮವಾದ ಬಳಿಕದ ಆತ್ಮವಿಶ್ವಾಸ.
---------------------
ಕೆಸರು ಎರಚಿದಷ್ಟೂ ಕಮಲ ಅರಳುತ್ತೆ - ನರೇಂದ್ರ ಮೋದಿ, ಪ್ರಧಾನಿ
ಅದಕ್ಕಾಗಿ ಕೆಸರಲ್ಲೇ ಹೊರಳಾಡಿದರೆ ಹೇಗೆ?
---------------------
ಪಿತೃ ಪಕ್ಷದಲ್ಲಿ ಯಾವುದೇ ಅಪರಾಧ ಮಾಡಬೇಡಿ -ಸುಶೀಲ್ ಮೋದಿ, ಬಿಹಾರ ಉಪಮುಖ್ಯಮಂತ್ರಿ
ರಾಜಕೀಯ ಪಕ್ಷ ಅಲ್ಲ ಎನ್ನುವ ಕಾರಣಕ್ಕಾಗಿ ಇರಬೇಕು.
---------------------
ಆಧಾರ್‌ನಿಂದ ಪ್ರತಿ ವರ್ಷ 90 ಸಾವಿರ ಕೋಟಿ ರೂ. ಉಳಿತಾಯವಾಗುತ್ತಿದೆ - ಅರುಣ್‌ಜೇಟ್ಲಿ, ಕೇಂದ್ರ ಸಚಿವ
ಬಹುಶಃ ಅಂಬಾನಿಯ ಅದಾಯವನ್ನು ಹೇಳುತ್ತಿರಬೇಕು.
---------------------
ಕಾಂಗ್ರೆಸ್ ನಾಯಕರು ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿ ವಿರುದ್ಧ ಜಯಿಸುವುದು ಹೇಗೆ ಎಂಬ ಭೀತಿಯಿಂದ ದೇವಸ್ಥಾನಗಳಿಗೆ ಮೊರೆಹೋಗುತ್ತಿದ್ದಾರೆ - ಸಾಧ್ವಿ ನಿರಂಜನ ಜ್ಯೋತಿ, ಕೇಂದ್ರ ಸಚಿವೆ
ಅದಕ್ಕೆ ಪ್ರತಿಯಾಗಿ ತಾವು ದೆವ್ವ ಸ್ಥಾನಗಳಿಗೆ ಹೋಗುತ್ತಿರುವ ಬಗ್ಗೆ ವರದಿಗಳಿವೆ.
---------------------
ಇಂದಿನ ಖಾಸಗಿ ಶಾಲೆಗಳು ಪೂತನಿಯಂತೆ ಚಿಕ್ಕಮಕ್ಕಳನ್ನು ಬಹಳ ಆಕರ್ಷಕವಾಗಿ ತನ್ನ ತೆಕ್ಕೆಗೆ ಸೆಳೆದುಕೊಳ್ಳುತ್ತಿವೆ - ವಿಶ್ವೇಶ ತೀರ್ಥ ಸ್ವಾಮೀಜಿ, ಪೇಜಾವರ ಮಠ
ಸರಕಾರಿ ಶಾಲೆಯೆಂಬ ತಾಯಿಯ ಎದೆ ಹಾಲಿಲ್ಲದೆ ಒಣಗಿದ ಪರಿಣಾಮ.
---------------------
ಬಿಜೆಪಿಯಲ್ಲಿ ಕಾಂಗ್ರೆಸ್‌ನಂತೆ ಹೈಕಮಾಂಡ್ ಸಂಪ್ರದಾಯವಿಲ್ಲ - ಸ್ಮತಿ ಇರಾನಿ, ಕೇಂದ್ರ ಸಚಿವೆ
ಅಲ್ಲಿರುವುದು ಬರೇ ಮೋದಿ ಸಂಪ್ರದಾಯ.
---------------------
ಗುಜರಾತ್‌ನಲ್ಲಿ ನಿರ್ಮಾಣವಾಗುತ್ತಿರುವ ವಲ್ಲಭಭಾಯಿ ಪಟೇಲ್ ಪ್ರತಿಮೆ ಮೇಡ್ ಇನ್ ಚೀನಾ -ರಾಹುಲ್ ಗಾಂಧಿ, ಕಾಂಗ್ರೆಸ್ ಅಧ್ಯಕ್ಷ
ಗಂಜಲದಲ್ಲಿ ಶುದ್ಧೀಕರಿಸಿ ಬಳಿಕ ಅನಾವರಣಗೊಳಿಸುವು ದರಿಂದ, ಅದು ಮೇಡ್ ಇನ್ ಚೀನಾ ಆಗುವುದಿಲ್ಲ.
---------------------
ಪ್ರಸ್ತುತ ಪರಿಸ್ಥಿತಿಯಲ್ಲಿ ಶ್ರೀರಾಮ ಚುನಾವಣೆಗೆ ನಿಂತರೂ ಗೆಲ್ಲಲು ಹಣ ಖರ್ಚು ಮಾಡಲೇಬೇಕಿತ್ತು - ವೆಲಿಂಗಕರ್, ಗೋವಾ ಆರೆಸ್ಸೆಸ್ ಮುಖ್ಯಸ್ಥ
ಅಯೋಧ್ಯೆಯಲ್ಲಿ ನಿಂತರೆ ಆತನಿಗೆ ಬಿಜೆಪಿಯಿಂದ ಸೋಲು ಖಚಿತ.
---------------------
ಅನಿವಾರ್ಯ ಕಾರಣದಿಂದ ನಾನು ಆರೋಗ್ಯ ಸಚಿವನಾಗಿರುವೆ - ಶಿವಾನಂದ ಪಾಟೀಲ್, ಸಚಿವ
ಅನಾರೋಗ್ಯಕರ ಹೇಳಿಕೆ.
---------------------
ಸಮ್ಮಿಶ್ರ ಸರಕಾರದ ಸಮನ್ವಯ ಸಮಿತಿಯಲ್ಲಿ ಸದಸ್ಯನಾಗಬೇಕೆಂಬ ಇಚ್ಛೆ ಇದೆ - ವಿಶ್ವನಾಥ್, ಜೆಡಿಎಸ್ ಅಧ್ಯಕ್ಷ
ಇರುವ ಸಮನ್ವಯವನ್ನು ಕೆಡಿಸುವುದಕ್ಕಾಗಿ ಇರಬಹುದೇ?