ಓ ಮೆಣಸೇ…
Update: 2019-02-10 18:44 GMT
*ಬಿಜೆಪಿಗೆ ಮತ ಹಾಕುವ ಮುಸ್ಲಿಮರು ಮುಸ್ಲಿಮರೇ ಅಲ್ಲ - ಝಮೀರ್‌ಅಹ್ಮದ್, ಸಚಿವ
ಅಲ್ಪಸಂಖ್ಯಾತ ಇಲಾಖೆಯಿಂದ ಯಾರು ಮುಸ್ಲಿಮರು? ಯಾರು ಮುಸ್ಲಿಮರಲ್ಲ? ಎನ್ನುವ ಪ್ರಮಾಣ ಪತ್ರ ನೀಡಲು ಶುರು ಮಾಡಿ.
---------------------
ಸದ್ಯಕ್ಕೆ ಸಕ್ರಿಯ ರಾಜಕಾರಣದಿಂದ ದೂರ ಉಳಿದಿದ್ದೇನೆ - ಎಸ್.ಎಂ.ಕೃಷ್ಣ, ಮಾಜಿ ಮುಖ್ಯಮಂತ್ರಿ
ಇದೀಗ ಸಮಯಸಾಧಕ ರಾಜಕಾರಣಕ್ಕಷ್ಟೇ ಉಳಿದ ಬದುಕು ಮೀಸಲು.
---------------------
ನನಗೂ ಮುಖ್ಯಮಂತ್ರಿಯಾಗುವ ಆಸೆ ಇದೆ- ಸತೀಶ್ ಜಾರಕಿಹೊಳಿ, ಶಾಸಕ
ತಮ್ಮ ಸೋದರನೂ ಅದೇ ಆಸೆ ಹೊಂದಿದ್ದರೆ ಕಷ್ಟ.
---------------------
ಒಂದು ವೇಳೆ ನನಗೇನಾದರೂ ಆದರೆ ಅದಕ್ಕೆ ಪ್ರಧಾನಿ ಮೋದಿಯೇ ಹೊಣೆಗಾರ - ಅಣ್ಣಾಹಝಾರೆ, ಸಾಮಾಜಿಕ ಕಾರ್ಯಕರ್ತ
ಮೋದಿ ಪ್ರಧಾನಿ ಆಗುವುದರ ಹಿಂದಿನ ಹೊಣೆಗಾರರು ನೀವಲ್ಲವೇ?
---------------------
ದೇಶದಲ್ಲಿ ಈಗ ನಿರುದ್ಯೋಗ ಸಮಸ್ಯೆ ಇಲ್ಲವೇ ಇಲ್ಲ - ಅರುಣ್‌ಜೇಟ್ಲಿ, ಕೇಂದ್ರ ಸಚಿವ
ಗುಂಪು ಹತ್ಯೆ, ನಕಲಿ ಗೋರಕ್ಷಣೆ ಇವೆಲ್ಲವು ನಿಮ್ಮ ದೃಷ್ಟಿಯಲ್ಲಿ ಉದ್ಯೋಗಗಳೇ ಇರಬೇಕು.
---------------------
ರಾಜಕೀಯದಲ್ಲಿ ಸತ್ಯಹರಿಶ್ಚಂದ್ರರಿದ್ದರೆ ಅವರು ಸ್ಮಶಾನ ಕಾಯಬೇಕಾಗುತ್ತದೆ - ಬಿ.ಕೆ.ಹರಿಪ್ರಸಾದ್, ರಾಜ್ಯಸಭಾ ಸದಸ್ಯ
ಸದ್ಯಕ್ಕೆ ಸ್ಮಶಾನ ಕಾಯುವವರೆಲ್ಲ ರಾಜಕೀಯ ಸೇರಿಕೊಂಡಿದ್ದಾರೆ.
---------------------
ನಾವು ಯಾವ ಪಕ್ಷದಲ್ಲಿದ್ದೇವೆ ಎನ್ನುವುದಕ್ಕಿಂತ ನಮ್ಮ ಧ್ವನಿಗೆ ಸ್ಪಂದಿಸುವವರು ಯಾರಿದ್ದಾರೆ ಎನ್ನುವುದು ಮುಖ್ಯ - ಶೋಭಾ ಕರಂದ್ಲಾಜೆ, ಸಂಸದೆ
ಬಿಜೆಪಿಯಲ್ಲಿ ನಿಮ್ಮ ಧ್ವನಿಗೆ ಸ್ಪಂದಿಸುವವರು ತಮ್ಮ ಧ್ವನಿಯ ಕುರಿತಂತೆ ತಪ್ಪೊಪ್ಪಿಕೊಂಡಿದ್ದಾರೆ.
---------------------
ನನಗೆ ಕಮಲ ಗೊತ್ತು, ಆಪರೇಶನ್ ಗೊತ್ತಿಲ್ಲ - ಎಸ್.ಎಂ.ಕೃಷ್ಣ, ಮಾಜಿ ಮುಖ್ಯಮಂತ್ರಿ
ಬಿಜೆಪಿಯ ಆಪರೇಶನ್‌ನಿಂದ ನರ ಕತ್ತರಿಸಲ್ಪಟ್ಟವರ ಮಾತು.
---------------------
ಜನರ ಸೇವೆ ಮಾಡಲು ನಿಜವಾದ ವೇದಿಕೆ ರಾಜಕೀಯ - ಉಪೇಂದ್ರ, ನಟ
‘ಬುದ್ಧಿವಂತರಿಗೆ ಮಾತ್ರ’ ಅನ್ವಯವಾಗದ ಮಾತು.
---------------------
ನಾನು ಧರ್ಮದ ಬಗ್ಗೆ ಮಾತನಾಡುವಷ್ಟು ದೊಡ್ಡವನಲ್ಲ - ಅನಂತಕುಮಾರ್ ಹೆಗಡೆ, ಕೇಂದ್ರ ಸಚಿವ
ಅದರ ಬಗ್ಗೆ ಗೊತ್ತಿದ್ದರೆ ಧರ್ಮದ ಹೆಸರಲ್ಲಿ ಇಷ್ಟೆಲ್ಲ ಅನಾಚಾರಗಳನ್ನು ನೀವು ಮಾಡುತ್ತಿರಲಿಲ್ಲ.
---------------------
ಕುಟುಂಬದ ಹೊಣೆ ಹೊರದವ ದೇಶ ಮುನ್ನಡೆಸಲಾರ - ನಿತಿನ್‌ ಗಡ್ಕರಿ, ಕೇಂದ್ರ ಸಚಿವ
ಜಶೋದಾಬೆನ್ ಕಿಸಕ್ಕನೆ ನಕ್ಕರಂತೆ.
---------------------
ಪ್ರಧಾನಿ ಮೋದಿ ದೇಶಕ್ಕೆ ಎರಗಿದ ಶನಿ - ಜನಾರ್ದನ ಪೂಜಾರಿ, ಕಾಂಗ್ರೆಸ್ ಮುಖಂಡ
ಮಂಗಳೂರು ಲೋಕಸಭಾ ಚುನಾವಣೆ ಟಿಕೆಟ್‌ಗೆ ಮತ್ತೆ ತಯಾರಿ ನಡೆಸಿದಂತಿದೆ.
---------------------
ಬಿಜೆಪಿಯಲ್ಲಿ ಕೆಚ್ಚು ಇರುವ ವ್ಯಕ್ತಿ ನಿತಿನ್‌ ಗಡ್ಕರಿ ಮಾತ್ರ - ರಾಹುಲ್‌ಗಾಂಧಿ, ಕಾಂಗ್ರೆಸ್ ಅಧ್ಯಕ್ಷ
ಆ ಕೆಚ್ಚು ಕಾಂಗ್ರೆಸ್‌ನಲ್ಲಿರುವವರಲ್ಲಿ ಬರುವುದು ಯಾವಾಗ?
---------------------
ಕೇವಲ 3 ದಿನ ಮಾತ್ರ ಮುಖ್ಯಮಂತ್ರಿಯಾಗಿದ್ದಕ್ಕೆ ಯಡಿಯೂರಪ್ಪರ ಮನಸ್ಸಿಗೆ ನೋವಾಗಿದೆ - ದೇವೇಗೌಡ, ಮಾಜಿ ಪ್ರಧಾನಿ
ಅಷ್ಟೇ ಅಲ್ಲ, ನೋವು ಮಾಡಿದವರು ಎರಡೆರಡು ಬಾರಿ ಮುಖ್ಯಮಂತ್ರಿಯಾಗಿರುವುದು ಕೂಡ.
---------------------
ಪ್ರಧಾನಿ ಮೋದಿ ರಾಜಕೀಯದಿಂದ ನಿವೃತ್ತರಾದ ದಿನವೇ ನಾನು ರಾಜಕೀಯವನ್ನು ತೊರೆಯುತ್ತೇನೆ - ಸ್ಮತಿ ಇರಾನಿ, ಕೇಂದ್ರ ಸಚಿವೆ
ಮತದಾರರಿಗೆ ಬೋನಸ್.
---------------------
ನಮ್ಮ ಮೈತ್ರಿ ಸರಕಾರದ ಎತ್ತಿನ ಗಾಡಿ ಸುಭದ್ರವಾಗಿ ಸಾಗುತ್ತಿದೆ - ಎಚ್.ಡಿ.ಕುಮಾರಸ್ವಾಮಿ, ಮುಖ್ಯಮಂತ್ರಿ
ಎತ್ತು ಕತ್ತೆಯಾಗದಂತೆ ನೋಡಿಕೊಳ್ಳಿ.
---------------------
ಮುಖ್ಯಮಂತ್ರಿ(ಮಮತಾ ಬ್ಯಾನರ್ಜಿ)ಯೊಬ್ಬರು ಬೀದಿಯಲ್ಲಿ ನಿಂತು ಧರಣಿ ನಡೆಸುವುದು ಪ್ರಜಾಪ್ರಭುತ್ವ ವ್ಯವಸ್ಥೆಗೇ ಅಪಮಾನ - ಯೋಗಿ ಆದಿತ್ಯನಾಥ್, ಉ.ಪ್ರ.ಮುಖ್ಯಮಂತ್ರಿ
ಬೀದಿಯಲ್ಲಿ ನಡೆಯುತ್ತಿರುವ ಗುಂಪು ಹತ್ಯೆಗಳು ಪ್ರಜಾಪ್ರಭುತ್ವದ ಹೆಗ್ಗಳಿಕೆ ಇರಬೇಕು.
---------------------
ನರೇಂದ್ರ ಮೋದಿ ಆಡಳಿತಕ್ಕಿಂತ ತುರ್ತು ಪರಿಸ್ಥಿತಿಯೇ ಎಷ್ಟೋ ಉತ್ತಮವಾಗಿತ್ತು - ಚಂದ್ರಬಾಬುನಾಯ್ಡು, ಆಂಧ್ರ ಮುಖ್ಯಮಂತ್ರಿ
ಇನ್ನೊಂದು ಅವಕಾಶ ಕೊಟ್ಟರೆ ಅದನ್ನೂ ಕೊಡುತ್ತೇನೆ ಎಂದರಂತೆ ಮೋದಿ.
---------------------
ಲೋಕಸಭೆ ಚುನಾವಣೆ ಮುಗಿಯುವವರೆಗೂ ಅಯೋಧ್ಯೆ ರಾಮಮಂದಿರ ನಿರ್ಮಾಣ ಪ್ರಸ್ತಾವವಿಲ್ಲ - ಅಲೋಕ್‌ಕುಮಾರ್, ವಿಎಚ್‌ಪಿ ಕಾರ್ಯಾಧ್ಯಕ್ಷ
ಚುನಾವಣೆಯಲ್ಲಿ ಯಾರು ಗೆಲ್ಲುತ್ತಾರೆ ಎನ್ನುವುದರ ಆಧಾರದಲ್ಲಿ ಮತ್ತೆ ನಿರ್ಮಾಣದ ಪ್ರಸ್ತಾವ ಇಡುತ್ತಾರಂತೆ.
---------------------
ನಾವು ಮದುವೆಯಾಗಿ ನಡೆಸಬೇಕಾಗಿದ್ದ ಸಂಸಾರವನ್ನು ಕಾಂಗ್ರೆಸ್ - ಜೆಡಿಎಸ್ ಅಕ್ರಮವಾಗಿ ಸೇರಿಕೊಂಡು ನಡೆಸುತ್ತಿದ್ದಾರೆ - ಜಗದೀಶ್ ಶೆಟ್ಟರ್, ಶಾಸಕ
ಅಕ್ರಮವೋ, ಸಕ್ರವೋ ಮಗು ಹುಟ್ಟಿದರೆ ಆಯಿತಲ್ಲ?
---------------------
‘ಕಾಂಗ್ರೆಸ್ ಮುಕ್ತ ಭಾರತ’ ಘೋಷಣೆ ನನ್ನದಲ್ಲ , ಅದು ಗಾಂಧೀಜಿಯ ಆಶಯ - ನರೇಂದ್ರ ಮೋದಿ, ಪ್ರಧಾನಿ
ಅದಕ್ಕೇ ತಾನೆ, ಗೋಡ್ಸೆ ಗಾಂಧಿಯನ್ನು ಕೊಂದದ್ದು.
---------------------
ಪ್ರತಿ ಮನೆಯಲ್ಲಿ ಪುಸ್ತಕಗಳಿಗೆ ಪ್ರಮುಖ ಜಾಗವಿರಲಿ -ಹಂಪ ನಾಗರಾಜಯ್ಯ, ಹಿರಿಯ ಸಾಹಿತಿ
ಮೊದಲು ಜನರಿಗೆ ಮನೆಗಳನ್ನು ಕೊಡಿಸಿ.
---------------------
ಯುನಾನಿ ಪದ್ಧತಿ ಕುರಿತು ಜನತೆಯಲ್ಲಿ ವಿಶ್ವಾಸ ಮೂಡಿಸಬೇಕಿದೆ - ಮೀನಾಕ್ಷಿ ನೇಗಿ,
ನಿರ್ದೇಶಕಿ, ಆಯುಷ್ ಇಲಾಖೆ
ಕಾಯಿಲೆ ಗುಣವಾದರೆ ವಿಶ್ವಾಸ ತನ್ನಷ್ಟಕ್ಕೇ ಮೂಡುತ್ತದೆ. ಜಾಹೀರಾತಿಗೆ ಹಣವೇಕೆ ವ್ಯರ್ಥ ಮಾಡುತ್ತೀರಿ?