ದೇರಳಕಟ್ಟೆಯಲ್ಲಿ ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್ ಮಾಲ್ ಉದ್ಘಾಟನೆ

ದೇರಳಕಟ್ಟೆ: ಪ್ರತಿಷ್ಠಿತ ಬ್ಯಾರೀಸ್ ಗ್ರೂಪ್ ನ ಬಹು ನಿರೀಕ್ಷಿತ ನಗರ ಜೀವನಶೈಲಿಯ ವಾಣಿಜ್ಯ ಹಾಗೂ ವಸತಿ ಯೋಜನೆ ದೇರಳಕಟ್ಟೆಯ 'ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್"ನ ಉದ್ಘಾಟನಾ ಸಮಾರಂಭ ಶನಿವಾರ ನಡೆಯಿತು.

ಮಲ್ಟಿಪ್ಲೆಕ್ಸ್ ಥಿಯೇಟರ್ ನ್ನು ಭಾರತ್ ಬೀಡೀಸ್ ನಿರ್ದೇಶಕ ಆನಂದ್ ಜಿ. ಪೈ, ಬೌಲಿಂಗ್ ವಿಭಾಗವನ್ನು ಫಾದರ್ ಮುಲ್ಲರ್ ಹೊಮಿಯೋಪತಿ ಆಸ್ಪತ್ರೆಯ ನಿರ್ದೇಶಕ ರೆ. ಫಾ. ಫೌಸ್ಟಿನ್ ಲೋಬೊ, ಫುಡ್ ಕೋರ್ಟ್ ನ್ನು ಯೆನೆಪೋಯ ಗ್ರೂಪ್ ನಿರ್ದೇಶಕ ಯೆನೆಪೋಯ ಜಾವೀದ್, ವಿಡಿಯೋ ಗೇಮ್ಸ್ ನ್ನು ರೋಬೊ ಸಾಫ್ಟ್ ಮಾಜಿ ಆಡಳಿತ ನಿರ್ದೇಶಕ ರೋಹಿತ್ ಭಟ್, ಸಾಫ್ಟ್ ಪ್ಲೇ ಯನ್ನು ಬ್ಯಾರೀಸ್ ಗ್ರೂಪ್ ಅಧ್ಯಕ್ಷ ಸಯ್ಯದ್ ಮಹಮ್ಮದ್ ಬ್ಯಾರಿ, ಕ್ರಿಕೆಟ್ ಗೇಮನ್ನು ಖ್ಯಾತ ವೇಟ್ ಲಿಫ್ಟರ್ ಅಶ್ವಿನ್ ಸನಿಲ್, ಡ್ಯಾಷಿಂಗ್ ಕಾರ್ ಗೇಮ್ ನ್ನು ಉದ್ಯಮಿ ಸಿದ್ದಿಕ್ ಹಾಜಿ, ರಾಕ್ ಕ್ಲೈಂಬಿಂಗ್ ಗೋಡೆ ಯನ್ನು ಅನಿವಾಸಿ ಭಾರತೀಯ ಉದ್ಯಮಿ ಮಹಮ್ಮದ್ ಕುಂಞಿ, ಟಾಯ್ ಟ್ರೈನ್ ನ್ನು ಬ್ಯಾರೀಸ್ ಗ್ರೂಪ್ ನಿರ್ದೇಶಕ ಸಿದ್ದಿಕ್ ಬ್ಯಾರಿ ಉದ್ಘಾಟಿಸಿದರು.

ಬ್ಯಾರೀಸ್ ಗ್ರೂಪ್ ಅಧ್ಯಕ್ಷ ಸಯ್ಯದ್ ಬ್ಯಾರಿ ಮಾತನಾಡಿ, ಶಿವಮೊಗ್ಗದ ಬ್ಯಾರೀಸ್ ಸಿಟಿ ಸೆಂಟರ್ ಮಾಲ್ ಯಶಸ್ಸು ಸಾಧಿಸಿದ ಬಳಿಕ ಇದೀಗ ದೇರಳಕಟ್ಟೆಯಲ್ಲಿ ನಗರಜೀವನ ಶೈಲಿಯ ಈ ವಿಶಿಷ್ಟಮಾಲ್ ಶುಭಾರಂಭಗೊಂಡಿದೆ. 320ಮನೆಗಳಿರುವ ಬೃಹತ್ ಸಂಕೀರ್ಣ ಹೃದಯ ಭಾಗದಲ್ಲಿದ್ದರೂ ದುಬಾರಿಯಲ್ಲದ ಸಂಕೀರ್ಣ ಎಂಬ ಗರಿಮೆಗೆ ಪಾತ್ರವಾಗಿದೆ. ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್ ದೇರಳಕಟ್ಟೆ ಪರಿಸರದ ಪ್ರಗತಿ, ಬದಲಾವಣೆ ಹಾಗೂ ಅಭಿವೃದ್ಧಿಯ ಹೊಸ ದಿಕ್ಕನ್ನು ಸೂಚಿಸುತ್ತದೆ. ಮಂಗಳೂರು ವಿಧಾನ ಸಭಾ ಕ್ಷೇತ್ರ ವ್ಯಾಪ್ತಿಯ ನಗರಗಳನ್ನು ವಿಶ್ವದರ್ಜೆಗೆ ಏರಿಸುವಲ್ಲಿ ಈ ಮಾಲ್ ಪಾತ್ರ ನಿರ್ವಹಿಸಲಿದೆ . ನಾವು ಯಾವುದೇ ಬ್ಯಾಂಕ್ ಲೋನ್ ಪಡೆಯದೇ, ಬಡ್ಡಿ ಪಾವತಿಸದೆ ಈ ಯೋಜನೆಯನ್ನು ಪೂರ್ಣಗೊಳಿಸಿದ್ದೇವೆ ಎಂದು ಹೇಳಿದರು.

ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್ ಹೃದಯ ಭಾಗದಲ್ಲಿ ಫ್ಯಾಮಿಲಿ ಎಂಟರ್ಟೈನ್ಮೆಂಟ್ ಸೆಂಟರ್, ಆಧುನಿಕ ನಾಲ್ಕು ಪರದೆಗಳ ಮಲ್ಟಿಪ್ಲೆಕ್ಸ್, ವಿವಿಧ ಪಾಕ ವಿಧಾನಗಳನ್ನು ಒಳಗೊಂಡ ಸೊಗಸಾದ ಫುಡ್ ಕೋರ್ಟ್, ಜತೆಗೆ ಇಂಟರಾಕ್ಟಿವ್ ಆಟಗಳು, ನಾಲ್ಕು ಲೇನ್ ಬೌಲಿಂಗ್ ಅಲೈ, ದೊಡ್ಡ ಕ್ಲೈಂಬಿಂಗ್ ವಾಲ್, ಬಂಪರ್ ಕಾರುಗಳು, ಇಂಡೋರ್ ಕ್ರಿಕೆಟ್, ಮಕ್ಕಳಿಗಾಗಿ ಸಾಫ್ಟ್ ಏರಿಯಾ ಹಾಗೂ ಇತರ ವೈವಿಧ್ಯಮಯ ಆಟ ಹಾಗೂ ಮನೋರಂಜನೆಗಳು ಲಭ್ಯ ಇವೆ. ಗ್ರಾಹಕರಿಗೆ ಈ ಆಟಗಳಲ್ಲಿ ಭಾಗವಹಿಸಿ , ಫುಡ್ ಕೋರ್ಟ್ ನಲ್ಲಿ ರುಚಿ ರುಚಿಯಾದ ಆಹಾರ ಖಾದ್ಯಗಳನ್ನು ಸವಿದು ಖುಷಿ ಪಡೆಯಲು ಅವಕಾಶವಾಗಿದೆ ಎಂದು ಹೇಳಿದರು.

ಅಂತರಾಷ್ಟ್ರೀಯ ಖ್ಯಾತಿಯ ಲೂಲು, ಸ್ಪಾರ್ ಸೇರಿದಂತೆ ಹೈಪರ್ ಮಾರ್ಕೆಟ್ ಮತ್ತು ಅಂತಾರಾಷ್ಟ್ರೀಯ ಬ್ರಾಂಡ್ ಗಳ ಪ್ರಮುಖ ಔಟ್ಲೆಟ್ ಗಳು ಶೀಘ್ರ ಆರಂಭಗೊಳ್ಳಲಿದೆ ಎಂದರು.

ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್ ನಿರೀಕ್ಷೆಯಂತೆ ಮೂರು ವರ್ಷದ ಯೋಜನೆಯಾಗಿತ್ತಾದರೂ ಉದ್ಘಾಟನೆಗೆ ಹನ್ನೆರಡು ವರ್ಷ ತೆಗೆದುಕೊಂಡಿತಾದರೂ ಮಾಲ್ ನ ಮನೋರಂಜನಾ ಪ್ರದೇಶವು ವಿಶಿಷ್ಟ ಹಾಗೂ ನೈಸರ್ಗಿಕ ವಿನ್ಯಾಸದೊಂದಿಗೆ ರೂಪುಗೊಂಡಿದೆ. ಎಲ್ಲವೂ ಆಧುನಿಕ ಶೈಲಿಯಲ್ಲಿ ವೈಭವೊಪೇತವಾಗಿದೆ ಎಂದರು.

ಬಳಿಕ ಮಾಲ್ ನಿರ್ಮಾಣದ ಹಿಂದೆ ದುಡಿದ ಇಂಜಿನಿಯರ್, ಆರ್ಕಿಟೆಕ್ಟ್ , ಇಂಟರಿಯರ್ ಡಿಸೈನರ್, ಮಾರ್ಕೆಟಿಂಗ್ ತಂಡ ಸೇರಿದಂತೆ ಪ್ರತಿಯೊಂದು ವಿಭಾಗದಲ್ಲಿ ಸೇವೆ ಸಲ್ಲಿಸಿದವರನ್ನು ಗೌರವಿಸಿದರು.

ಅಶ್ರಫ್ ಬ್ಯಾರಿ, ಇಂಟೀರಿಯರ್ ಮತ್ತು ಫಿಟ್ ಔಟ್ಸ್ ನ ಸೀನಿಯರ್ ಮೇನೇಜರ್ ಕೋಡಿ ಮೊಹಮ್ಮದ್ ಇಕ್ಬಾಲ್, ಮಾರ್ಕೆಟಿಂಗ್ ವಿಭಾಗದ ಅಸಿಸ್ಟೆಂಟ್ ಮೇನೇಜರ್ ಪ್ರಫುಲ್ಲ ಪುಷ್ಪರಾಜ್,ಪಿ ಆರ್ ಒ ಬಾಪು ನೈನಾರ್ ಉಪಸ್ಥಿತರಿದ್ದರು.

ಬ್ಯಾರೀಸ್ ಟರ್ನಿಂಗ್ ಪಾಯಿಂಟ್ ರಿಟೈಲ್ ಹೆಡ್ ಕೆ. ನಂದಕುಮಾರ್ ವಂದಿಸಿದರು. ಬ್ಯಾರಿಸ್ ತಾಂತ್ರಿಕ ಮಹಾ ವಿದ್ಯಾಲಯದ ಉಪನ್ಯಾಸಕ ಜಾಯ್ಸನ್ ಮಿರಾಂಡಾ ಕಾರ್ಯಕ್ರಮ ನಿರೂಪಿಸಿದರು.