ಹ್ಯಾರಿ ಟೆಕ್ಟರ್ ಅರ್ಧಶತಕ | ಮೊದಲ ಟಿ20: ಅಫ್ಘಾನಿಸ್ತಾನಕ್ಕೆ ಆಘಾತಕಾರಿ ಸೋಲುಣಿಸಿದ ಐರ್ಲ್ಯಾಂಡ್

ಶಾರ್ಜಾ: ಅಫ್ಘಾನಿಸ್ತಾನ ವಿರುದ್ಧದ ಮೊದಲ ಟಿ20 ಅಂತರರಾಷ್ಟ್ರೀಯ ಪಂದ್ಯದಲ್ಲಿ ಐರ್ಲ್ಯಾಂಡ್ ತಂಡ 38 ರನ್ ಅಂತರದಿಂದ ಜಯ ದಾಖಲಿಸಿದ್ದು, ಈ ಮೂಲಕ ಮೂರು ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

ಪ್ರವಾಸಿ ತಂಡದ ಪರ ಬೆನ್ ವೈಟ್(4-20) ಹಾಗೂ ಜೋಶ್ ಲಿಟಲ್ (3-18)ಬೌಲಿಂಗ್‌ ನಲ್ಲಿ ಮಿಂಚಿದ್ದಾರೆ. ಹ್ಯಾರಿ ಟೆಕ್ಟರ್ ಅಜೇಯ ಅರ್ಧಶತಕ (56 ರನ್, 34 ಎಸೆತ) ಗಳಿಸಿ ಐರ್ಲ್ಯಾಂಡ್ ಗೆ ಆರಂಭಿಕ ಮೇಲುಗೈ ಒದಗಿಸಿದ್ದಾರೆ.

ಶುಕ್ರವಾರ ನಡೆದ ಪಂದ್ಯದಲ್ಲಿ ಗೆಲ್ಲಲು 150 ರನ್ ಗುರಿ ಬೆನ್ನಟ್ಟಿದ ಅಫ್ಘಾನಿಸ್ತಾನ ತಂಡ ಇನಿಂಗ್ಸ್‌ ನ ಮೊದಲ ಎಸೆತದಲ್ಲಿ ಆರಂಭಿಕ ಆಟಗಾರ ರಹಮಾನುಲ್ಲಾ ಗುರ್ಬಾಝ್(0) ವಿಕೆಟನ್ನು ಕಳೆದುಕೊಂಡಿತು. ಗುರ್ಬಾಝ್ರ ಸಹ ಆಟಗಾರ ಸೆದಿಖುಲ್ಲಾ ಅಟಲ್ ಕೂಡ 1 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು.

ಐರ್ಲ್ಯಾಂಡ್ ನ ಎಡಗೈ ವೇಗದ ಬೌಲರ್ ಲಿಟಲ್ ಅವರು ಅಝ್ಮತುಲ್ಲಾ ಒಮರ್ಝೈ(0) ಅವರನ್ನು ಮೊದಲ ಎಸೆತದಲ್ಲಿ ಔಟ್ ಮಾಡಿದರು. ಈ ಮೂಲಕ ಇನಿಂಗ್ಸ್‌ ನ ಎರಡನೇ ಓವರ್ನಲ್ಲಿ ಹ್ಯಾಟ್ರಿಕ್ ಹಾದಿಯಲ್ಲಿದ್ದರು.