4 ಗಂಟೆಗಳಲ್ಲಿ ಎರಡು ಬಾರಿ ಔಟಾದ ವಿಲಿಯಮ್ಸನ್

ಕ್ರೀಸ್‌ನಲ್ಲಿ ಅಂಟಿಕೊಂಡು ಆಡುವುದರಲ್ಲಿ ನಿಷ್ಣಾತರಾಗಿರುವ ಕೇನ್ ವಿಲಿಯಮ್ಸನ್ ಶ್ರೀಲಂಕಾ ವಿರುದ್ಧ 2ನೇ ಟೆಸ್ಟ್‌ನ 3ನೇ ದಿನದಾಟದಲ್ಲಿ ಬ್ಯಾಟಿಂಗ್‌ನಲ್ಲಿ ಭಾರೀ ನಿರಾಶೆಗೊಳಿಸಿದರು.

ಶನಿವಾರ ಗಾಲೆ ಇಂಟರ್‌ನ್ಯಾಶನಲ್ ಸ್ಟೇಡಿಯಮ್‌ನಲ್ಲಿ ನಾಲ್ಕು ಗಂಟೆಗಳಲ್ಲಿ ಎರಡು ಬಾರಿ ವಿಕೆಟ್ ಕೈಚೆಲ್ಲಿದ್ದಾರೆ.

ವಿಲಿಯಮ್ಸನ್ ಬೆಳಗ್ಗೆ 10:25ರ ಸುಮಾರಿಗೆ ಮೊದಲಿಗೆ ಔಟಾದರು. 17ನೇ ಓವರ್‌ನ ಕೊನೆಯ ಎಸೆತದಲ್ಲಿ ಸ್ಪಿನ್ನರ್ ಜಯಸೂರ್ಯ ಅವರು ವಿಲಿಯಮ್ಸನ್ ವಿಕೆಟ್ ಪಡೆದರು. ವಿಲಿಯಮ್ಸನ್ ಮೊದಲ ಇನಿಂಗ್ಸ್‌ನಲ್ಲಿ 53 ಎಸೆತಗಳಲ್ಲಿ ಕೇವಲ 7 ರನ್ ಗಳಿಸಿದರು.

ಕಿವೀಸ್ ಮೊದಲ ಇನಿಂಗ್ಸ್‌ನಲ್ಲಿ 88 ರನ್‌ಗೆ ಸರ್ವಪತನಗೊಂಡ ಕಾರಣ ಫಾಲೋ ಆನ್‌ಗೆ ಒಳಗಾಯಿತು.

ವಿಲಿಯಮ್ಸನ್‌ಗೆ ಮತ್ತೊಮ್ಮೆ ಕ್ರೀಸ್‌ಗೆ ಆಗಮಿಸುವ ಅವಕಾಶ ಲಭಿಸಿತು. 2ನೇ ಇನಿಂಗ್ಸ್‌ನಲ್ಲಿ ಡೆವೊನ್ ಕಾನ್ವೆ ಜೊತೆ 2ನೇ ವಿಕೆಟ್‌ಗೆ 97 ರನ್ ಜೊತೆಯಾಟದಲ್ಲಿ ಭಾಗಿಯಾದರು. ಈ ಇಬ್ಬರ ಜೊತೆಯಾಟವು ಕಿವೀಸ್ ತಂಡ ಇನಿಂಗ್ಸ್ ಸೋಲಿನಿಂದ ಪಾರಾಗುವ ವಿಶ್ವಾಸ ಮೂಡಿಸಿತ್ತು.

ಆದರೆ ಮಧ್ಯಾಹ್ನ 2:15ರ ಸುಮಾರಿಗೆ ವಿಲಿಯಮ್ಸನ್ ಇನಿಂಗ್ಸ್‌ಗೆ ತೆರೆ ಬಿತ್ತು. ಈ ಬಾರಿ ವಿಲಿಯಮ್ಸನ್ ಅವರು 46 ರನ್ ಗಳಿಸಿ ಆಫ್ ಸ್ಪಿನ್ನರ್ ನಿಶಾನ್ ಪೆರಿಸ್‌ಗೆ ವಿಕೆಟ್ ಒಪ್ಪಿಸಿದರು.

ಶ್ರೀಲಂಕಾ ತಂಡಕ್ಕೆ ಸರಣಿ ಗೆಲುವಿಗೆ ಇನ್ನು 5 ವಿಕೆಟ್‌ಗಳ ಅಗತ್ಯವಿದೆ. ಸ್ಪಿನ್ನರ್‌ಗಳಾದ ಜಯಸೂರ್ಯ ಹಾಗೂ ಪೆರಿಸ್ 3ನೇ ದಿನದಾಟದಲ್ಲಿ ಪ್ರಾಬಲ್ಯ ಮೆರೆದಿದ್ದು, ಒಟ್ಟು 13 ವಿಕೆಟ್‌ಗಳು ಪತನಗೊಂಡಿವೆ.

ಸಂಕ್ಷಿಪ್ತ ಸ್ಕೋರ್

ಶ್ರೀಲಂಕಾ ಮೊದಲ ಇನಿಂಗ್ಸ್: 602/5 ಡಿಕ್ಲೇರ್

ನ್ಯೂಝಿಲ್ಯಾಂಡ್ ಮೊದಲ ಇನಿಂಗ್ಸ್: 88 ರನ್‌ಗೆ ಆಲೌಟ್

ನ್ಯೂಝಿಲ್ಯಾಂಡ್ 2ನೇ ಇನಿಂಗ್ಸ್: 199/5

(ಡೆವೊನ್ ಕಾನ್ವೆ 61, ಬ್ಲಂಡೆಲ್ ಔಟಾಗದೆ 47, ಕೇನ್ ವಿಲಿಯಮ್ಸನ್ 46,ಫಿಲಿಪ್ಸ್ ಔಟಾಗದೆ 32, ನಿಶಾನ್ ಪೆರಿಸ್ 3-91)