'ಎಟಿಎಮ್' ಚಿತ್ರದ ಆಡಿಯೋ ಬಿಡುಗಡೆ
ಎಟಿಎಮ್ ಅಂದರೆ 'ಅಟೆಂಪ್ಟ್ ಟು ಮರ್ಡರ್' ಎನ್ನುವುದು ನಿರ್ದೇಶಕ ಅಭಿಪ್ರಾಯ. ಚಿತ್ರದ ಹಾಡುಗಳ ಆಡಿಯೋ ಸಿಡಿ ಬಿಡುಗಡೆ ಕಾರ್ಯಕ್ರಮವನ್ನು ರಾಕಿಂಗ್ ಸ್ಟಾರ್ ಯಶ್ ನೆರವೇರಿಸಿದರು.
"ಎಟಿಎಮ್ ನೊಳಗೆ ಮಹಿಳೆಯೊಬ್ಬರ ಮೇಲೆ ನಡೆಸಲಾದ ಹಲ್ಲೆ ನನ್ನನ್ನು ತುಂಬ ಕಾಡಿದ ಘಟನೆ. ಆ ಘಟನೆಯನ್ನು ಆಧರಿಸಿದ ಚಿತ್ರದಲ್ಲಾದರೂ ಆತನಿಗೆ ಶಿಕ್ಷೆಯಾಗುತ್ತಿದೆ ಎನ್ನುವುದು ಸಂತೋಷ" ಎಂದರು ನಟ ಯಶ್. ಚಿತ್ರದ ನಿರ್ದೇಶಕ ಅಮರ್ ಹೇಳುವಂತೆ ಅವರಿಗೆ ಥ್ರಿಲ್ಲರ್ ಸಬ್ಜೆಕ್ಟ್ ಆರಂಭದಿಂದಲೂ ಇಷ್ಟವಂತೆ. ಆದರೆ ಸಿನಿಮಾದಲ್ಲಿ ಪ್ರೀತಿ ಕೂಡ ಬೇಕು ಎಂಬ ಕಾರಣಕ್ಕೆ ಅಂಥದೊಂದು ಕತೆ ಮಾಡಿರುವುದಾಗಿ ಹೇಳಿದರು.
ನಿರ್ಮಾಪಕ ಎಸ್ ವಿ ನಾರಾಯಣ್ ಗೆ ಸಬ್ಜೆಕ್ಟ್ ರಿಯಲ್ ಸ್ಟೋರಿ ಆಗಿರುವುದರಿಂದ ಅದೇ ಚಿತ್ರ ನಿರ್ಮಿಸುವ ಧೈರ್ಯ ನೀಡಿತಂತೆ. ಚಿತ್ರದಲ್ಲಿ ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿರುವ ನಾಯಕ, ಇನ್ವಸ್ಟಿಗೇಟಿವ್ ಪತ್ರಕರ್ತೆಯ ಪಾತ್ರದಲ್ಲಿರುವ ಕಿರುತೆರೆಯ ಖ್ಯಾತ ನಿರೂಪಕಿ ಹೇಮಾ, ಬ್ರಹ್ಮಗಂಟು ಧಾರಾವಾಹಿಯ ನಾಯಕಿ ಶೋಭಿತಾ ಮಾತನಾಡಿ ಚಿತ್ರದಲ್ಲಿನ ತಮ್ಮ ಪಾತ್ರಗಳ ಬಗ್ಗೆ ಖುಷಿ ವ್ಯಕ್ತಪಡಿಸಿದರು. ಸಂಗೀತ ನಿರ್ದೇಶಕ ರವಿದೇವ್ ಮತ್ತು ಜೀತ್ ಸಿಂಗ್, ಗಾಯಕಿ ಸುಪ್ರಿಯಾ ಲೋಹಿತ್ ಮೊದಲಾದವರು ಉಪಸ್ಥಿತರಿದ್ದರು.
