ವಸ್ತುಸ್ಥಿತಿಯ ಉದ್ದೇಶಪೂರ್ವಕ ನಿರಾಕರಣೆ

ಕೇಂದ್ರೀಯ ಅಂಕಿಅಂಶ ಇಲಾಖೆಯು ದೇಶದ ರಾಷ್ಟ್ರೀಯ ಆದಾಯದ ಬಗ್ಗೆ ಇತ್ತೀಚೆಗೆ ಬಿಡುಗಡೆ ಮಾಡಿರುವ ದತ್ತಾಂಶಗಳು ಭಾರತದ ಆರ್ಥಿಕತೆಯು ರೋಗಗ್ರಸ್ತವಾಗಿದೆಯೆಂಬುದನ್ನು ಮತ್ತೊಮ್ಮೆ ಸಾಬೀತುಮಾಡಿದೆ. 2017-18ರ ಎರಡನೇ ತ್ರೈಮಾಸಿಕದಲ್ಲಿ ಭಾರತದ ಜಿಡಿಪಿ(ಒಟ್ಟಾರೆ ಆಂತರಿಕ ಅಭಿವೃದ್ಧಿ)ಯು 2016-17ರ ಎರಡನೇ ತ್ರೈಮಾಸಿಕಕ್ಕಿಂತ ಶೇ.6.3ರಷ್ಟು ಅಭಿವೃದ್ಧಿಯನ್ನು ದಾಖಲಿಸಿದೆ. ಸರಕಾರದ ಪ್ರಕಾರ ಈ ಅಂಕಿಅಂಶವು ಭಾರತದ ಆರ್ಥಿಕತೆ ಚೇತರಿಸಿಕೊಳ್ಳುತ್ತಿದೆ ಎಂಬುದನ್ನು ಸೂಚಿಸುತ್ತದೆ. ಸರಕಾರವು ಹೇಳುತ್ತಿರುವುದು ಮತ್ತು ಬಿಸಿನೆಸ್ ಪತ್ರಿಕೆಗಳು ಗಿಣಿಪಾಠ ಒಪ್ಪಿಸುತ್ತಿರುವುದೇನೆಂದರೆ: 2016ರ ಜನವರಿ-ಮಾರ್ಚ್ ತ್ರೈಮಾಸಿಕದಲ್ಲಿ ಜಿಡಿಪಿ ದರವು ಶೇ.9.1ರಷ್ಟು ಬೆಳವಣಿಗೆ ಯಾಗಿತ್ತು.

ಆದರೆ ಆ ನಂತರದಲ್ಲಿ ಪ್ರತೀ ತ್ರೈಮಾಸಿಕದ ಬೆಳವಣಿಗೆ ದರ ಅದರ ಹಿಂದಿನ ವರ್ಷದ ತ್ರೈಮಾಸಿಕದ ದರಕ್ಕೆ ಹೋಲಿಸಿದಲ್ಲಿ ಕಡಿಮೆಯಾಗುತ್ತಲೇ ಬರುತ್ತಿತ್ತು. ಆದರೆ 2017ರ ಜುಲೈ-ಸೆಪ್ಟಂಬರ್‌ನ ಬೆಳವಣಿಗೆ ದರವು ಹಿಂದಿನ ವರ್ಷದ ದರಕ್ಕಿಂತ ಹೆಚ್ಚಿದೆ. ಅವರ ಪ್ರಕಾರ ಇದು ಆರ್ಥಿಕ ಕುಸಿತವು ತಡೆಯಲ್ಪಟ್ಟಿದ್ದರ ಸಂಕೇತವಾಗಿದೆ. ದುರದೃಷ್ಟವಶಾತ್ ಇದು ಸರಿಯಾದ ತಿಳವಳಿಕೆಯಲ್ಲ. ಒಂದು ತ್ರೈಮಾಸಿಕದ ಅಭಿವೃದ್ಧಿ ದರವನ್ನು ಹಿಂದಿನ ವರ್ಷಗಳ ಅದೇ ತ್ರೈಮಾಸಿಕಕ್ಕೆ ಹೋಲಿಸುವುದು ಸರಿಯಾದ ಪದ್ಧತಿ. ಏಕೆಂದರೆ ಆರ್ಥಿಕ ಬೆಳವಣಿಗೆಯು ಒಂದು ನಿರ್ದಿಷ್ಟ ವರ್ತುಲವನ್ನು ಪಾಲಿಸುತ್ತದೆ. ಈ ರೀತಿ ನೋಡಿದಾಗ 2011-12ರಿಂದ ಆರಂಭಗೊಂಡಿರುವ ರಾಷ್ಟ್ರೀಯ ಲೆಕ್ಕಾಚಾರಗಳ ಅಂಕಿಅಂಶದ ಹೊಸ ಸರಣಿಯಂತೆ 2012-13ರ ನಂತರದ ವರ್ಷಗಳ ತ್ರೈಮಾಸಿಕದ ಬೆಳವಣಿಗೆ ದರಗಳಿಗೆ ಹೋಲಿಸಿದಲ್ಲಿ 2017-18ರ ಎರಡನೇ ತ್ರೈಮಾಸಿಕದ ಅಭಿವೃದ್ಧಿ ದರ ಅತ್ಯಂತ ಕನಿಷ್ಠವಾಗಿದೆ. ಭಾರತದ ಆರ್ಥಿಕ ವ್ಯವಸ್ಥೆಯ ಆರೋಗ್ಯ ತೀವ್ರವಾಗಿ ಹದಗೆಟ್ಟಿದೆ. ಆದರೂ ಭಾರತದ ಆರ್ಥಿಕತೆ ಚೇತರಿಸಿಕೊಂಡಿದೆ ಎಂಬ ಸರಕಾರದ ಪೊಳ್ಳು ಕಥನವು ಸರಕಾರವು ವಸ್ತುಸ್ಥಿತಿಯನ್ನು ಉದ್ದೇಶಪೂರ್ವಕವಾಗಿ ನಿರಾಕರಿಸುತ್ತಿದೆ ಎಂಬುದನ್ನಷ್ಟೇ ಸೂಚಿಸುತ್ತದೆ. ಈ ಹೊಸ ಲೆಕ್ಕಾಚಾರಗಳ ಸರಣಿಯ ಪ್ರಕಾರ ರಾಷ್ಟ್ರೀಯ ಅಭಿವೃದ್ಧಿ ದರವು ಎರಡನೇ ತ್ರೈಮಾಸಿಕದಲ್ಲಿ ಹಿಂದಿನ ವರ್ಷಕ್ಕಿಂತ ಹೆಚ್ಚಿನ ಅಭಿವೃದ್ಧಿಯನ್ನು ಸಾಧಿಸುತ್ತದೆ. ಉಳಿದ ತ್ರೈಮಾಸಿಕಗಳಿಗೆ ಹೋಲಿಸಿದಲ್ಲಿ ಸಾಮಾನ್ಯವಾಗಿ ಎರಡನೇ ತ್ರೈಮಾಸಿಕವು ಶೇ.1ರಷ್ಟು ಹೆಚ್ಚಿನ ಅಭಿವೃದ್ಧಿಯನ್ನು ದಾಖಲಿಸುತ್ತದೆ.

2015-16ರ ಕೊನೆಯ ತ್ರೈಮಾಸಿಕ ಹಾಗೂ 2016-17ರ ಮೊದಲ ತ್ರೈಮಾಸಿಕಗಳಲ್ಲಿ ಉಳಿದ ತ್ರೈಮಾಸಿಕಗಳ ಅಭಿವೃದ್ಧಿಗಿಂತ ಹೆಚ್ಚಿನ ಅಭಿವೃದ್ಧಿಯನ್ನು ದಾಖಲಿಸಿತ್ತು. ಆದರೆ ಅದೊಂದು ಅಪವಾದ. ಸಾರ್ವತ್ರಿಕ ಧೋರಣೆಯನ್ನು ಗಮನಿಸಿದಲ್ಲಿ ಈ ವರ್ಷದ ವಾರ್ಷಿಕ ಅಭಿವೃದ್ಧಿ ದರವು ಶೇ. 6.3ಕ್ಕಿಂತ ಹೆಚ್ಚಾಗುವ ಸಂಭವವಿಲ್ಲ. ಹೊಸ ಅಂದಾಜುಗಳ ಪ್ರಕಾರ ವಾರ್ಷಿಕ ಜಿಡಿಪಿ ದರದ ಅಭಿವೃದ್ಧಿಯು 2016-17ರಲ್ಲಿ ಶೇ.7.1ರಷ್ಟಿತ್ತು. ಮತ್ತು 2015-16ರಲ್ಲಿ ಶೇ.8ರಷ್ಟಿತ್ತು. ಹಾಗೆಯೇ, ಹೊಸ ಸರಣಿಯ ಲೆಕ್ಕಾಚಾರದಲ್ಲಿ ಅರ್ಧ ವಾರ್ಷಿಕ ಅಭಿವೃದ್ಧಿ ದರಗಳನ್ನು ಹೋಲಿಸಿ ನೋಡಿದಲ್ಲಿ, 2015-16ನ್ನು ಹೊರತುಪಡಿಸಿದರೆ ಮಿಕ್ಕೆಲ್ಲ ವರ್ಷಗಳಲ್ಲಿ ಮೊದಲ ವರ್ಷಾರ್ಧದಲ್ಲೇ ಶೇ.1 ರಷ್ಟು ಹೆಚ್ಚಿನ ಅಭಿವೃದ್ಧಿ ದರ ದಾಖಲಾಗುತ್ತಾ ಬಂದಿದೆ. ಆ ಲೆಕ್ಕದಲ್ಲೂ ಈ ಸಾಲಿನ ಅರ್ಧ ವಾರ್ಷಿಕದಲ್ಲೇ ಶೇ.6ರಷ್ಟು ಅಭಿವೃದ್ಧಿ ದರ ದಾಖಲಾಗಿದ್ದು ಇದು 2012-13ರ ನಂತರದ ಯಾವುದೇ ಅರ್ಧ ವಾರ್ಷಿಕ ಅಭಿವೃದ್ಧಿ ದರಗಳಿಗಿಂತ ತೀರಾ ಕಡಿಮೆಯಾಗಿದೆ. ಈ ಪ್ರವೃತ್ತಿಯನ್ನು ಗಮನಿಸಿದಲ್ಲಿ ಈ ಸಾಲಿನ ಅಭಿವೃದ್ಧಿ ದರವು ಶೇ.6 ಅಥವಾ ಅದಕ್ಕಿಂತ ಕಡಿಮೆಯೇ ಇರಲಿದೆ.

ಇದು ಕಳೆದ ಎಲ್ಲಾ ವರ್ಷಗಳಿಗಿಂತ ಅತ್ಯಂತ ಕಡಿಮೆಯಾಗಿದೆ. ಮೂಲದರದಲ್ಲಿ ಲೆಕ್ಕ ಮಾಡುವ ಗ್ರಾಸ್ ವ್ಯಾಲ್ಯೂ ಆಡೆಡ್-ಜಿವಿಎ(ತೆರಿಗೆಗಳನ್ನು ಹೊರತುಪಡಿಸಿ ಲೆಕ್ಕ ಹಾಕುವ ಒಟ್ಟಾರೆ ಅಭಿವೃದ್ಧಿಯ ಮೌಲ್ಯ) ವಿಷಯದಲ್ಲೂ ಸರಕಾರ ಇದೇ ಬಗೆಯ ವಾದಗಳನ್ನು ಮುಂದಿಟ್ಟಿತ್ತು. ಸರಕಾರದ ಪ್ರಕಾರ ಉತ್ಪಾದನಾ ಕ್ಷೇತ್ರದ ಅಭಿವೃದ್ಧಿ 2017-18ರ ಮೊದಲ ತ್ರೈಮಾಸಿಕದಲ್ಲಿ ಕೇವಲ ಶೇ.1.2ರಷ್ಟು ಮಾತ್ರ ಆಗಿದ್ದರೂ ಎರಡನೇ ತ್ರೈಮಾಸಿಕದಲ್ಲಿ ದಾಖಲೆ ಮಟ್ಟದಲ್ಲಿ ಚೇತರಿಸಿಕೊಂಡು 7.2ರಷ್ಟು ಬೆಳವಣಿಗೆಯನ್ನು ದಾಖಲಿಸಿದೆ. ಆದರೆ ವಾಸ್ತವವೇನೆಂದರೆ ಕಳೆದ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಇದೇ ವಲಯದಲ್ಲಿ ಶೇ.7.7ರಷ್ಟು ಅಭಿವೃದ್ಧಿ ದಾಖಲೆಯಾಗಿತ್ತು. ಕೈಗಾರಿಕಾ ಉತ್ಪನ್ನಗಳ ಸೂಚ್ಯಂಕವೂ ಕೂಡಾ ತೋರಿಸಿಕೊಡುವಂತೆ ಕಳೆದ ವರ್ಷದ ಎರಡನೇ ತ್ರೈಮಾಸಿಕದಲ್ಲಿ ಉತ್ಪಾದನಾ ರಂಗವು ಶೇ.5.5ರಷ್ಟು ಅಭಿವೃದ್ಧಿಯಾಗಿದ್ದರೆ ಈ ವರ್ಷ ಕೇವಲ ಶೇ.2.2ರಷ್ಟು ಅಭಿವೃದ್ಧಿಯನ್ನು ಮಾತ್ರ ದಾಖಲಿಸಿದೆ. ಇಲ್ಲೂ ಕೂಡಾ ಉತ್ಪಾದಕ ವಲಯದಲ್ಲಿ ಸರಕಾರವು ಹೇಳಿಕೊಳ್ಳುವಂತಹ ಚೇತರಿಕೆ ಕಂಡುಬರದೆ ಇಳಿಕೆಯೇ ದಾಖಲಾಗಿದೆ.

ಹಾಗೆಯೇ, ಹಣಕಾಸು, ರಿಯಲ್ ಎಸ್ಟೇಟ್ ಮತ್ತು ವೃತ್ತಿಪರ ಸೇವೆಗಳ ಜಿವಿಎನಲ್ಲಿ ಶೇ.5.7ರಷ್ಟು ಮತ್ತು ಕೃಷಿ ಕ್ಷೇತ್ರದಲ್ಲಿ ಶೇ.1.7ರಷ್ಟು ಅಭಿವೃದ್ಧಿ ಸಾಧಿಸಲಾಗಿದೆ ಎಂದು ಸರಕಾರವು ಹೇಳಿಕೊಳ್ಳುತ್ತಿದೆ. ಆದರೆ ಹೊಸ ಸರಣಿಯ ಅಂಕಿಅಂಶಗಳ ಪ್ರಕಾರ ಈ ಎಲ್ಲಾ ಅಂಕಿಅಂಶಗಳು ಕಳೆದ ವರ್ಷಗಳ ಎರಡನೇ ತ್ರೈಮಾಸಿಕದ ಬೆಳವಣಿಗೆಗಳಿಗೆ ಹೋಲಿಸಿದಲ್ಲಿ ಕನಿಷ್ಠ ಬೆಳವಣಿಗೆಯೇ ಆಗಿದೆ. ಈ ಎಲ್ಲಾ ವಲಯಗಳು ಒಟ್ಟುಸೇರಿದರೆೆ ದೇಶದ ಜಿವಿಎದ ಶೇ.55ರಷ್ಟಾಗುತ್ತದೆ. ಉಳಿದ ವರ್ಷಗಳ ಎರಡನೇ ತ್ರೈಮಾಸಿಕಗಳಿಗೆ ಹೋಲಿಸಿದಲ್ಲಿ ಈ ವರ್ಷದ ತ್ರೈಮಾಸಿಕದಲ್ಲಿ ಗಣಿಗಾರಿಕೆ, ವಿದ್ಯುತ್, ವಾಣಿಜ್ಯ, ಹೋಟೆಲ್ ಮತ್ತು ಸಂಪರ್ಕಕ್ಷೇತ್ರಗಳಿಂದ ಸಂಚಯವಾಗುವ ಜಿವಿಎ ಹೆಚ್ಚಾಗಿದೆ. ಆದರೆ ನಿರ್ಮಾಣ ಮತ್ತು ಸಾರ್ವಜನಿಕ ಆಡಳಿತ ಕ್ಷೇತ್ರಗಳಲ್ಲಿ ಕುಸಿತ ಕಂಡಿದೆ. ಹೀಗಾಗಿ ಆರ್ಥಿಕತೆಯಲ್ಲಿ ವಿಸ್ತೃತವಾದ ಚೇತರಿಕೆ ಉಂಟಾಗಿರುವ ಯಾವ ಸೂಚನೆಗಳನ್ನೂ ಈ ಅಂಕಿಅಂಶಗಳು ನೀಡುತ್ತಿಲ್ಲ. ಅದಕ್ಕೆ ತದ್ವಿರುದ್ಧವಾಗಿ ಆರ್ಥಿಕತೆಯು ದುರ್ಬಲವಾಗುತ್ತಿರುವುದಕ್ಕೆ ವಿಪುಲವಾದ ಪುರಾವೆಗಳು ಲಭ್ಯವಿವೆ. ಹೂಡಿಕೆಯ ವಾತಾವರಣದಲ್ಲೂ ಯಾವುದೇ ಸುಧಾರಣೆಯಾಗಿಲ್ಲ.

ಕಳೆದ ವರ್ಷದ ಇದೇ ತ್ರೈಮಾಸಿಕದಲ್ಲಿ ಹೂಡಿಕೆಯ (ಗ್ರಾಸ್ ಫಿಕ್ಸೆಡ್ ಕ್ಯಪಿಟಲ್ ಫಾರ್ಮೇಷನ್- ಒಟ್ಟಾರೆ ಮೀಸಲು ಬಂಡವಾಳ ಶೇಖರಣೆ) ದರ ಅಭಿವೃದ್ಧಿಯು ಶೇ.3ರಷ್ಟಿದ್ದರೆ ಈ ವರ್ಷ 4.7ರಷ್ಟಾಗಿದೆ. ಆದರೆ 2011-12ರಲ್ಲಿ ಈ ಹೂಡಿಕೆ ಬಂಡವಾಳದ ಪ್ರಮಾಣ ಜಿಡಿಪಿಯ ಶೇ.35.6ರಷ್ಟಿತ್ತು. ಅದು ನಿರಂತರವಾಗಿ ಕುಸಿಯುತ್ತಲೇ ಬಂದು 2017-18ರ ಎರಡನೇ ತ್ರೈಮಾಸಿಕದಲ್ಲಿ ಶೇ.28.8ಕ್ಕೆ ಬಂದು ತಲುಪಿದೆ. ಈ ಹಿನ್ನೆಲೆಯಲ್ಲಿ ನೋಡಿದರೆ ಈ ವರ್ಷದಲ್ಲಿ ಹೂಡಿಕೆಯ ಶೇಖರಣೆ ಹೆಚ್ಚಾಗಿರುವುದಕ್ಕೆ ಹೆಚ್ಚಿನ ಅರ್ಥವೇನು ಇರುವುದಿಲ್ಲ. 2016-17ರ ಎರಡನೇ ತ್ರೈಮಾಸಿಕದಲ್ಲೇ ಭಾರತದ ಆರ್ಥಿಕತೆಯು ಕುಸಿತದ ಸೂಚನೆಗಳನ್ನು ಕೊಟ್ಟಿತ್ತು.

ಅದು 2016-17ರ ಮೂರನೇ ತ್ರೈಮಾಸಿಕದಲ್ಲಿ ಘೋಷಿಸಲಾದ ನೋಟು ನಿಷೇಧ ಕ್ರಮದಿಂದ ಮತ್ತು 2017ರ ಜುಲೈ 1ರಿಂದ ಜಾರಿಗೆ ತರಲಾದ ಜಿಎಸ್‌ಟಿ ಪದ್ಧತಿಯಿಂದಾಗಿ ಇನ್ನಷ್ಟು ತೀವ್ರವಾಗಿ ಹದಗೆಟ್ಟಿತು. ಈ ಎರಡು ಆರ್ಥಿಕ ಕ್ರಮಗಳು ಆರ್ಥಿಕ ಚಟುವಟಿಕೆಗಳನ್ನು ಅದರಲ್ಲೂ ಹೆಚ್ಚಾಗಿ ಅನೌಪಚಾರಿಕ ಕ್ಷೇತ್ರದ ಆರ್ಥಿಕತೆಯನ್ನು ತೀವ್ರವಾಗಿ ಪ್ರಭಾವಿಸಿದೆಯೆಂಬುದನ್ನು ಅಭಿವೃದ್ಧಿಗೆ ಸಂಬಂಧಪಟ್ಟ ಈ ಅಂಕಿಅಂಶಗಳು ಮತ್ತೊಮ್ಮೆ ರುಜುವಾತುಪಡಿಸುತ್ತಿವೆ. ಹೀಗಾಗಿ ಆರ್ಥಿಕತೆಯು ರೋಗಗ್ರಸ್ಥವಾಗಿದೆಯೆಂಬುದು ಸ್ಪಷ್ಟವಾಗಿದೆ. ಈಗಲಾದರೂ ಸರಕಾರವು ತನ್ನ ಅವಿವೇಕದ ಆರ್ಥಿಕ ಕ್ರಮಗಳು ಮತ್ತು ಅದು ಉಂಟುಮಾಡಿರುವ ಅಪಾಕಾರಿ ಪರಿಣಾಮಗಳ ಬಗ್ಗೆ ಕೊಂಚವಾದರೂ ಹಿಂದಿರುಗಿ ನೋಡಿಕೊಳ್ಳಬೇಕಿದೆ.

ಕೃಪೆ: Economic and Political Weekly