2020ಗೆ ಏರ್ಪೋರ್ಟ್ ಟರ್ಮಿನಲ್ ವಿಸ್ತರಣಾ ಕಾಮಗಾರಿ ಪೂರ್ಣ: ಎಸ್. ಶ್ರೀಕುಮಾರ್
ಶೀಘ್ರವೇ ವಿಶ್ವದ ‘ಟಾಪ್ 10’ರಲ್ಲಿ ಮಂಗಳೂರು ವಿಮಾನ ನಿಲ್ದಾಣ
ಮಂಗಳೂರು, ಸೆ.14: ಮಂಗಳೂರಿನ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್ ಕಟ್ಟಡ ವಿಸ್ತರಣಾ ಕಾಮಗಾರಿ 2020ರ ಮಾರ್ಚ್ಗೆ ಪೂರ್ಣಗೊಳ್ಳಲಿದೆ ಎಂದು ವಿಮಾನ ಅಭಿವೃದ್ಧಿ ಪ್ರಾಧಿಕಾರದ ದಕ್ಷಿಣ ವಿಭಾಗದ ಪ್ರಾದೇಶಿಕ ನಿರ್ದೇಶಕ ಎಸ್. ಶ್ರೀಕುಮಾರ್ ತಿಳಿಸಿದರು.
ಮಂಗಳೂರು ವಿಮಾನ ನಿಲ್ದಾಣದ ಸಭಾಂಗಣದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಅವರು ಈ ಬಗ್ಗೆ ಮಾಹಿತಿ ನೀಡಿದರು. 132.24 ಕೋಟಿ ರೂ. ವೆಚ್ಚದಲ್ಲಿ 10000 ಚದರ ಮೀಟರ್ ಪ್ರದೇಶದ ಟರ್ಮಿನಲ್ ನಿರ್ಮಾಣವಾಗಲಿದ್ದು, ಇದು ಅಂತಾರಾಷ್ಟ್ರೀಯ ವಿಮಾನಗಳ ಪ್ರಯಾಣಿಕರ ಆಗಮನ ಮತ್ತು ನಿರ್ಗಮನಕ್ಕೆ ಪ್ರತ್ಯೇಕ ವ್ಯವಸ್ಥೆಯನ್ನು ಕಲ್ಪಿಸಲಿದೆ. ಪ್ರಸಕ್ತ ಇರುವ ಸಭಾಂಗಣದಲ್ಲಿ ವಿಮಾನ ಆಗಮಿಸಿದಾಗ 250 ಹಾಗೂ ಹೊಸ ಸಭಾಂಗಣದಲ್ಲಿ 500 ಮಂದಿ ಪ್ರಯಾಣಿಕರ ಸಾಮರ್ಥ್ಯವನ್ನು ಹೊಂದಲಿದೆ. ಪ್ರಸ್ತುತ 28000 ಚದರ ಮೀಟರ್ನ ಟರ್ಮಿನಲ್ ಇದ್ದು, ವಿಸ್ತರಣೆಯಿಂದ ಒಟ್ಟು 38000 ಚದರ ಮೀಟರ್ ಟರ್ಮಿನಲನ್ನು ವಿಮಾನ ನಿಲ್ದಾಣವು ಹೊಂದಲಿದೆ ಎಂದು ಅವರು ಹೇಳಿದರು.
ರನ್ವೇಯ ಸುರಕ್ಷಾ ಮೂಲ ವಲಯ (ಸೇಫ್ಟಿ ಬೇಸಿಕ್ ಸ್ಟ್ರಿಪ್)ದ ವಿಸ್ತರಣೆ ಮತ್ತು ದ್ವಿತೀಯ ಹಂತದ ಟ್ಯಾಕ್ಸಿ ಟ್ರಾಕ್ನ 121 ಕೋಟಿ ರೂ.ಗಳ ಯೋಜನೆಯನ್ನು ಕೈಗೆತ್ತಿಕೊಳ್ಳಲಾಗಿದ್ದು, ಇದು 2019ರ ಆಗಸ್ಟ್ಗೆ ಪೂರ್ಣಗೊಳ್ಳಲಿದೆ ಎಂದು ಅವರು ಈ ಸಂದರ್ಭ ತಿಳಿಸಿದರು.
ಅಂತಾರಾಷ್ಟ್ರೀಯ ಮಟ್ಟದ ವಿಮಾನಗಳ ನಿರ್ವಹಣೆಯ ಸುರಕ್ಷತೆಗಾಗಿ ಈ ಸೇಫ್ಟಿ ಬೇಸಿಕ್ ಸ್ಟ್ರಿಪ್ನ ವಿಸ್ತರಣೆ ಕಾಮಗಾರಿ ನಡೆಯಲಿದೆ. ಪ್ರಸ್ತುತ ರನ್ವೇಯು ಗಂಟೆಗೆ 10 ವಿಮಾನಗಳ ನಿರ್ವಹಣಾ ಸಾಮರ್ಥ್ಯವನ್ನು ಹೊಂದಿದ್ದು, ಇದೀಗ ವಿಸ್ತರಣೆಯಿಂದ ಗಂಟೆಗೆ 20 ವಿಮಾನಗಳ ನಿರ್ವಹಣಾ ಸಾಮರ್ಥ್ಯವನ್ನು ರನ್ವೇ ಹೊಂದಲಿದೆ ಎಂದು ಅವರು ಹೇಳಿದರು.
ವಿಮಾನ ಪಾರ್ಕಿಂಗ್ ಬೇ ವಿಸ್ತರಣೆಯನ್ನು 7 ಕೋಟಿ ರೂ. ವೆಚ್ಚದಲ್ಲಿ ಕೈಗೆತ್ತಿಕೊಳ್ಳಲಾಗಿದ್ದು, ಇದು 2019ರ ಸೆಪ್ಟಂಬರ್ಗೆ ಪೂರ್ಣಗೊಳ್ಳಲಿದೆ ಎಂದು ಅವರು ಹೇಳಿದರು.
ಸಿಎಸ್ಆರ್ನಡಿ ವಿವಿಧ ಯೋಜನೆಗಳು
ಮಂಗಳೂರು ವಿಮಾನ ನಿಲ್ದಾಣವು ಸಿಎಸ್ಆರ್ (ಕಾರ್ಪೊರೇಟ್ ಸಾಮಾಜಿಕ ಜವಾಬ್ಧಾರಿ) ನಿಧಿಯಡಿ ಮಳವೂರಿನಲ್ಲಿ 6.75 ಕೋಟಿ ರೂ. ವೆಚ್ಚದಲ್ಲಿ ಶಾಶ್ವತ ಒಳಚರಂಡಿ ವ್ಯವಸ್ಥೆಗೆ ಒಪ್ಪಂದ ಮಾಡಿಕೊಂಡಿದೆ. ಇದಲ್ಲದೆ, ಮಳವೂರಿನಲ್ಲಿ 14 ಲಕ್ಷ ರೂ. ವೆಚ್ಚದಲ್ಲಿ ಅಂಗವಾಡಿ ಕಟ್ಟಡ ನಿರ್ಮಾಣವನ್ನು ಮಾಡಲಾಗಿದೆ ಎಂದು ಅವರು ಹೇಳಿದರು.
ಗೋಷ್ಠಿಯಲ್ಲಿ ಮಂಗಳೂರು ವಿಮಾನ ನಿಲ್ದಾಣ ಪ್ರಾಧಿಕಾದ ನಿದೇಶರ್ಕ ವಿ.ವಿ. ರಾವ್ ಉಪಸ್ಥಿತರಿದ್ದರು.
ಶೀಘ್ರವೇ ವಿಶ್ವದ ‘ಟಾಪ್ 10’ರಲ್ಲಿ ಮಂಗಳೂರು ವಿಮಾನ ನಿಲ್ದಾಣ
ಸ್ವಚ್ಛ ಭಾರತದಡಿ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ದೇಶದಲ್ಲಿ ಮೊದಲ ಸ್ಥಾನ ಪಡೆದಿದ್ದು, ರೇಟಿಂಗ್ನಲ್ಲಿ 2ನೇ ಸ್ಥಾನ ಪಡೆದಿದೆ. ದೇಶದಲ್ಲಿ ಈ ಸ್ಥಾನವನ್ನು ಮೊದಲ ಸ್ಥಾನಕ್ಕೇರಿಸುವುದು ನಮ್ಮ ಗುರಿ. ವಿಶ್ವ ಮಟ್ಟದಲ್ಲಿ ಪ್ರಸ್ತುತ 30ನೇ ರೇಟಿಂಗ್ ಹೊಂದಿದ್ದು, ಇದನ್ನು 10ರ ಒಳಗೆ ತರುವ ಗುರಿ ನಮ್ಮ ಮುಂದಿದೆ ಎಂದು ಶ್ರೀಕುಮಾರ್ ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಟರ್ಮಿಲ್ ಕಟ್ಟದ ಶೌಚಾಲಯಲಗಳನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಂಪೂರ್ಣವಾಗಿ ನವೀಕರಣಕ್ಕೆ ಸಿದ್ಧತೆ ನಡೆಸಲಾ ಗಿದೆ. ಸೆಕ್ಯುರಿಟಿ ಹೋಲ್ಡ್ ಏರಿಯಾದ ವಿಸ್ತರಣೆ, ಕಲಾತ್ಮಕ ಫಾಲ್ ಸೀಲಿಂಗ್ ಮೊದಲಾದ ಕಾಮಗಾರಿಗಳು ಸೇರಿದಂತೆ ಒಟ್ಟು 7.50 ಕೋಟಿ ರೂ. ಯೋಜನಾ ವೆಚ್ಚದಲ್ಲಿ ಟರ್ಮಿನಲ್ ಬಿಲ್ಡಿಂಗ್ನ ನವೀಕರಣ ಕಾಮಗಾರಿ ನಡೆಯುತ್ತಿದ್ದು, ಮುಂದಿನ 8 ತಿಂಗಳಲ್ಲಿ ಕಾಮಗಾರಿ ಪೂರ್ಣ ಗೊಳ್ಳಲಿದೆ ಎಂದು ಎಸ್. ಶ್ರೀಕುಮಾರ್ ತಿಳಿಸಿದರು.
ಸ್ಥಳೀಯ ಕಲೆ ಮತ್ತು ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ಕಾರ್ಯ ವಿಮಾನ ನಿಲ್ದಾಣದಲ್ಲಿ ನಡೆಯುತ್ತಿದ್ದು, ಗುತ್ತು ಮಾದರಿಯ ಪಿಲ್ಲರ್ಗಳು, ಹುಲಿ ನೃತ್ಯ, ಯಕ್ಷಗಾನ ವೇಷಗಳನ್ನು ಪ್ರತಿಬಿಂಬಿಸುವ ಕಲಾತ್ಮಕ ಕಾಮಗಾರಿಗಳನ್ನು ವಿಮಾನ ನಿಲ್ದಾಣದಲ್ಲಿ ಮಾಡಲಾಗುತ್ತಿದೆ ಎಂದು ಅವರು ಹೇಳಿದರು.