ಬೆಳ್ತಂಗಡಿ ಆಸ್ಪತ್ರೆಯಲ್ಲಿ ಸ್ವಚ್ಚತಾ ಕಾರ್ಯಕ್ರಮ: ಶಾಸಕ ವಿರುದ್ಧ ಕಿಡಿಕಾರಿದ ಮಹೇಶ್ ಶೆಟ್ಟಿ ತಿಮರೋಡಿ
ಬೆಳ್ತಂಗಡಿ, ಅ. 2: ಬೆಳ್ತಂಗಡಿಯ ಸರಕಾರಿ ಆಸ್ಪತ್ರೆಯಲ್ಲಿ ಸಂಘಟನೆಯೊಂದು ಏರ್ಪಡಿಸಲಾಗಿದ್ದ ಸ್ವಚ್ಚತಾ ಕಾರ್ಯಕ್ರಮದಲ್ಲಿ ಸಂಘಟಕರಿಗೆ ಗೊತ್ತಿಲ್ಲದೆ ಆಸ್ಪತ್ರೆಯವರು ಶಾಸಕರನ್ನು ಆಹ್ವಾನಿಸಿದ್ದಾರೆ ಎಂದು ಆಸ್ಪತ್ರೆಯ ಸಿಬ್ಬಂದಿಗಳನ್ನು ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆಯ ಸ್ಥಾಪಕಾಧ್ಯಕ್ಷ ಮಹೇಶ್ ಶೆಟ್ಟಿ ತಿಮರೋಡಿ ತೀವ್ರವಾಗಿ ತರಾಟಗೆ ತೆಗೆದುಕೊಂಡ ಘಟನೆ ನಡೆದಿದ್ದು, ಅದರ ವೀಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಬೆಳ್ತಂಗಡಿಯಲ್ಲಿ ನಡೆದ ಪ್ರತಿಭಟನೆಯಲ್ಲಿ ಕೇಸರಿ ಬಟ್ಟೆಯನ್ನು ಸುಟ್ಟಿರುವುದನ್ನು ವಿರೋಧಿಸಿ ನಡೆದಿದ್ದ ಪ್ರತಿಭಟನೆಗಳಲ್ಲಿ ಪರಸ್ಪರ ಬೈದಾಡಿಕೊಂಡಿದ್ದ ಮಹೇಶ್ ಶೆಟ್ಟಿ ಹಾಗೂ ಶಾಸಕ ಹರೀಶ್ ಪೂಂಜ ನಡುವಿನ ಜಗಳಕ್ಕೆ ಆಸ್ಪತ್ರೆಯೂ ವೇದಿಕೆಯಾಗಿ ಮಾರ್ಪಟ್ಟಿತ್ತು.
ಬೆಳ್ತಂಗಡಿಯ ರಾಜಕೇಸರಿ ಸಂಘಟನೆಯ ಸ್ಥಾಪನೆಯ 4ನೇ ವರ್ಷದ ಸವಿನೆನಪಿಗಾಗಿ ಗಾಂಧೀ ಜಯಂತಿ ಪ್ರಯುಕ್ತ ಮಂಗಳವಾರ ಬೆಳ್ತಂಗಡಿ ತಾಲೂಕು ಆಸ್ಪತ್ರೆಯ ಸ್ವಚ್ಛತಾ ಕಾರ್ಯಕ್ರಮ ಹಮ್ಮಿಕೊಂಡಿತ್ತು. ರಾಜಕೇಸರಿ ಸಂಘಟನೆಯು ರಾಷ್ಟ್ರೀಯ ಹಿಂದೂ ಜಾಗರಣ ವೇದಿಕೆಯ ಸ್ಥಾಪಕಾಧ್ಯಕ್ಷ ಮಹೇಶ್ ಶೆಟ್ಟಿ ತಿಮರೋಡಿ ಬೆಂಬಲಿತವಾಗಿರುವುದರಿಂದ ಕಾರ್ಯಕ್ರಮದ ಚಾಲನೆಗೆ ತಿಮರೋಡಿಯನ್ನು ಆಹ್ವಾನಿಸಲಾಗಿತ್ತು.
ಕಾರ್ಯಕ್ರಮಕ್ಕೆ ಬಂದಿದ್ದ ತಿಮರೋಡಿ ಕಾರ್ಯಕ್ರಮ ತಡವಾಗುತ್ತಿರುವ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದರು. ಈ ವೇಳೆಗೆ ಕಾರ್ಯಕ್ರಮಕ್ಕೆ ಶಾಸಕರೂ ಬರಲಿದ್ದಾರೆ ಎಂದು ತಿಳಿದು ಮಹೇಶ್ ಶೆಟ್ಟಿ ಶಾಸಕರನ್ನು ಕರೆದಿರುವ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿ ಏರುದ್ವನಿಯಲ್ಲಿ ಎಲ್ಲರನ್ನೂ ಬೈದಾಡಿದ್ದಾರೆ. ಬಳಿಕ ಸರಳವಾಗಿ ಸಭಾ ಕಾರ್ಯಕ್ರಮ ಆರಂಭಗೊಂಡಿದ್ದು ತಿಮರೋಡಿ, ತನ್ನ ಭಾಷಣದಲ್ಲಿ ಸಮಾಜ ಸರಿ ಇಲ್ಲ. ಊರನ್ನು ಗುಡಿಸುವ ಮೊದಲು ನಮ್ಮನ್ನು ನಾವು ಸ್ವಚ್ಛತೆ ಮಾಡಬೇಕಾದ್ದು ಅನಿವಾರ್ಯವಾಗಿದೆ ಎಂದು ಮಾತನಾಡುತ್ತಿರಬೇಕಾದರೆ ಶಾಸಕ ಹರೀಶ ಪೂಂಜ ಅವರು ಕಾರ್ಯಕ್ರಮದಲ್ಲಿ ಸೇರಿಕೊಂಡರು. ಇದೇ ವೇಳೆ ಭಾಷಣ ಮುಗಿಸಿದ ತಿಮರೋಡಿ ಕಾರ್ಯಕ್ರಮ ನಡೆಯುತ್ತಿದ್ದ ಸಂದರ್ಭದಲ್ಲಿಯೇ ಅಲ್ಲಿಂದ ಬೇರೆಡೆಗೆ ಬಂದು ನಿಂತುಕೊಂಡರು. ಅವರ ಬೆಂಬಲಿಗರೂ ಅವರನ್ನು ಅನುಸರಿಸಿದರು.
ಬಳಿಕ ಶಾಸಕರು ಮಾತನಾಡಿದರು. ಬಳಿಕ ವೈದ್ಯರನ್ನು ಸಿಬ್ಬಂದಿಗಳನ್ನು ಸಾರ್ವಜನಿಕರನ್ನು ಮಾತನಾಡಿಸಿದ ಶಾಸಕರು ಸುಮಾರು ಹದಿನೈದು ನಿಮಿಷಕ್ಕೂ ಹೆಚ್ಚು ಕಾಲ ಅಲ್ಲಿದ್ದು ಇನ್ನೊಂದು ಕಾರ್ಯಕ್ರಮಕ್ಕೆ ತೆರಳಿದರು.
ಈ ಸಂದರ್ಭ ಶಾಸಕರಿಗೆ ಹಾಗೂ ತಿಮರೋಡಿಯವರ ಮಧ್ಯೆ ವಾಗ್ವಾದ ನಡೆಯಬಹುದು ಎಂದೇ ಅಲ್ಲಿದ್ದವರೆಲ್ಲರೂ ನಿರೀಕ್ಷಿಸಿದ್ದರು. ಕೆಲ ಹೊತ್ತು ವಾತಾವರಣ ಉದ್ವೇಗದಿಂದ ಕೂಡಿತ್ತು. ಎರಡೂ ಕಡೆಯ ಯುವಕರು ಅಲ್ಲಿದ್ದರು. ಇಬ್ಬರೂ ಬೈದಾಡಿಕೊಳ್ಳುತ್ತಾರಯೇ ಎಂಬ ಅನುಮಾನ ಅಲ್ಲಿ ಸೇರಿದ್ದವರಲ್ಲಿ ಮೂಡಿತ್ತು ಆದರೆ ಇಬ್ಬರೂ ಪರಸ್ಪರ ಮಾತನಾಡಲೇ ಇಲ್ಲ.
ಶಾಸಕರು ಹೊರಟ ಬಳಿಕ ಮತ್ತೊಮ್ಮೆ ತಿಮರೋಡಿ ವೈದ್ಯರ ಮೇಲೆ ರಾಜಕೇಸರಿ ಸಂಘಟನೆಯವರ ಮೇಲೆ ರೇಗಾಡಿದರು. ಶಾಸಕರನ್ನು ಯಾರು ಕರೆದದ್ದು ಎಂದು ತಿಳಿಸುವವರೆಗೂ ನಾನು ಬಿಡುವುದಿಲ್ಲ ಎಂದು ಪಟ್ಟು ಹಿಡಿದರು. ತನಗೂ ಶಾಸಕರಿಗೂ ಆಗುವುದಿಲ್ಲ ಎಂದು ತಿಳಿದ ಮೇಲೆಯೂ ಈ ರೀತಿ ಮಾಡಿದ್ದು ಸರಿಯಲ್ಲ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಬಳಿಕ ರಾಜಕೇಸರಿ ಸಂಘಟನೆಯವರು ಅವರೊಂದಿಗೆ ಮಾತುಕತೆ ನಡೆಸಿ ಸಮಾಧಾನ ಪಡಿಸಿದ ನಂತರ ಸ್ವಚ್ಚತಾ ಕಾರ್ಯ ನಡೆಯಿತು.
ವೀಡಿಯೊ ಕೃಪೆ: day kannada