ಪಶ್ತೂನ್ ಪ್ರತಿಭಟನೆಯಲ್ಲಿ ಪಾಲ್ಗೊಂಡ ಪಾಕ್ ಶಿಕ್ಷಣ ತಜ್ಞನ ಬಂಧನ
ಇಸ್ಲಾಮಾಬಾದ್,ಫೆ.9: ಈ ತಿಂಗಳ ಆರಂಭದಲ್ಲಿ ಪಶ್ತೂನ್ ಜನಾಂಗೀಯ ನಾಯಕನೊಬ್ಬನ ಹತ್ಯೆಯನ್ನು ಪ್ರತಿಭಟಿಸಿದ್ದ ಪಾಕಿಸ್ತಾನ ಶಿಕ್ಷಣತಜ್ಞರೊಬ್ಬರ ನಿವಾಸದ ಮೇಲೆ ಪೊಲೀಸರು ದಾಳಿ ನಡೆಸಿ, ಅವರನ್ನು ಬಂಧಿಸಿದ್ದಾರೆ.
ಅಮ್ಮಾರ್ ಅಲಿ ಜಾನ್ ಅವರನ್ನು ಇಸ್ಲಾಮಾಬಾದ್ನಲ್ಲಿರುವ ಅವರ ನಿವಾಸದಿಂದ ಪೊಲೀಸರು ಬಂಧಿಸಿದ್ದು, ಆನಂತರ ಅವರನ್ನು ಗುಲ್ಬರ್ಗ್ ಪೊಲೀಸ್ ಠಾಣೆಗೆ ಕರೆದುಕೊಂಡುಹೋಗಿದ್ದಾರೆಂದು ಡಾನ್ ನ್ಯೂಸ್ ವರದಿ ಮಾಡಿದೆ.
ಜಾನ್ ಅವರು ಪಶ್ತೂನ್ ಜನಾಂಗೀಯರ ಮಾನವಹಕ್ಕುಗಳಿಗಾಗಿನ ಸಾಮಾಜಿಕ ಸಂಘಟನೆ ಪಶ್ತೂನ್ ತಹಾಫ್ಫುಝ್ ಮೂವ್ಮೆಂಟ್ (ಪಿಟಿಎಂ)ನ ನಾಯಕ ಅರ್ಮಾನ್ ಲೋನಿಯವರ ಸಾವಿನ ಘಟನೆಯ ವಿರುದ್ಧ ಪ್ರತಿಭಟನೆ ನಡೆಸಿದ್ದರು.
ಪಾಕಿಸ್ತಾನದ ಬಲೂಚಿಸ್ತಾನ ಪ್ರಾಂತದಲ್ಲಿ ಭದ್ರತಾಪಡೆಗಳ ಮೇಲೆ ಉಗ್ರ ಗಾಮಿಗಳು ನಡೆಸಿದ ಭಯೋತ್ಪಾದಕ ದಾಳಿಯನ್ನು ಖಂಡಿಸಿ ಶಾಂತಿಯುತ ಪ್ರತಿಭಟನೆ ನಡೆಸುತ್ತಿದ್ದ ಪಿಟಿಎಂ ಸಂಘಟನೆಯ ಪ್ರತಿಭಟನಕಾರರನ್ನು ಚದುರಿಸಲು ಪೊಲೀಸರು ಲಾಠಿಚಾರ್ಜ್ ನಡೆಸಿದ ವೇಳೆ ಗಂಭೀರ ಗಾಯಗೊಂಡಿದ್ದ ಲೋನಿ ಫೆಬ್ರವರಿ 2ರಂದು ಕೊನೆಯುಸಿರೆಳೆದಿದ್ದರು.
ಪ್ರತಿಭಟನೆಯ ಸಂದರ್ಭದಲ್ಲಿ ರಸ್ತೆ ತಡೆ ನಡೆಸುತ್ತಿದ್ದ 100-150ರಷ್ಟಿದ್ದ ತಂಡದ ನೇತೃತ್ವವನ್ನು ಜಾನ್ ವಹಿಸಿದ್ದರೆಂದು ಆರೋಪಿಸಲಾಗಿದೆ.
ರಸ್ತೆ ತಡೆ ವೇಳೆ ಜಾನ್ ಅವರು ಇತರ ಪ್ರತಿಭಟನಕಾರರ ಜೊತೆ ಸರಕಾರಿ ಸಂಸ್ಥೆಗಳು ಹಾಗೂ ಗುಪ್ತಚರ ಏಜೆನ್ಸಿಗಳ ವಿರುದ್ಧ ಘೋಷಣೆಗಳನ್ನು ಕೂಗಿದ್ದರೆಂದು ಎಫ್ಐಆರ್ ನಲ್ಲಿ ಆರೋಪಿಸಲಾಗಿದೆ.
2018ರ ಎಪ್ರಿಲ್ನಲ್ಲಿ ಜಾನ್ ಅವರನ್ನು ಪಂಜಾಬ್ ವಿವಿಯ ಸಂದರ್ಶಕ ಉಪನ್ಯಾಸಕ ಹುದ್ದೆಯಿಂದ ವಜಾಗೊಳಿಸಲಾಗಿತ್ತು. ಗುತ್ತಿಗೆ ಉಪನ್ಯಾಸಕನ ಹೊಣೆಗಾರಿಕೆಗಳನ್ನು ಈಡೇರಿಸಲು ವಿಫಲರಾಗಿದ್ದಕ್ಕಾಗಿ ಜಾನ್ ಅವರನ್ನು ವಜಾಗೊಳಿಸಲಾಗಿದೆಯೆಂದು ವಿವಿಯ ಆಡಳಿತ ಮಂಡಳಿ ತಿಳಿಸಿತ್ತು. ಆದರೆ ಜಾನ್ ಅವರ ರಾಜಕೀಯ ನಿಲುವಿಗಾಗಿ ಹಾಗೂ ಸರಕಾರಿ ವಿರೋಧಿ ಚಳವಳಿಗಳಿಗಳಲ್ಲಿ ಅವರು ಸಕ್ರಿಯವಾಗಿ ಪಾಲ್ಗೊಳ್ಳುತ್ತಿದ್ದುದ್ದಕ್ಕಾಗಿ ಅವರನ್ನು ವಜಾಗೊಳಿಸಲಾಗಿದೆಯೆಂದು ಹೇಳಲಾಗುತ್ತಿದೆ.