ಅಮೆರಿಕದಲ್ಲಿ ದಲಿತ ಚಿತ್ರೋತ್ಸವ

ಇದೇ ಮೊದಲ ಬಾರಿಗೆ, ಫೆಬ್ರವರಿ 23 ಹಾಗೂ 24ರಂದು ನ್ಯೂಯಾರ್ಕ್‌ನಲ್ಲಿ ದಲಿತ ಸಾಂಸ್ಕೃತಿಕ ಹಾಗೂ ಚಲನಚಿತ್ರ ಉತ್ಸವವನ್ನು ಆಯೋಜಿಸಲಾಗಿದೆ. ಉತ್ತರ ಅಮೆರಿಕದ ಅಂಬೇಡ್ಕರ್ ಅಸೋಸಿಯೇಶನ್ (ಎಎಎನ್‌ಎ), ಬೊಸ್ಟನ್ ಅಧ್ಯಯನ ಸಮೂಹ (ಬಿಎಸ್‌ಜಿ), ಅಂಬೇಡ್ಕರ್ ಅಂತರ್‌ರಾಷ್ಟ್ರೀಯ ಕೇಂದ್ರ, ಅಂಬೇಡ್ಕರ್ ಅಂತರ್‌ರಾಷ್ಟ್ರೀಯ ಮಿಶನ್ (ಎಐಎಂ), ದಿ ನ್ಯೂ ಸ್ಕೂಲ್ ಹಾಗೂ ಟೆಕ್ಸಾಸ್‌ನ ಅಂಬೇಡ್ಕರ್ ಬೌದ್ಧ ಸಂಘ (ಎಬಿಎಟಿ) ಜಂಟಿಯಾಗಿ ಈ ಉತ್ಸವವನ್ನು ಆಯೋಜಿಸಿವೆ.

 ‘‘ಭಾರತದಲ್ಲಿ 50 ಕೋಟಿಯಷ್ಟಿರುವ ದಲಿತರು ಹಾಗೂ ಕೆಳಜಾತಿಗಳವರ ಅನುಭವಗಳನ್ನು ಚಲನಚಿತ್ರಗಳಲ್ಲಿ ಮರೆಮಾಚಲಾಗುತ್ತಿದೆ. ಭಾರತದಲ್ಲಿ ಪ್ರಬಲ ಜಾತಿಗಳ ಸಾಂಸ್ಕೃತಿಕ ಯಜಮಾನಿಕೆಯು ದಲಿತರ ಧ್ವನಿಗಳನ್ನು ಹಾಗೂ ದಲಿತರ ಹಕ್ಕುಗಳನ್ನು ಹತ್ತಿಕ್ಕುತ್ತಿರುವ ಘಟನೆಗಳು ಪುನರಾವರ್ತನೆಗೊಳ್ಳುತ್ತಿವೆ. ಸಿನೆಮಾಗಳಲ್ಲಿ ದಲಿತ ಪಾತ್ರಗಳನ್ನು ಕೀಳಾಗಿ ಚಿತ್ರಿಸಲಾಗುತ್ತಿದೆ ಅಥವಾ ಅವರು ಅವಮಾನಕ್ಕೆ ಅರ್ಹರಾದವರೆಂಬಂತೆ ಬಿಂಬಿಸಲಾಗುತ್ತಿದೆ. ಇಂತಹ ಜಾತಿವಾದಿ ನಡವಳಿಕೆಗಳು, ದಲಿತರ ಸಾಂಸ್ಕೃತಿಕ ಬದುಕಿನ ಗುಣಮಟ್ಟವನ್ನು ಅಧೋಗತಿಗಿಳಿಸಿವೆ’’ ಎಂದು ದಲಿತ ಉತ್ಸವದ ವೆಬ್‌ಸೈಟ್‌ನಲ್ಲಿ ಪ್ರಕಟವಾದ ಲೇಖನವೊಂದು ವಿವರಿಸಿದೆ.
 ಮರೆಯಾಗಿರುವ ದಲಿತರ ಸಾಂಸ್ಕೃತಿಕ ಕಲೆಗಳನ್ನು ಹೊರಜಗತ್ತಿಗೆ ಅನಾವರಣಗೊಳಿಸುವುದು,ಭಾರತೀಯ ಹಾಗೂ ದಕ್ಷಿಣ ಏಶ್ಯ ಸಿನೆಮಾರಂಗದಲ್ಲಿ ದಲಿತರ ಬದುಕಿನ ಅನುಭವಗಳ ಬಗ್ಗೆ ಬೆಳಕು ಚೆಲ್ಲುವಂತಹ ಚಿತ್ರಗಳ ಕೊರತೆಯ ಬಗ್ಗೆ ಸಂವಾದಕ್ಕೆ ಉತ್ತೇಜಿಸುವುದು ಮತ್ತು ಸಿನೆಮಾ ಹಾಗೂ ಇತರ ಮಾಧ್ಯಮಗಳ ಮೂಲಕ ದಮನಿತ ಸಮೂಹಗಳ ನಡುವೆ ಏಕತೆಯನ್ನು ಸೃಷ್ಟಿಸುವುದು, 2019ರ ದಲಿತ ಚಲನಚಿತ್ರ ಹಾಗೂ ಸಾಂಸ್ಕೃತಿಕ ಉತ್ಸವ (2019)ದ ಮುಖ್ಯ ಉದ್ದೇಶಗಳಾಗಿವೆಯೆಂದು ಅದು ಹೇಳಿದೆ.
ಈ ಅಂತರ್‌ರಾಷ್ಟ್ರೀಯ ದಲಿತ ಚಲನಚಿತ್ರ ಉತ್ಸವವನ್ನು ಸಮಾಜದ ಹಾಗೂ ಚಿತ್ರರಂಗದ ಜಾತಿವಾದಿ ಧೋರಣೆಗೆ ಬಲಿಪಶುವಾದ ದಕ್ಷಿಣ ಭಾರತದ ಪ್ರಪ್ರಥಮ ಸನೆಮಾ ನಟಿ ಪಿ.ಕೆ.ರೋಸಿ ಅವರ ನೆನಪಿಗೆ ಸಮರ್ಪಿಸಲಾಗಿದೆ.
 ದಲಿತ ಚಲನಚಿತ್ರ ಉತ್ಸವದಲ್ಲಿ ದಲಿತರ ಬವಣೆಗಳು ಹಾಗೂ ಹೋರಾಟದ ಹಿನ್ನೆಲೆಯ 6 ಕಥಾಚಿತ್ರಗಳು ಹಾಗೂ 6 ಸಾಕ್ಷ ಚಿತ್ರಗಳನ್ನು ಪ್ರದರ್ಶಿಸಲಾಗುವುದು. ಇವು ತಮಿಳು, ಹಿಂದಿ, ಮಲಯಾಳಂ, ಮರಾಠಿ ಹಾಗೂ ನೇಪಾಳಿ ಭಾಷೆಯ ಚಿತ್ರಗಳಾಗಿವೆ.
ತಮಿಳಿನ ಪರಿಯೆರುಂ ಪೆರುಮಾಳ್ ಹಾಗೂ ಕಾಲಾ, ಮಲಯಾಳಂನ ಪಾಪಿಲೊ ಬುದ್ಧ, ಮರಾಠಿಯ ಫಂಡ್ರಿ ಹಾಗೂ ಬೋಲೆ ಇಂಡಿಯಾ ಜೈ ಭೀಮ್ ಹಾಗೂ ಹಿಂದಿಯ ಮಸಾಣ್, ದಲಿತ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನಗೊಳ್ಳಲಿರುವ ಪ್ರಮುಖ ಕಥಾಚಿತ್ರಗಳಾಗಿವೆ.
ಮಲಹೊರುವ ಕಾರ್ಮಿಕರ ಕುರಿತಾದ ತಮಿಳು ಸಾಕ್ಷಚಿತ್ರ ‘ಕಕ್ಕಸ್’, ಶೈಕ್ಷಣಿಕ ಸಂಸ್ಥೆಗಳಲ್ಲಿ ಜಾತಿ ತಾರತಮ್ಯದ ಬಗ್ಗೆ ಬೆಳಕು ಚೆಲ್ಲುವ ‘ ವಿ ಹ್ಯಾವ್ ನಾಟ್ ಕಮ್ ಹಿಯರ್ ಟು ಡೈ’ ಸೇರಿದಂತೆ ಆರು ಸಾಕ್ಷಚಿತ್ರಗಳು ಪ್ರದರ್ಶಿತವಾಗಲಿವೆ.
ನಿರ್ದೇಶಕರಾ ದ ಪಾ.ರಂಜಿತ್, ನಾಗರಾಜ್ ಮಂಜುಳೆ ಹಾಗೂ ಸಾಮಾಜಿಕ ಹಾಗೂ ರಾಜಕೀಯ ಹೋರಾಟಗಾರ, ದಿಗ್ಧರ್ಶಕ ಬೊಮ್ಮಕ್ಕು ಮುರಳಿ, ನಟಿ, ಫೆಮಿನಾ ಮಿಸ್ ಇಂಡಿಯಾ ವಿಜೇತೆ ನಿಹಾರಿಕಾ ಸಿಂಗ್ ದಲಿತ ಅಂತರ್‌ರಾಷ್ಟ್ರೀಯ ಚಲನಚಿತ್ರೋತ್ಸವ (ಡಿಎಎಲ್‌ಐಎಫ್‌ಎಫ್)ದಲ್ಲಿ ಪಾಲ್ಗೊಳ್ಳಲಿದ್ದಾರೆ.
ಫೆ.23ರಂದು ಕೊಲಂಬಿಯಾ ವಿವಿಯಲ್ಲಿ ಹಾಗೂ ಫೆ.24ರಂದು ನ್ಯೂಯಾರ್ಕ್‌ನ ದಿ ನ್ಯೂ ಸ್ಕೂಲ್‌ನಲ್ಲಿ ಅಂತರ್‌ರಾಷ್ಟ್ರೀಯ ದಲಿತ ಚಲನಚಿತ್ರೋತ್ಸವವನ್ನು ಆಯೋಜಿಸಲಾಗಿದೆ.