varthabharthi


ವಾರ್ತಾಭಾರತಿ 18ನೇ ವಾರ್ಷಿಕ ವಿಶೇಷಾಂಕ

ಕವನ

ವಾರ್ತಾ ಭಾರತಿ : 2 Jan, 2021
ಫೈಝ್ ಅಹ್ಮದ್ ಫೈಝ್ | ಅನುವಾದ: ಎಲ್.ಕೆ. ಅತೀಕ್

ಎಲ್.ಕೆ. ಅತೀಕ್

ತುಮಕೂರು ಜಿಲ್ಲೆಯ ಪಾವಗಡದ ಕೃಷಿ ಕುಟುಂಬದ ಲುತ್ಫುಲ್ಲಾ ಕೆ. ಅತೀಕ್ 1991ರಲ್ಲಿ ರಾಜ್ಯಕ್ಕೆ ಪ್ರಥಮ ಸ್ಥಾನಿಯಾಗಿ ಐಎಎಸ್‌ಗೆ ಆಯ್ಕೆಯಾದವರು. ಮಂಗಳೂರಿನಲ್ಲಿ ಅಸಿಸ್ಟೆಂಟ್ ಕಮಿಷನರ್ ಆಗಿ ವೃತ್ತಿ ಜೀವನ ಪ್ರಾರಂಭಿಸಿದ ಇವರು ಮಂಗಳೂರಿನ ಅಳಿಯನೂ ಹೌದು. ಕರ್ತವ್ಯ ನಿರ್ವಹಿಸಿದ ಎಲ್ಲೆಡೆ ಜನಪರ ಕಳವಳಿಯ ದಕ್ಷ ಅಧಿಕಾರಿ ಎಂದು ಮನ್ನಣೆ ಗಳಿಸಿದವರು. ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ಪ್ರಧಾನ ಕಾರ್ಯದರ್ಶಿಯಾಗಿ, ಪ್ರಧಾನಮಂತ್ರಿ ಮನಮೋಹನ್ ಸಿಂಗ್ ಅವರ ಜಂಟಿ ಕಾರ್ಯದರ್ಶಿಯಾಗಿ, ವಿಶ್ವ ಬ್ಯಾಂಕ್ ಕಾರ್ಯನಿರ್ವಾಹಕ ನಿರ್ದೇಶಕರ ಹಿರಿಯ ಸಲಹೆಗಾರನಾಗಿ ಹಲವು ಪ್ರತಿಷ್ಠಿತ ಹುದ್ದೆಗಳನ್ನು ಅತ್ಯಂತ ಸಮರ್ಥವಾಗಿ ನಿಭಾಯಿಸಿ ನ್ಯಾಯ ಒದಗಿಸಿದವರು. ಉತ್ತಮ ಕನ್ನಡ, ಉರ್ದು ಲೇಖಕರೂ ಆಗಿರುವ ಎಲ್.ಕೆ. ಅತೀಕ್ ಅವರು ಖ್ಯಾತ ಕವಿ ಫೈಝ್ ಅಹ್ಮದ್ ಫೈಝ್ ಅವರ ಕವನಗಳನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ. ಸದ್ಯ ಅವರು ಕರ್ನಾಟಕ ಸರಕಾರದ ಗ್ರಾಮೀಣಾಭಿವೃದ್ಧಿ ಹಾಗೂ ಪಂಚಾಯತ್ ರಾಜ್ ಇಲಾಖೆಯ ಪ್ರಧಾನ ಕಾರ್ಯದರ್ಶಿಯಾಗಿದ್ದಾರೆ. 

ಸಂಜೆ

ಹೀಗಿದೆ:

ಆಗಿದೆ ಪ್ರತಿಯೊಂದು ವೃಕ್ಷ ಒಂದು ಮಂದಿರ

ಎಂದಿನಿಂದಲೊ ತನ್ನ ಬರಡಿನ ನೆಪಗಳನ್ನು ಹುಡುಕುತ್ತಿರುವ

ಹಾಳುಬಿದ್ದ ಮಬ್ಬಾದ ಪ್ರಾಚೀನ ಮಂದಿರ

ಸೀಳಿದೆ ಪ್ರತಿಯೊಂದು ಚಪ್ಪರ

ತನ್ನ ಕೊನೆ ಗಳಿಗೆಗಳನ್ನು ಎಣಿಸುತ್ತಿದೆ

ಪ್ರತಿಯೊಂದು ದ್ವಾರ

ಆಕಾಶ ಪ್ರತಿಯೊಂದು ಮಾಳಿಗೆಯ ಕೆಳಗೆ

ಮೈಗೆ ಬೂದಿ ಸವರಿದ ಹಣೆಗೆ ಕುಂಕುಮ ಹಚ್ಚಿದ ಪುರೋಹಿತನಂತೆ

ಎಂದಿನಿಂದಲೋ ತಲೆ ತಗ್ಗಿಸಿ ಸುಮ್ಮನೆ ಕುಳಿತಿದ್ದಾನೆ

ಹೀಗಿದೆ:

ಪರದೆಯ ಹಿಂದಿನಿಂದ ಜಾದೂಗಾರನೊಬ್ಬ

ಆಕಾಶದ ಬನದಲಿ

 ಹರಡುತಿಹನು ಮಾಯದ ಬಲೆ

ಹಗಲಿನ ಮೈಗೆ ಅಂಟಿದೆ

 ಸಂಜೆಯ ಉಡುಪು

ಈಗೆಂದು ಆರದು ಸಂಜೆ

ಕತ್ತಲಾಗದು

ಈಗೆಂದು ಉರಳದು ರಾತ್ರಿ

ಬರದು ಮುಂಜಾವು

ಆಕಾಶ ಆಶಿಸುತ್ತಿದೆ ಹೇಗೆ

ಹರಿಯಲಿ ಈ ಜಾದು

ಮುರಿಯಲಿ ನಿಶಬ್ದದ ಸರಪಳಿ

ಸ್ವತಂತ್ರವಾಗಲಿ ಸಮಯ

ಯಾರಾದರು ಶಂಖ ಊದಲಿ

ಗೆಜ್ಜೆಯೊಂದು ಹಾಡಲಿ

ಎಚ್ಚರವಾಗಲಿ ಒಬ್ಬ ದೇವನು

ಶ್ಯಾಮಸುಂದರಿ ಒಬ್ಬಳು

ಮುಖ ತೋರಿಸಲಿ

*****

ಎದೆಯ ಅಂತರಾಳದ ಧ್ವನಿ

‘‘ಇಷ್ಟು ಸಿಹಿ ಜೀವನ ಈ ಕ್ಷಣ

ದಬ್ಬಾಳಿಕೆಯ ವಿಷ ಬೆರೆಸುವವರು

ಸಫಲರಾಗರು ಇಂದು ಎಂದೂ

ಪ್ರೀತಿಸುವವರ ಮನೆಗಳ

ದೀಪಗಳನ್ನು ಆರಿಸಿದರೇನು

ಚಂದ್ರನನು ಆರಿಸಲಿ ನೋಡೋಣ’’

***

‘ವಾರ್ತಾ ಭಾರತಿ’ ನಿಮಗೆ ಆಪ್ತವೇ ? ಇದರ ಸುದ್ದಿಗಳು ಮತ್ತು ವಿಚಾರಗಳು ಎಲ್ಲರಿಗೆ ಉಚಿತವಾಗಿ ತಲುಪುತ್ತಿರಬೇಕೇ? 

ಬೆಂಬಲಿಸಲು ಇಲ್ಲಿ  ಕ್ಲಿಕ್ ಮಾಡಿ

Comments (Click here to Expand)