ಓ ಮೆಣಸೇ...
ಭಾರತಕ್ಕೆ ನೈಜ ಸ್ವಾಂತಂತ್ರ್ಯ ದೊರಕಿದ್ದು 2014ರಲ್ಲಿ ನರೇಂದ್ರ ಮೋದಿ ನೇತೃತ್ವದ ಸರಕಾರ ಅಧಿಕಾರಕ್ಕೆ ಬಂದ ಬಳಿಕ- ಕಂಗನಾ ರಣಾವತ್, ನಟಿ
ಹೌದು, ದೇಶದ ಸೊತ್ತುಗಳನ್ನೆಲ್ಲ ಖಾಸಗಿ ಕಂಪೆನಿಗಳಿಗೆ ಮಾರಿ, ಬಡವರಿಂದ ತುತ್ತು ಅನ್ನವನ್ನು ಕಿತ್ತುಕೊಳ್ಳುವ ಸ್ವಾತಂತ್ರ ಹಿಂದೆಂದೂ ಯಾವುದೇ ಸರಕಾರಕ್ಕೆ ಇರಲಿಲ್ಲ.
ಬಡತನ, ಅಸ್ಪಶ್ಯತೆ ಕಾಂಗ್ರೆಸ್‌ನ 60 ವರ್ಷಗಳ ಆಡಳಿತದ ಬಹು ದೊಡ್ಡ ಕೊಡುಗೆ - ಕೋಟ ಶ್ರೀನಿವಾಸ ಪೂಜಾರಿ, ಸಚಿವ
ಆ ಬಳಿಕ ಬಂದವರು ಅವೆರಡನ್ನೂ ಮತ್ತಷ್ಟು ಬಲಪಡಿಸಿ ಭ್ರಷ್ಟತೆ, ಅರಾಜಕತೆ ಎಂಬಿತ್ಯಾದಿ ಹೊಸ ಕೊಡುಗೆಗಳನ್ನು ನೀಡುತ್ತಿದ್ದಾರೆ.
ಪದವೀಧರರು ತಾವು ಪಡೆದುಕೊಂಡದ್ದನ್ನು ಸಮಾಜಕ್ಕೆ ಮರಳಿ ನೀಡುವ ಸಂದರ್ಭ ಬಂದಿದೆ- ಧರ್ಮೇಂದ್ರ ಪ್ರಧಾನ್, ಕೇಂದ್ರ ಸಚಿವ
ಅಸಲು ಪದವಿ ಪಡೆದವರು ಬೇರೇನಲ್ಲದಿದ್ದರೆ ತಮ್ಮ ಪದವಿಯನ್ನಾದರೂ ಮರಳಿಸಬಹುದು.
ಪ್ರಧಾನಿ ಮೋದಿ, 2047ಕ್ಕೆ ಭಾರತ ಯಾವ ರೀತಿ ಇರಬೇಕೆಂಬುದಕ್ಕೆ ಯೋಜನೆ ರೂಪಿಸಿದ್ದಾರೆ - ಪ್ರಹ್ಲಾದ್ ಜೋಶಿ, ಕೇಂದ್ರ ಸಚಿವ
ಆಗ 97ರ ಹರೆಯದಲ್ಲಿರುವ ಮೋದಿಯವರು, ವೃದ್ಧಾಶ್ರಮದಿಂದ ದೇಶ ನಡೆಸುವುದಕ್ಕೆ ಯೋಜನೆ ರೂಪಿಸಿರಬೇಕು.
ಉಪಚುನಾವಣೆಯಲ್ಲಿ ಬಿಜೆಪಿ ಸೋತಿದ್ದರಿಂದಲೇ ಪೆಟ್ರೋಲ್, ಡೀಸೆಲ್ ಬೆಲೆ ಇಳಿಸಲಾಗಿದೆ- ಡಿ.ಕೆ.ಶಿವಕುಮಾರ್, ಕೆಪಿಸಿಸಿಅಧ್ಯಕ್ಷ
ಆದ್ದರಿಂದ ಬಿಜೆಪಿಯನ್ನು ಸೋಲಿಸುವುದರಲ್ಲೇ ತಮ್ಮ ಕ್ಷೇಮ ಅಡಗಿದೆ ಎಂದು ಜನರು ಮಾತನಾಡಿಕೊಳ್ಳುತ್ತಿದ್ದಾರೆ.
ಸಿಎಂ ಬೊಮ್ಮಾಯಿ ಮತ್ತು ಬಿಜೆಪಿ ರಾಜ್ಯಾಧ್ಯಕ್ಷ ಕಟೀಲು ಚೆನ್ನಾಗಿ ಕೆಲಸ ಮಾಡುತ್ತಿದ್ದಾರೆ - ಅರುಣ್ ಸಿಂಗ್, ಬಿಜೆಪಿ ರಾಜ್ಯಉಸ್ತುವಾರಿ
ಆದ್ದರಿಂದ ಇನ್ನಷ್ಟು ಚೆನ್ನಾಗಿ ಕೆಲಸ ಮಾಡುವವರನ್ನು ತರುವ ನಿರ್ಧಾರವಾಗಿದೆಯೇ?
ರಾಜ್ಯದ ಉಪಚುನಾವಣೆಯ ಫಲಿತಾಂಶದ ಕುರಿತಂತೆ ರಾಷ್ಟ್ರೀಯ ಕಾರ್ಯಕಾರಿಣಿಯಲ್ಲಿ ಯಾವುದೇ ಚರ್ಚೆಯಾಗಿಲ್ಲ - ಆರ್. ಅಶೋಕ್, ಸಚಿವ
ಫಲಿತಾಂಶ, ಪ್ರಸ್ತಾಪಯೋಗ್ಯವಾಗಿದ್ದರೆ ತಾನೇ ಆ ಕುರಿತು ಚರ್ಚೆಯನ್ನು ಪ್ರಸ್ತಾಪಿಸುವುದು?
ಭಾರತದ ಕ್ರಿಕೆಟಿಗರು ರಾಷ್ಟ್ರೀಯ ತಂಡಕ್ಕಾಗಿ ಆಡುವುದಕ್ಕೆ ಪ್ರಾಶಸ್ತ್ಯ ನೀಡಬೇಕು - ಕಪಿಲ್ ದೇವ್, ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ
ಆಗಲಾದರೂ ಅವರ ಎಳೆಯ ಮಕ್ಕಳು ಅತ್ಯಾಚಾರದ ಬೆದರಿಕೆಗಳಿಂದ ಸುರಕ್ಷಿತರಾಗಿ ಉಳಿಯುವರೇ?
ನ್ಯಾಯಾಲಯ ಬಳ್ಳಾರಿಯಲ್ಲಿ ಉಳಿಯಲು ಅನುಮತಿ ನೀಡಿದೆ. ಆದ್ದರಿಂದ ಇನ್ನು ಮುಂದೆ ಅಲ್ಲೇ ಇದ್ದು ಜನಸೇವೆ ಮಾಡುವೆ- ಜನಾರ್ದನ ರೆಡ್ಡಿ, ಮಾಜಿ ಸಚಿವ
ಬಳ್ಳಾರಿಯಲ್ಲಿ ಎಲ್ಲಿ?
ಭಾರತ ಕ್ರಿಕೆಟ್ ತಂಡದ ಡ್ರೆಸ್ಸಿಂಗ್ ರೂಂನಲ್ಲಿ ಎಲ್ಲವೂ ಸರಿಯಿಲ್ಲ ಎಂಬ ಅನುಮಾನ ಮೂಡುತ್ತದೆ - ಮುಷ್ತಾಕ್ ಅಹ್ಮದ್, ಪಾಕ್ ಮಾಜಿ ಕ್ರಿಕೆಟಿಗ
ನಿಮ್ಮ ತಂಡ ಗೆದ್ದಿದ್ದರೆ ಇದನ್ನೆಲ್ಲಾ ಚರ್ಚಿಸಬಹುದಿತ್ತು. ಸದ್ಯ ನಿಮ್ಮವರ ಸೋಲಿನ ಕಾರಣಗಳನ್ನು ಚರ್ಚಿಸಿ.
ಧರ್ಮ ಮತ್ತು ರಿಲೀಜನ್ ಎರಡೂ ಒಂದೇ ಅಲ್ಲ-ಕಲ್ಲಡ್ಕ ಪ್ರಭಾಕರ ಭಟ್, ಆರೆಸ್ಸೆಸ್ ಮುಖಂಡ
ಆದರೆ ನಿಮ್ಮಂತವರ ಕೈಯಲ್ಲಿ ಎರಡೂ ಸಮಾನವಾಗಿ ಕುಲಗೆಡುತ್ತದೆ.
ನನಗೆ ಬಿಟ್ ಗೊತ್ತಿಲ್ಲ, ಕಾಯಿನ್ ಕೂಡಾ ಗೊತ್ತಿಲ್ಲ. ನನಗೆ ಗೊತ್ತಿರುವುದು ಒಂದೇ ಪೊಲಿಸ್ ಬೀಟ್ - ವಿ.ಸೋಮಣ್ಣ, ಸಚಿವ
ಇಲಾಖೆಯ ಟರ್ಮಿನಾಲಜಿ ಗೊತ್ತಿಲ್ಲದವರು ಪೊಲೀಸ್ ಬೀಟ್ ಅಂದರೆ ಪೋಲೀಸರ ಪೆಟ್ಟು ಎಂದು ತಿಳ್ಕೊಳ್ತಾರೆ.
ದಲಿತ ಸಿಎಂ ಆದರೆ ನಾನೇ ಮೊದಲು ಖುಷಿ ಪಡುತ್ತೇನೆ, ನಾನೂ ದಲಿತನೇ - ಸಿದ್ದರಾಮಯ್ಯ, ಮಾಜಿ ಮುಖ್ಯಮಂತ್ರಿ
ಯಾವ ಪುಡಾರಿ ಸಿಎಂ ಆದರೂ ನಾನು ಖುಷಿಪಡುತ್ತೇನೆ ಅಂದು ಬಿಡಿ, ನೀವು ಕೂಡಾ ಪುಡಾರಿಯೇ ತಾನೇ?
ಕಾಂಗ್ರೆಸ್ ಆಡಳಿತದ ಅವಧಿಯಲ್ಲಿ ಚತುಷ್ಪಥ ಎಂಬ ಪದ ಯಾರೂ ಕೇಳಿರಲು ಸಾಧ್ಯವಿಲ್ಲ - ಎಸ್.ಅಂಗಾರ, ಸಚಿವ
ಆಗ ಅಂಗಾರ ಎಂಬ ಪದವನ್ನೂ ಹೆಚ್ಚಿನವರು ಕೇಳಿರಲಿಲ್ಲ.
ಉತ್ತರಪ್ರದೇಶದ ಮುಂದಿನ ವಿಧಾನಸಭಾ ಚುನಾವಣೆಯಲ್ಲಿ ಬಿಎಸ್ಪಿ ಏಕಾಂಗಿಯಾಗಿ ಸ್ಪರ್ಧಿಸಿ ಅಧಿಕಾರದ ಗದ್ದುಗೆ ಏರಲಿದೆ - ಮಾಯಾವತಿ, ಬಿಎಸ್ಪಿ ವರಿಷ್ಠೆ
ಬಿಜೆಪಿಯನ್ನು ಗದ್ದುಗೆಗೇರಿಸುವುದಕ್ಕೆ ಬೇರೆ ಉಪಾಯವೇ ಇಲ್ಲವೇ?
ಕಾಂಗ್ರೆಸ್ ಸತ್ತಿಲ್ಲ ಎಂದು ತೋರಿಸಿಕೊಳ್ಳಲು ಬಿಟ್ ಕಾಯಿನ್ ಬಗ್ಗೆ ಬಿಜೆಪಿ ಮೇಲೆ ಆರೋಪ ಹೊರಿಸುತ್ತಿದೆ - ಕೆ.ಎಸ್. ಈಶ್ವರಪ್ಪ, ಸಚಿವ
ನಿಮ್ಮಂಥವರನ್ನು ನಾಯಕರಾಗಿಸಿರುವ ಪಕ್ಷ ಸತ್ತಿಲ್ಲ ಎಂದು ಸಾಬೀತುಪಡಿಸುವುದಕ್ಕೆ ನಿಮ್ಮ ಬಳಿ ಯಾವ ಆರೋಪವಿದೆ?
ರಾಷ್ಟ್ರೀಯ ಶಿಕ್ಷಣ ನೀತಿ ಬಗ್ಗೆ ವ್ಯಕ್ತವಾಗುತ್ತಿರುವ ವಿರೋಧದ ಬಗ್ಗೆ ಯಾರೂ ತಲೆ ಕೆಡಿಸಿಕೊಳ್ಳಬೇಕಾಗಿಲ್ಲ - ಬಿ.ಸಿ.ನಾಗೇಶ್, ಸಚಿವ
ಜನವಿರೋಧಿ ಸರಕಾರವೆಂದ ಮೇಲೆ ಯಾವುದೇ ವಿಷಯದಲ್ಲಿ ಜನವಿರೋಧವನ್ನು ಲೆಕ್ಕಿಸಬೇಕಾಗಿಲ್ಲ.
ಹಂದಿಗಳ ಜೊತೆ ಗುದ್ದಾಡಬಾರದು ಎಂಬುದನ್ನು ನಾನು ಕಲಿತಿದ್ದೇನೆ - ದೇವೇಂದ್ರ ಫಡ್ನವೀಸ್, ಮಹಾರಾಷ್ಟ್ರ ಮಾಜಿ ಸಿಎಂ
ಇನ್ನಾದರೂ ಹಂದಿಗಳು ನೆಮ್ಮದಿಯಾಗಿ, ನಿರ್ಮಲವಾಗಿರಬಹುದು.
ಸಿಎಂ ಬೊಮ್ಮಾಯಿ ಮತ್ತು ರಾಜ್ಯಾಧ್ಯಕ್ಪ ನಳಿನ್‌ಕುಮಾರ್ ಕಟೀಲು ಅವರ ಬದಲಾವಣೆ ಸಾಧ್ಯವೇ ಇಲ್ಲ - ಬಿ.ವೈ.ವಿಜಯೇಂದ್ರ, ಬಿಜೆಪಿ ಉಪಾಧ್ಯಕ್ಷ
ಬಿಜೆಪಿಯಲ್ಲಿ ಯಾವಾಗಲೂ ಹೀಗೆಯೇ. ಬದಲಾವಣೆ ಇಲ್ಲ ಎಂಬ ಹೇಳಿಕೆಗಳು ಬೆನ್ನು ಬೆನ್ನಿಗೆ ಬರಲಾರಂಭಿಸಿದರೆ ಬದಲಾವಣೆ ಖಚಿತ ಎಂದರ್ಥ.
ರಾಜ್ಯದ ಜನರು ನನ್ನನ್ನು ಜನಸಾಮಾನ್ಯರ ಮುಖ್ಯಮಂತ್ರಿ ಎಂದು ಕರೆಯಬೇಕೆಂಬುದು ನನ್ನ ಆಸೆ - ಬಸವರಾಜ ಬೊಮ್ಮಾಯಿ, ಮುಖ್ಯಮಂತ್ರಿ
ಆದರೆ ನಿಮ್ಮ ಪಕ್ಷದ ವರಿಷ್ಠರು, ಜನರು ನಿಮ್ಮನ್ನು ಕೇವಲ ಜನಸಾಮಾನ್ಯನೆಂದು ಕರೆದರೆ ಸಾಕೆಂದು ತೀರ್ಮಾನಿಸಿದ್ದಾರೆ ಎಂಬ ವದಂತಿಗಳಿವೆಯಲ್ಲಾ?
ಕಾಂಗ್ರೆಸ್ ನಾಯಕರ ಚೀಲದಲ್ಲಿ ಹಾವಿದ್ದರೆ ಧೈರ್ಯದಿಂದ ಹೊರಗೆ ಬಿಡಲಿ, ಆಗ ಅದು ಯಾರನ್ನು ಕಚ್ಚುತ್ತದೆ ನೋಡೋಣ- ಆರಗ ಜ್ಞಾನೇಂದ್ರ, ಸಚಿವ
ಪುಡಾರಿಗಳ ಒಳಗಿನ ವಿಷಕ್ಕೆ ವಿಷದ ಹಾವುಗಳು ಕೂಡಾ ಅಂಜುತ್ತವೆ ಎಂಬಷ್ಟು ಉರಗಜ್ಞಾನವೂ ನಿಮಗಿಲ್ಲವೇ?
ಯಾರೆಲ್ಲ ಪಕ್ಷ ಬಿಡಲಿದ್ದಾರೆ ಎಂಬ ಮಾಹಿತಿ ಎರಡು ವರ್ಷಗಳ ಹಿಂದಿನಿಂದಲೇ ನನ್ನ ಬಳಿ ಇದೆ - ಎಚ್.ಡಿ.ಕುಮಾರಸ್ವಾಮಿ, ಮಾಜಿ ಮುಖ್ಯಮಂತ್ರಿ
ಬಿಜೆಪಿ ಜೊತೆ ಡೀಲ್ ಮಾಡಿದರೆ ಆಗುವ ಲಾಭಗಳನ್ನೂ ನೀವು ಅಷ್ಟೇ ಸ್ಪಷ್ಟವಾಗಿ ಲೆಕ್ಕ ಹಾಕಿರಬೇಕಲ್ಲ?
ಭಾರತದ ಒಂದಿಂಚೂ ಜಾಗ ಚೀನಾಕ್ಕೆ ಬಿಟ್ಟುಕೊಡುವುದಿಲ್ಲ- ಜ.ಬಿಪಿನ್ ರಾವತ್, ಸೇನಾಮುಖ್ಯಸ್ಥ
ಇಂಚು ಮತ್ತು ಫೀಟುಗಳಲ್ಲಿ ಅವರಿಗೂ ಆಸಕ್ತಿ ಇಲ್ಲ.
