25 ವರ್ಷಗಳ ಸೇವೆಯನ್ನು ಪರಿಗಣಿಸಿ ತಳ್ಳು-ರಿಕ್ಷಾ ಚಾಲಕನಿಗೆ 1ಕೋಟಿ ರೂ. ಆಸ್ತಿ ದಾನ ನೀಡಿದ ಮಹಿಳೆ

ಭುವನೇಶ್ವರ್:‌ ತಾನು ಹೇಳಿದಲ್ಲಿಗೆಲ್ಲಾ ತನ್ನನ್ನು ಕೊಂಡೊಯ್ಯುತ್ತಿದ್ದ ತಳ್ಳುರಿಕ್ಷಾ ಚಾಲಕನೋರ್ವನ ೨೫ ವರ್ಷಗಳ ಸೇವೆಯನ್ನು ಪರಿಗಣಿಸಿ ಮಹಿಳೆಯೋರ್ವರು ಒಂದು ಕೋಟಿ ರೂ. ಮೌಲ್ಯದ ಆಸ್ತಿಯನ್ನು ದಾನ ಮಾಡಿದ ಘಟನೆ ಭುವನೇಶ್ವರ್ ದಲ್ಲಿ ನಡೆದ ಕುರಿತು Times of india ವರದಿ ಮಾಡಿದೆ. 

ಬಿಲಿಯೇನರ್‌ ಏನೂ ಅಲ್ಲದ ೬೩ ವರ್ಷ ಪ್ರಾಯದ ವಿಧವೆ ಮಹಿಳೆ ಮಿನಾಟಿ ಪಟ್ನಾಯಕ್‌ ಎಂಬವರು ಮೂರಂತಸ್ತಿನ ತಮ್ಮ ಕಟ್ಟಡ ಹಾಗೂ ಕೆಲ ಆಭರಣಗಳನ್ನು ರಿಕ್ಷಾ ಮಾಲಕ ಬುಧ ಸಮಲ್‌ ಎಂಬಾತನಿಗೆ (೫೦) ದಾನ ನೀಡಿದ್ದಾರೆ. "ಆತನ ಯಾವತ್ತೂ ನನ್ನ ಕುಟುಂಬಕ್ಕೆ ಸಹಾಯ ಮಾಡುತ್ತಿದ್ದ" ಎಂದು ಇತಿಹಾಸದಲ್ಲಿ ಸ್ನಾತಕೋತ್ತರ ಪದವಿ ಪಡೆದುಕೊಂಡಿರುವ ಪಟ್ನಾಯಕ್‌ ತಿಳಿಸಿದ್ದಾರೆ.

ಬುಧಗೆ 50 ವರ್ಷ ವಯಸ್ಸಾಗಿದ್ದರೂ, ಅವರು ಮತ್ತು ಅವರ ಪತ್ನಿ ನನ್ನನ್ನು ತಾಯಿ ಎಂದು ಕರೆಯುತ್ತಾರೆ ಮತ್ತು ಅವರ ಮಕ್ಕಳು ನನ್ನನ್ನು ಅಜ್ಜಿ ಎಂದು ಕರೆಯುತ್ತಾರೆ. ಅವರ ಸರಳತೆ ಮತ್ತು ಪ್ರಾಮಾಣಿಕತೆಗೆ ಹೋಲಿಸಿದರೆ ಆಸ್ತಿ ಏನೂ ಅಲ್ಲ, ”ಎಂದು ಮಿನಾಟಿ ಹೇಳಿದರು. ಮಿನಾಟಿ ಇಂಜಿನಿಯರ್ ಆಗಿದ್ದ ತನ್ನ ಪತಿ ಕೃಷ್ಣಾ ಪಟ್ನಾಯಕ್ (68)ರನ್ನು ಕಳೆದ ವರ್ಷ ಜುಲೈನಲ್ಲಿ ಕ್ಯಾನ್ಸರ್ ನಿಂದ ಕಳೆದುಕೊಂಡರೆ, ಅವರ ಪುತ್ರಿ ಕಮಲ್ (30) ರಾಜ್ಯಶಾಸ್ತ್ರ ಸ್ನಾತಕೋತ್ತರ ಪದವೀಧರರಾಗಿದ್ದರು, ಈ ವರ್ಷದ ಜನವರಿಯಲ್ಲಿ ಹೃದಯಾಘಾತದಿಂದ ನಿಧನರಾಗಿದ್ದರು.

ನಾನು ಹೃದ್ರೋಗಿ ಮತ್ತು ಅಧಿಕ ರಕ್ತದೊತ್ತಡ ಹೊಂದಿದ್ದೇನೆ. (ಸಮಲ್) ಕುಟುಂಬವು ನನ್ನನ್ನು ಚೆನ್ನಾಗಿ ನೋಡಿಕೊಳ್ಳುತ್ತದೆ" ಎಂದು ಮೂವರು ಸಹೋದರಿಯರು ಮತ್ತು ಸಹೋದರನನ್ನು ಹೊಂದಿರುವ ಮಿನಾಟಿ ಹೇಳಿದರು. ಬುಧ ಮತ್ತು ಅವರ ಪತ್ನಿ ಇತ್ತೀಚೆಗೆ ಮಿನಾಟಿಯ ಮನೆಗೆ ಸ್ಥಳಾಂತರಗೊಂಡಿದ್ದಾರೆ.

"ಬುಧ ನನ್ನ ಮಗಳನ್ನು ಶಾಲೆಗೆ ಬಿಡುತ್ತಿದ್ದ. ಕ್ರಮೇಣ ರಿಕ್ಷಾ ಬೇಕಾದಾಗಲೆಲ್ಲ ಅವನನ್ನು ಕರೆಯುತ್ತಿದ್ದೆವು. ವಯಸ್ಸಾದಂತೆ ಬುಧ ಮತ್ತು ಅವನ ಹೆಂಡತಿಯ ಮೇಲಿನ ಅವಲಂಬನೆ ಹೆಚ್ಚಾಯಿತು. ಅವನ ಹೆಂಡತಿ ಮನೆಯ ಕೆಲಸದಲ್ಲಿ ಸಹಾಯ ಮಾಡುತ್ತಾಳೆ ಮತ್ತು ನನಗೆ ಭಾವನಾತ್ಮಕ ಬೆಂಬಲವನ್ನು ನೀಡುತ್ತಾಳೆ" ಎಂದು ಮಿನಾಟಿ ಹೇಳುತ್ತಾರೆ. "ನಾನು ಆಸ್ತಿಯನ್ನು ಹಸ್ತಾಂತರಿಸಲು ನಿರ್ಧರಿಸಿದಾಗ, ನನ್ನ ಒಡಹುಟ್ಟಿದವರಲ್ಲಿ ಸ್ವಲ್ಪ ಅಸಮಾಧಾನವಿತ್ತು. ಆದರೆ ನಾನು ನನ್ನ ನಿರ್ಧಾರದಲ್ಲಿ ದೃಢವಾಗಿದ್ದರಿಂದ, ಅವರು ವಿರೋಧಿಸಲಿಲ್ಲ," ಎಂದು ಅವರು ಹೇಳಿದರು.