ಹಲ್ಲೆ ಪ್ರಕರಣ: ಪಂಜಾಬ್ ಎಎಪಿ ಶಾಸಕ ಡಾ. ಬಲ್ಬೀರ್ ಸಿಂಗ್, ಮಗ, ಪತ್ನಿ ದೋಷಿ; ಸ್ಥಳದಲ್ಲೇ ಜಾಮೀನು ಲಭ್ಯ
Photo:twitter
ಹೊಸದಿಲ್ಲಿ: 11 ವರ್ಷಗಳ ಹಿಂದಿನ ಹಲ್ಲೆ ಪ್ರಕರಣದಲ್ಲಿ ಆಡಳಿತಾರೂಢ ಆಮ್ ಆದ್ಮಿ ಪಕ್ಷದ ಶಾಸಕ ಡಾ.ಬಲ್ಬೀರ್ ಸಿಂಗ್ ಹಾಗೂ ಇತರ ಮೂವರು ತಪ್ಪಿತಸ್ಥರು ಎಂದು ಪಟಿಯಾಲ ಎ ರೂಪನಗರ ನ್ಯಾಯಾಲಯ ಸೋಮವಾರ ತೀರ್ಪು ನೀಡಿದೆ. ಡಾ. ಬಲ್ಬೀರ್ ಪಟಿಯಾಲ ಗ್ರಾಮಾಂತರ ಕ್ಷೇತ್ರದ ಶಾಸಕರಾಗಿದ್ದಾರೆ.
ಹೆಚ್ಚುವರಿ ಮುಖ್ಯ ನ್ಯಾಯಾಂಗ ಮ್ಯಾಜಿಸ್ಟ್ರೇಟ್ ರವಿ ಇಂದರ್ ಸಿಂಗ್ ಅವರು ಡಾ.ಬಲ್ಬೀರ್, ಅವರ ಮಗ ರಾಹುಲ್ ಸೈನಿ, ಪತ್ನಿ ರೂಪಿಂದರ್ಜಿತ್ ಸೈನಿ ಮತ್ತು ಸಹಾಯಕ ಪರ್ಮಿಂದರ್ ಸಿಂಗ್ ಅವರನ್ನು ಐಪಿಸಿ ಸೆಕ್ಷನ್ 323 (ಸ್ವಯಂಪ್ರೇರಿತವಾಗಿ ಗಾಯಗೊಳಿಸಿದ್ದಕ್ಕಾಗಿ ಶಿಕ್ಷೆ), 324 (ಅಪಾಯಕಾರಿ ಆಯುಧಗಳಿಂದ ಇನ್ನೊಬ್ಬರಿಗೆ ಸ್ವಯಂಪ್ರೇರಣೆಯಿಂದ ಗಾಯಗೊಳಿಸುವುದು), 325 (ಸ್ವಯಂಪ್ರೇರಣೆಯಿಂದ ಘೋರವಾದ ಗಾಯವನ್ನು ಉಂಟುಮಾಡುವುದಕ್ಕಾಗಿ) ಮತ್ತು 506 (ಅಪರಾಧದ ಬೆದರಿಕೆ)ಅಡಿ ತಪ್ಪಿತಸ್ಥರು ಎಂದು ತೀರ್ಪು ನೀಡಿದರು.
ನ್ಯಾಯಾಧೀಶರು ನಾಲ್ವರು ಆರೋಪಿಗಳಿಗೆ ಮೂರು ವರ್ಷಗಳ ಕಠಿಣ ಜೈಲು ಶಿಕ್ಷೆ ವಿಧಿಸಿದರು. ಆದರೆ ಅವರ ವಕೀಲರು ಉನ್ನತ ನ್ಯಾಯಾಲಯದಲ್ಲಿ ಮೇಲ್ಮನವಿ ಸಲ್ಲಿಸಲು ಸಮಯ ಕೋರಿದ ನಂತರ ಅವರಿಗೆ ತಲಾ 50,000 ರೂ. ಶ್ಯೂರಿಟಿ ಮೇಲೆ ಸ್ಥಳದಲ್ಲೇ ಜಾಮೀನು ನೀಡಿದರು.
ಸಿಆರ್ ಪಿಸಿ ಯ ಸೆಕ್ಷನ್ 389 (1) ಮತ್ತು (2) ಅಡಿಯಲ್ಲಿ ಆರೋಪ ಎದುರಿಸುತ್ತಿರುವ ವ್ಯಕ್ತಿ (ಮೂರು ವರ್ಷಗಳನ್ನು ಮೀರದ ಶಿಕ್ಷೆ) ಮೇಲ್ಮನವಿ ಸಲ್ಲಿಸಲು ವಿಚಾರಣಾ ನ್ಯಾಯಾಲಯದಿಂದ ಜಾಮೀನು ಪಡೆಯಬಹುದು.