"ಶಾರೂಖ್ ಜೊತೆ ʻಗೆಳೆತನʼ ಹೊಂದಿದ್ದಕ್ಕೆ ಪ್ರಿಯಾಂಕಾ ಚೋಪ್ರಾರನ್ನು ಬಾಲಿವುಡ್ ನಿಂದ ಬಹಿಷ್ಕರಿಸಿದ್ದ ಕರಣ್ ಜೋಹರ್"

ಮುಂಬೈ: ಖ್ಯಾತ ನಟಿ ಪ್ರಿಯಾಂಕ ಚೋಪ್ರಾ (Priyanka Chopra) ಅವರು ಬಾಲಿವುಡ್‌ ನಟ ಶಾರುಖ್‌ ಖಾನ್‌ ಜೊತೆಗೆ ಹೊಂದಿದ್ದ "ಗೆಳೆತನ"ದ ಕಾರಣದಿಂದ ನಿರ್ಮಾಪಕ ಕರಣ್‌ ಜೋಹರ್‌ (Karan Johar) ಅವರು ಪ್ರಿಯಾಂಕ ಅವರನ್ನು ಬಾಲಿವುಡ್‌ನಿಂದ ʻಬಹಿಷ್ಕರಿಸಿದರುʼ ಎಂಬ ಆಘಾತಕಾರಿ ಆರೋಪವನ್ನು ನಟಿ ಕಂಗನಾ ರಣಾವತ್ (Kangana Ranaut) ಮಾಡಿದ್ದಾರೆ.

ಕರಣ್‌ ಜೋಹರ್‌ ಅವರು ಪ್ರಿಯಾಂಕ ಅವರಿಗೆ ಅದೆಷ್ಟು ಮಟ್ಟಿಗೆ ಕಿರುಕುಳ ನೀಡಿದರೆಂದರೆ ಆಕೆ ಭಾರತ ತೊರೆಯಬೇಕಾಯಿತು ಎಂದು ಸರಣಿ ಟ್ವೀಟ್‌ಗಳಲ್ಲಿ ಕಂಗನಾ ಹೇಳಿಕೊಂಡಿದ್ದಾರೆ.

"ಪ್ರಿಯಾಂಕ ಚೋಪ್ರಾ ಅವರು ಬಾಲಿವುಡ್‌ನ ಜನರೊಂದಿಗೆ ಜಗಳ ಮಾಡಿಕೊಂಡಿದ್ದಕ್ಕೆ ಅಮೆರಿಕಾಗೆ ತೆರಳಬೇಕಾಯಿತು: ಮೂಲೆಗುಂಪು ಮಾಡಲಾಯಿತು, ರಾಜಕೀಯದಿಂದ ಬೇಸತ್ತು ಹೋಗಿತ್ತು," ಎಂಬ ಶೀರ್ಷಿಕೆಯ ಪ್ರಿಯಾಂಕ ಸಂದರ್ಶನದ ವಿವರಗಳನ್ನು ಹೊಂದಿದ್ದ ಲೇಖನವೊಂದನ್ನು ಕಂಗನಾ ಮಂಗಳವಾರ ಟ್ವೀಟ್‌ ಮಾಡಿದ್ದರು.

"ಬಾಲಿವುಡ್‌ ಬಗ್ಗೆ ಪ್ರಿಯಾಂಕ ಚೋಪ್ರಾಗೆ ಇದನ್ನು ಹೇಳಲಿತ್ತು. ಜನರು ಆಕೆಯ ವಿರುದ್ಧ ಗುಂಪು ಕಟ್ಟಿದ್ದರು, ಆಕೆಗೆ ಕಿರುಕುಳ ನೀಡಿ ಚಿತ್ರೋದ್ಯಮದಿಂದ ಹೊರಗಟ್ಟಿದರು, ಸ್ವಯಂ ಪ್ರಯತ್ನದಿಂದ ಮೇಲೆ ಬಂದ ಮಹಿಳೆ ಆಕೆ. ಆಕೆಯನ್ನು ಕರಣ್‌ ಜೋಹರ್‌ ಬಹಿಷ್ಕರಿಸಿದ್ದರೆಂಬುದು ಎಲ್ಲರಿಗೂ ತಿಳಿದಿದೆ," ಎಂದು ಕಂಗನಾ ಬರೆದಿದ್ದಾರೆ.

"ಎಸ್‌ಆರ್‌ಕೆ ಜೊತೆಗೆ ಆಕೆಗಿದ್ದ ಗೆಳೆತನದಿಂದ ಆಕೆ ಕರಣ್‌ ಜೋಹರ್‌ ಕೋಪಕ್ಕೆ ತುತ್ತಾಗಿದ್ದ ಬಗ್ಗೆ ಮಾಧ್ಯಮ ಕೂಡ ವಿಸ್ತೃತವಾಗಿ ವರದಿ ಮಾಡಿತ್ತು. ಎಬಿ ಅಥವಾ ಎಸ್‌ಆರ್‌ಕೆ ದಿನಗಳಲ್ಲಿ ಚಿತ್ರೋದ್ಯಮ ಈ ರೀತಿ ಹೊರಗಿನವರ ಬಗ್ಗೆ ದ್ವೇಷ ಕಾರುತ್ತಿರಲಿಲ್ಲ. ಈ ಮತ್ಸರಿ, ಕೆಟ್ಟ ವ್ಯಕ್ತಿಯನ್ನು ಚಿತ್ರೋದ್ಯಮದ ಸಂಸ್ಕೃತಿ ಮತ್ತು ವಾತಾವರಣ ಕೆಡಿಸಿದ್ದಕ್ಕೆ ಹೊಣೆಗಾರನನ್ನಾಗಿ ಮಾಡಬೇಕು," ಎಂದು ಕಂಗನಾ ಬರೆದಿದ್ದಾರೆ.