ಭಾರೀ ಅಪಘಾತಗಳ ಬಳಿಕ ನೈತಿಕ ನೆಲೆಯಲ್ಲಿ ರಾಜೀನಾಮೆ ನೀಡಿದ್ದ ಇಬ್ಬರು ರೈಲ್ವೆ ಸಚಿವರು

ಹೊಸದಿಲ್ಲಿ: ಶುಕ್ರವಾರ ಒಡಿಶಾದಲ್ಲಿ ಸಂಭವಿಸಿದ ಭೀಕರ ರೈಲು ಅಪಘಾತದ ಬಳಿ ದೇಶದ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ ಅವರ ರಾಜೀನಾಮೆಗೆ ಬೇಡಿಕೆಗಳು ಹೆಚ್ಚತೊಡಗಿವೆ. ನಿನ್ನೆಯ ಅಪಘಾತ ಹಲವು ವರ್ಷಗಳಲ್ಲಿ ದೇಶದಲ್ಲಿ ಸಂಭವಿಸಿದ ಅತ್ಯಂತ ವಿನಾಶಕಾರಿ ದುರಂತಗಳಲ್ಲೊಂದಾಗಿದ್ದು, ಕನಿಷ್ಠ 270 ಜನರು ಮೃತಪಟ್ಟಿದ್ದಾರೆ ಮತ್ತು ಇತರ 900 ಜನರು ಗಾಯಗೊಂಡಿದ್ದಾರೆ.

ಸರಕಾರವು ಕೇವಲ ಐಷಾರಾಮಿ ರೈಲುಗಳ ಮೇಲೆ ಗಮನವನ್ನು ಕೇಂದ್ರೀಕರಿಸುತ್ತಿದೆ ಮತ್ತು ಸಾಮಾನ್ಯ ಜನರು ಪ್ರಯಾಣಿಸುವ ರೈಲುಗಳನ್ನು ಮತ್ತು ಮಾರ್ಗಗಳನ್ನು ನಿರ್ಲಕ್ಷಿಸುತ್ತಿದೆ ಎಂದು ಟ್ವಿಟರ್‌ನಲ್ಲಿ ಆರೋಪಿಸಿರುವ ಸಿಪಿಐ ಸಂಸದ ಬಿನೋಯ್ ವಿಶ್ವಂ ಅವರು, ಒಡಿಶಾ ಸಾವುಗಳು ಇದರ ಫಲಶ್ರುತಿಯಾಗಿದ್ದು, ರೈಲ್ವೆ ಸಚಿವರು ರಾಜೀನಾಮೆ ನೀಡಬೇಕು ಎಂದು ಆಗ್ರಹಿಸಿದ್ದಾರೆ.

ಇಂತಹ ರಾಜೀನಾಮೆಗೆ ಪೂರ್ವನಿದರ್ಶನಗಳಿವೆ. 1956ರಲ್ಲಿ ಲಾಲ್ ಬಹಾದೂರ ಶಾಸ್ತ್ರಿಯವರು ಎರಡು ಸಲ ರೈಲ್ವೆ ಸಚಿವರ ಹುದ್ದೆಗೆ ರಾಜೀನಾಮೆ ನೀಡಲು ಮುಂದಾಗಿದ್ದರು. ಆ ಎರಡೂ ಸಂದರ್ಭಗಳಲ್ಲಿ ನೂರಕ್ಕೂ ಅಧಿಕ ಜನರನ್ನು ಬಲಿ ತೆಗೆದುಕೊಂಡಿದ್ದ ಬೃಹತ್ ಅಪಘಾತಗಳ ಹೊಣೆಯನ್ನು ಹೊತ್ತುಕೊಳ್ಳಲು ಅವರು ಬಯಸಿದ್ದರು. ಆ ವರ್ಷದ ಆಗಸ್ಟ್‌ನಲ್ಲಿ ಆಂಧ್ರಪ್ರದೇಶದಲ್ಲಿ ಸಂಭವಿಸಿದ್ದ ರೈಲು ಅಪಘಾತದಲ್ಲಿ 112 ಜನರು ಸಾವನ್ನಪ್ಪಿದ ಬಳಿಕ ಶಾಸ್ತ್ರಿಯವರು ಆಗಿನ ಪ್ರಧಾನಿ ಜವಾಹರಲಾಲ ನೆಹರು ಅವರಿಗೆ ತನ್ನ ರಾಜೀನಾಮೆಯನ್ನು ಸಲ್ಲಿಸಿದ್ದರಾದರೂ ನೆಹರು ಅದನ್ನು ಸ್ವೀಕರಿಸಿರಲಿಲ್ಲ, ನವಂಬರ್‌ನಲ್ಲಿ ತಮಿಳುನಾಡಿನಲ್ಲಿ ಸಂಭವಿಸಿದ್ದ ಇನ್ನೊಂದು ಭೀಕರ ಅಪಘಾತದಲ್ಲಿ 144 ಜನರು ಮೃತಪಟ್ಟಿದ್ದಾಗಲೂ ಶಾಸ್ತ್ರಿ ರಾಜೀನಾಮೆಯನ್ನು ಸಲ್ಲಿಸಿದ್ದರು ಮತ್ತು ನೆಹರು ಅದನ್ನು ಮನಸ್ಸಿಲ್ಲದ ಮನಸ್ಸಿನಿಂದ ಒಪ್ಪಿಕೊಂಡಿದ್ದರು.

ಸ್ವತಂತ್ರ ಭಾರತದಲ್ಲಿ ಭಾರೀ ದುರಂತಗಳ ಬಳಿಕ ರೈಲ್ವೆ ಸಚಿವರು ತಮ್ಮ ರಾಜೀನಾಮೆಗಳ ಕೊಡುಗೆಯನ್ನು ಮುಂದಿರಿಸುವುದು ಪರಿಪಾಠವಾಗಿಬಿಟ್ಟಿದೆ. ಶಾಸ್ತ್ರಿಯವರ ಬಳಿಕ ವಿವಿಧ ರಾಜಕೀಯ ರಂಗಗಳ ರೈಲ್ವೆ ಸಚಿವರು ತಮ್ಮ ಅಧಿಕಾರಾವಧಿಯಲ್ಲಿ ನಡೆದಿದ್ದ ರೈಲು ಅಪಘಾತಗಳ ಹೊಣೆಯನ್ನು ಹೊತ್ತುಕೊಂಡು ರಾಜೀನಾಮೆಗೆ ಮುಂದಾಗಿದ್ದರು. ಆದರೆ ಈ ಎಲ್ಲ ವರ್ಷಗಳಲ್ಲಿ ತಮ್ಮ ರಾಜೀನಾಮೆ ಅಂಗೀಕರಿಸಲ್ಪಟ್ಟ ಬಳಿಕ ಕೇವಲ ಇಬ್ಬರು ರೈಲ್ವೆ ಸಚಿವರು ಮಾತ್ರ ಹುದ್ದೆಯನ್ನು ತೊರೆದಿದ್ದರು. ಓರ್ವರು ಶಾಸ್ತ್ರಿಯವರಾಗಿದ್ದರೆ ಇನ್ನೋರ್ವರು ನಿತೀಶ್ ಕುಮಾರ್. 1999ರಲ್ಲಿ 290 ಪ್ರಯಾಣಿಕರ ಸಾವಿಗೆ ಕಾರಣವಾಗಿದ್ದ ಅಸ್ಸಾಮಿನಲ್ಲಿ ಸಂಭವಿಸಿದ್ದ ಭಾರೀ ರೈಲು ಅಪಘಾತದ ಬಳಿಕ ನಿತೀಶ್ ರೈಲ್ವೆ ಸಚಿವರ ಹುದ್ದೆಗೆ ರಾಜೀನಾಮೆ ನೀಡಿದ್ದರು.

2000ನೇ ಸಾಲಿನಲ್ಲಿ ಆಗ ಎನ್‌ಡಿಎ ಸರಕಾರದಲ್ಲಿ ಸಚಿವೆಯಾಗಿದ್ದ ಮಮತಾ ಬ್ಯಾನರ್ಜಿ ತೈಲ ಬೆಲೆ ಏರಿಕೆಯ ಕುರಿತು ಒಮ್ಮೆ ಹಾಗೂ 43 ಜನರ ಸಾವು ಮತ್ತು 100 ಜನರು ಗಾಯಗೊಳ್ಳಲು ಕಾರಣವಾಗಿದ್ದ ರೈಲು ಅಪಘಾತದ ಬಳಿಕ ಮತ್ತೊಮ್ಮೆ ರಾಜೀನಾಮೆಯನ್ನು ಸಲ್ಲಿಸಿದ್ದರು. ಆದರೆ ಆಗಿನ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿಯವರು ರಾಜೀನಾಮೆಯನ್ನು ತಿರಸ್ಕರಿಸಿದ್ದರು.

ಪ್ರಧಾನಿ ನರೇಂದ್ರ ಮೋದಿ ಅವರ ಮೊದಲ ಅಧಿಕಾರಾವಧಿಯಲ್ಲಿ ಅವರ ರೈಲ್ವೆ ಸಚಿವರಾಗಿದ್ದ ಸುರೇಶ ಪ್ರಭು ಅವರು ಸರಣಿ ಅಪಘಾತಗಳ ಬಳಿಕ ಹುದ್ದೆಗೆ ರಾಜೀನಾಮೆಯನ್ನು ನೀಡಲು ಮುಂದಾಗಿದ್ದರು. ಈ ಪೈಕಿ ಕಾನ್ಪುರದ ಸಮೀಪ ಪಟ್ನಾ-ಇಂದೋರ ಎಕ್ಸ್‌ಪ್ರೆಸ್‌ನ 14 ಬೋಗಿಗಳು ಹಳಿ ತಪ್ಪಿ 150 ಜನರು ಕೊಲ್ಲಲ್ಪಟ್ಟಿದ್ದರು. ಆಗ ಪ್ರಭು ಅವರ ರಾಜೀನಾಮೆಯು ಸ್ವೀಕೃತಗೊಂಡಿರಲಿಲ್ಲ, ಆದರೆ ಅವರನ್ನು ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯಕ್ಕೆ ವರ್ಗಾಯಿಸಲಾಗಿತ್ತು ಮತ್ತು ಪಿಯೂಷ ಗೋಯಲ್ ನೂತನ ರೈಲ್ವೆ ಸಚಿವರಾಗಿ ನೇಮಕಗೊಂಡಿದ್ದರು.

ಕೃಪೆ: thenewsminute.com