ಇದ್ರೀಶ್ ಪಾಷಾ ಕುಟುಂಬಕ್ಕೆ ಪರಿಹಾರ ನೀಡಿದ್ದಕ್ಕೆ ಸಿಎಂಗೆ ಕೊಲೆ ಆರೋಪಿ ಪುನೀತ್ ಕೆರೆಹಳ್ಳಿ ಎಚ್ಚರಿಕೆ; ವೀಡಿಯೊ ವೈರಲ್

ಬೆಂಗಳೂರು: ರಾಮನಗ ಜಿಲ್ಲೆಯ ಕನಕಪುರ ತಾಲೂಕಿನ ಸಾತನೂರಿನ ಬಳಿ ಕೊಲೆಯಾದ ಮಂಡ್ಯದ ಗುತ್ತಲು ನಿವಾಸಿ ಇದ್ರೀಶ್ ಪಾಷಾ ಕುಟುಂಬಕ್ಕೆ ಪರಿಹಾರ ನೀಡಿದ್ದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಕೊಲೆ ಆರೋಪಿ ಪುನೀತ್ ಕೆರೆಹಳ್ಳಿ ಎಚ್ಚರಿಕೆ ನೀಡಿರುವ ವೀಡಿಯೊ ಒಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. 

ಪುನೀತ್ ಕೆರೆಹಳ್ಳಿ ಇದ್ರೀಶ್ ಪಾಶಾ ಕೊಲೆ ಪ್ರಕರಣದಲ್ಲಿ ಆರೋಪಿಯಾಗಿದ್ದು, ಇತ್ತೀಚೆಗೆ ಜಾಮೀನಿನ ಮೇಲೆ ಬಿಡುಗಡೆಯಾಗಿದ್ದಾನೆ.

ಇದೀಗ ಈತ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಎಚ್ಚರಿಕೆ ನೀಡಿರುವ ವೀಡಿಯೊವನ್ನು ಈತ ತನ್ನ ಫೇಸ್ ಬುಕ್ ನಲ್ಲಿ  ಹರಿಬಿಟ್ಟಿದ್ದಾನೆ. 

ವೀಡಿಯೋದಲ್ಲಿ, '' ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಕಾಂಗ್ರೆಸ್ ಸರಕಾರ ಗೋವು ಸಾಗಿಸುವ ವ್ಯಕ್ತಿಗೆ  25 ಲಕ್ಷ ರೂ. ಪರಿಹಾರವನ್ನು ಕೊಟ್ಟಿದೆ. ಇದು ಯಾವ ಆಧಾರದಲ್ಲಿ ಕೊಡಲಾಗಿದೆ?, ಯಾಕೆ ಬಹು ಸಂಖ್ಯಾತ ಹಿಂದೂಗಳ ಮೇಲೆ ದಬ್ಬಾಳಿಕೆ ಮಾಡುತ್ತಿದ್ದೀರಿ? ಯಾಕೆ ನಮ್ಮಂತ ಗೋ ರಕ್ಷಕರ ಹೊಟ್ಟೆ ಉರಿಸುತ್ತಿದ್ದೀರಾ? ಎಂದು ಪ್ರಶ್ನೆ ಮಾಡಿದ್ದಾನೆ. 

''ನೀವು ಕೊಲೆಗೆ ಪ್ರಚೋದನೆ ಕೊಡುತ್ತಿದ್ದೀರಾ?  ಗೋ ಸಾಗಾಟಕ್ಕೆ ನೀವು ಪ್ರಚೋದನೆ ಕೊಡುತ್ತಿದ್ದೀರಾ? ಆ ಗೋ ಮಾತೆ ನಿಮ್ಮನ್ನು ಸುಮ್ಮನೆ ಬಿಡಲ್ಲ, ಗೋ ಮಾತೆಯ ಶಾಪ ನಿಮಗೆ ತಟ್ಟುತ್ತೆ. ನೀವೆಲ್ಲ ಅನುಭವಿಸುತ್ತೀರಿ. ನೀವು ಇದ್ರೀಶ್ ಕುಟುಂಬಕ್ಕೆ ಪರಿಹಾರ ನೀಡಿದ್ದ ಕಾರಣ ಕೊಡಿ. ಎಲ್ಲ ಹಿಂದೂಗಳು ಇದನ್ನು ಪ್ರಶ್ನೆ ಮಾಡಬೇಕು. ನಮ್ಮ ತೆರಿಗೆ ಹಣವನ್ನು ಯಾವ ಆಧಾರದಲ್ಲಿ ಆ ವ್ಯಕ್ತಿಯ ಕುಟುಂಬಕ್ಕೆ ಪರಿಹಾರ ಕೊಟ್ಟಿದ್ದೀರಿ?'' ಎಂದು ಪ್ರಶ್ನೆ ಮಾಡಿದ್ದಾನೆ.