ಅತಿಯಾದ ಕೀಟನಾಶಕ ಬಳಕೆಯಿಂದ ಜೇನುಗೂಡು ಕಣ್ಮರೆ!

ಹೊಸಕೋಟೆ : ಹೂವಿನ ಮಕರಂದ ಹೀರುವು ದರ ಜತೆಗೆ ನೈಸರ್ಗಿಕ ಪರಾಗಸ್ಪರ್ಶ ಮಾಡುವ ಹಾಗೂ ಸಿಹಿಜೇನು ನೀಡುವ ಜೇನುಹುಳು ಸಂತತಿಗೆ ಸದ್ದಿಲ್ಲದೇ ವಿಷ ಉಣಿಸಲಾಗುತ್ತಿದೆ. ಕೃಷಿ ಪರಿಸರದ ನಂಜು ತಾಳದೆ ಜೇನು ಕುಟುಂಬಗಳ ಸಂಖ್ಯೆ ಗಣನೀಯವಾಗಿ ಕುಸಿದಿದ್ದು, ವರ್ಷದಿಂದ ವರ್ಷಕ್ಕೆ ಜೇನುಹುಳುಗಳ ಪರಿವಾರ ಬಲಿಯಾಗುತ್ತಿರುವುದು ಪರಿಸರ ಪ್ರೇಮಿಗಳಲ್ಲಿ ಆತಂಕ ಸೃಷ್ಟಿಸಿದೆ.

ಕೃಷಿಯಲ್ಲಿ ಯಾಂತ್ರೀಕರಣ, ಅರಣ್ಯ ನಾಶ, ಅತಿಯಾದ ಕೀಟನಾಶಕ ಬಳಕೆ ಮತ್ತು ಜೇನಿಗೆ ಅಗತ್ಯವಾಗಿ ಬೇಕಿರುವ ಸಸ್ಯವರ್ಗಗಳ ನಾಶವೇ ಇದಕ್ಕೆ ಕಾರಣವಾಗಿದೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳಲ್ಲಿ ಹೇರಳವಾಗಿ ಬೆಳೆಯುವುದು ತರಕಾರಿ. ಬಿತ್ತನೆ ಬೀಜ ಸಹಜವಾಗಿಯೇ ಬಹುರಾಷ್ಟ್ರೀಯ ಕಂಪೆನಿಗಳಿಗೆ ಸೇರಿದ ಕಾರಣ ರೋಗಗಳೂ ಅಧಿಕ. ಹಾಗಾಗಿ ಅತೀ ಹೆಚ್ಚು ಎನ್ನುವಷ್ಟರ ಮಟ್ಟಿಗೆ ಕೀಟನಾಶಕಗಳನ್ನು ಈ ಭಾಗದ ರೈತರು ಬಳಕೆ ಮಾಡುತ್ತಿದ್ದಾರೆ.

ಈಗ ಕಣ್ಣಿಗೆ ಜೇನು ನೊಣ ಕಂಡರೆ ನೆನಪಾಗುವುದು ಸಿಹಿಯಾದ ಜೇನು. ಹಿಂದೆ ಬಯಲು ಸೀಮೆ ಭಾಗದ ಕುರುಚಲು ಕಾಡು, ಬೆಟ್ಟಗುಡ್ಡದ ಕಲ್ಲುಬಂಡೆಗಳಲ್ಲಿ ಹೇರಳವಾಗಿ ಕಟ್ಟುತ್ತಿದ್ದ ಜೇನುಗಳು ಈಗ ಬಹುತೇಕ ಕಣ್ಮರೆಯಾಗಿದೆ.

ಪ್ರಸ್ತುತ ಅಳಿದುಳಿದಿರುವ ಜೇನು ಸಂತತಿಗೂ ಸಂಕಷ್ಟ ಎದುರಾಗಿದೆ. ಕೃಷಿಯಲ್ಲಿ ಯಾಂತ್ರೀಕರಣ, ಅರಣ್ಯ ನಾಶ, ಅತಿಯಾದ ಕೀಟನಾಶಕ ಬಳಕೆ ಮತ್ತು ಜೇನಿಗೆ ಅಗತ್ಯವಾಗಿ ಬೇಕಿರುವ ಸಸ್ಯವರ್ಗಗಳ ನಾಶವೇ ಇದಕ್ಕೆ ಕಾರಣವಾಗಿದೆ. ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳಲ್ಲಿ ಹೇರಳವಾಗಿ ಬೆಳೆಯುವುದು ತರಕಾರಿ. ಬಿತ್ತನೆ ಬೀಜ ಸಹಜವಾಗಿಯೇ ಬಹುರಾಷ್ಟ್ರೀಯ ಕಂಪೆನಿಗಳಿಗೆ ಸೇರಿದ ಕಾರಣ ರೋಗಗಳೂ ಅಧಿಕ. ಹಾಗಾಗಿ ಅತಿ ಹೆಚ್ಚು ಎನ್ನುವಷ್ಟರ ಮಟ್ಟಿಗೆ ಕೀಟನಾಶಕಗಳನ್ನು ಈ ಭಾಗದ ರೈತರು ಬಳಕೆ ಮಾಡುತ್ತಿದ್ದಾರೆ.

ಹೆಚ್ಚು ಕೀಟನಾಶಕ ಬಳಕೆ :

ದ್ರಾಕ್ಷಿ, ದಾಳಿಂಬೆ, ಗುಲಾಬಿ, ಸೇವಂತಿ ಹೂವು ಸಹಿತ ಇತರ ಬೆಳೆಗಳ ಸಂರಕ್ಷಣೆಗೆ ಸಹಜವಾಗಿ ವಾರಕ್ಕೆ ೩ ಬಾರಿಯಾದರೂ ಕೀಟನಾಶಕಗಳ ಸಿಂಪಡಣೆಯ ಕಾರ್ಯ ಮಾಡಲೇಬೇಕಾದ ಅನಿವಾರ್ಯ ರೈತರದ್ದಾಗಿದೆ.

ಅವನತಿಯತ್ತ ಜೇನು ಹುಳ :

ಹೆಚ್ಚಾಗಿ ಔಷಧ ಸಿಂಪಡಿಸಿದ ಹೂವುಗಳ ಮೇಲೆ ಜೇನು ನೊಣಗಳು ಮಕರಂದ ಹೀರಿದ ಕೂಡಲೇ ಸ್ಥಳದಲ್ಲೆ ಸಾಯುತ್ತವೆ. ಕಡಿಮೆ ವಿಷದ ಅಂಶದ ಮಕರಂದವನ್ನು ಗೂಡಿನವರೆಗೆ ತಂದರೂ ರಾಣಿ ನೊಣ ವಿಷಕಾರಿ ಮಕರಂದ ಸೇವಿಸಿ ಸಾವನ್ನಪ್ಪುತ್ತಿವೆ. ಜೇನು ನೊಣಗಳ ವಂಶಾಭಿವೃದ್ಧಿ ಮಾಡುವ ರಾಣಿ ನೊಣವೇ ಸತ್ತ ಮೇಲೆ ಜೇನುಗೂಡು ಅನಾಥವಾಗುವ ಜೊತೆಗೆ ಅಭಿವೃದ್ಧಿ ಇಲ್ಲದೆ ಕೆಲವೇ ದಿನಗಳಲ್ಲಿ ಅವನತಿ ಹೊಂದುತ್ತಿವೆ.

ಬೇಸಿಗೆಯಲ್ಲಿ ಹೇರಳ :

ಬಯಲು ಸೀಮೆ ಭಾಗಗಳಲ್ಲಿ ಸಹಜವಾಗಿ ಬೇಸಿಗೆಯಲ್ಲಿ ಮಾತ್ರ ಜೇನು ಹೇರಳವಾಗಿ ಸಿಗಲಿದೆ. ಕಾರಣ ಇಲ್ಲಿರುವ ಜೇನು ನೊಣಗಳಿಗೆ ಅಗತ್ಯವಿರುವ ಸಸ್ಯವರ್ಗವಾದ ಹೊಂಗೆ ಮತ್ತು ಬೇವಿನ ಮರಗಳು ಹೂವು ಬಿಡುವುದು ಯುಗಾದಿ ವೇಳೆ ನೂತನ ಚಿಗುರು ಬಂದ ನಂತರ. ಹಾಗಾಗಿ ಮಳೆಗಾಲದಲ್ಲಿ ಪೂರ್ತಿ ತಟಸ್ಥವಾಗಿರುವ ಜೇನು ಬೇಸಿಗೆ ಆರಂಭವಾಗುತ್ತಿದ್ದಂತೆ ಚುರುಕಾಗುತ್ತದೆ. ಈ ಸಂದರ್ಭದಲ್ಲಿ ಹೆಚ್ಚಿನ ಜೇನು ಸಂಗ್ರಹಿಸುತ್ತವೆ.

ರೈತರಿಗೆ ಬಹುಪಯೋಗಿ :

ಜೇನು ನೊಣಗಳು ಪ್ರತ್ಯೇಕವಾಗಿ ಮತ್ತು ಪರೋಕ್ಷವಾಗಿ ರೈತರ ಸಹಕಾರಿಯಾಗಿವೆ. ಅಪಾರವಾದ ಜೇನು ತುಪ್ಪ ಶೇಖರಿಸುವ ಮೂಲಕ ಉತ್ತಮ ಪೌಷ್ಟಿಕಾಂಶಯುಕ್ತ ಆಹಾರವನ್ನು ನೀಡುವುದು ಮಾತ್ರವಲ್ಲದೆ, ರೈತರ ಬೆಳೆಗಳಲ್ಲಿ ಪರಾಗಸ್ಪರ್ಶ ಪ್ರಕ್ರಿಯೆಯಿಂದ ರೈತರಿಗೆ ಬಹುಪಯೋಗಿಗಳಾಗಿವೆ.

ರೈತನೇ ಕಾರಣ :

ಬೆಳೆಗಳಲ್ಲಿ ಪರಾಗಸ್ಪರ್ಶ ಪ್ರಮುಖ ಘಟ್ಟವಾಗಿದ್ದು, ರೈತರ ಬೆಳೆಗಳು ಕಾಯಿ ಕಟ್ಟಿ ಉತ್ತಮ ಫಸಲು ಬರಲು ಕೀಟಗಳು ಪ್ರಮುಖ ಪಾತ್ರವಹಿಸುತ್ತವೆ. ರೈತನಿಗೆ ಸಹಕಾರಿಯಾಗಿರುವ ಜೇನಿನ ನಾಶಕ್ಕೆ ರೈತನಿಗೆ ಅರಿವಿಲ್ಲದೆ ರೈತನೇ ಕಾರಣವಾಗಿರುವುದು ವಿಪರ್ಯಾಸವಾಗಿದೆ

ನಿಂತ ಜೇನು ಕೀಳುವ ಕಾಯಕ :

ಹಿಂದೆ ಗ್ರಾಮೀಣ ಪ್ರದೇಶದಲ್ಲಿ ಕೆಲವು ಕುಟುಂಬಗಳು ಜೇನು ಕೀಳುವ ಕಾಯಕವನ್ನು ವೃತ್ತಿಯಾಗಿ ಮಾರ್ಪಡಿಸಿಕೊಂಡಿದ್ದರು. ಶುದ್ಧವಾದ ಜೇನು ತುಪ್ಪವನ್ನು ಸಂಗ್ರಹಿಸಿ ಕಡಿಮೆ ಬೆಲೆಗೆ ಮಾರಾಟ ಮಾಡಿ ಜೀವನವನ್ನು ಸಾಗಿಸುತ್ತಿದ್ದವು. ಕಾಲ ಕಳೆದಂತೆ ಜೇನು ಸಂತತಿ ಅವನತಿಯತ್ತ ಸಾಗಿದ ಪರಿಣಾಮ ಈ ವೃತ್ತಿಯನ್ನು ನಂಬಿದ ಕುಟುಂಬಗಳು ಜೇನು ಕೀಳುವ ಕಾಯಕಕ್ಕೆ ವಿದಾಯ ಹೇಳಿದ್ದಾರೆ.