ಬೀದರ್ | ಶಾಲಾ ವಾಹನ ಢಿಕ್ಕಿ: ಬೈಕ್ ಸವಾರ ಮೃತ್ಯು

ಬೀದರ್: ಬೈಕಿಗೆ ಶಾಲಾ ವಾಹನ ಢಿಕ್ಕಿ ಹೊಡೆದ ಪರಿಣಾಮ ಬೈಕ್ ಸವಾರ ಸ್ಥಳದಲ್ಲೇ ಮೃತಪಟ್ಟಿರುವ ಘಟನೆ ಬೀದರ್ ನಗರದ ಹೊರವಲಯದ ರಿಂಗ್ ರಸ್ತೆಯ ಚಿಕ್ಕ್ ಪೇಟ್ ಬಳಿ ನಡೆದಿದೆ.

ಬೀದರ್ ತಾಲೂಕಿನ ಅಲಿಅಂಬರ್ ಗ್ರಾಮದ ನಿವಾಸಿ ಮಸ್ತಾನ್ ಸಾಬ್ ಬಾಷಾ ಮಿಯ್ಯಾ(45) ಮೃತಪಟ್ಟ ಬೈಕ್ ಸವಾರ.

ಮಸ್ತಾನ್ ಸಾಬ್ ಗುರುವಾರ ಮಧ್ಯಾಹ್ನ ಚಿಕ್ಕಪೇಟೆ ಹತ್ತಿರ ಬೈಕಿನಲ್ಲಿ ತೆರಳುತ್ತಿದ್ದ ವೇಳೆ ಶಾಲಾ ವಾಹನ ಢಿಕ್ಕಿ ಹೊಡೆದಿದೆ ಎನ್ನಲಾಗಿದೆ. ಇದರಿಂದ ರಸ್ತೆಗೆ ಎಸೆಯಲ್ಪಟ್ಟ ಅವರು ಸ್ಥಳದಲ್ಲೇ ಕೊನೆಯುಸಿರೆಳೆದಿದ್ದಾರೆ.

ಈ ಕುರಿತು ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.