ಎಲಾನ್ ಮಸ್ಕ್ ಪುತ್ರ ಸಿಂಬಳ ಒರೆಸಿದ್ದಕ್ಕೆ 145 ವರ್ಷಗಳಷ್ಟು ಪುರಾತನವಾದ ಐತಿಹಾಸಿಕ ರೆಸಲ್ಯೂಟ್ ಡೆಸ್ಕ್ ಬದಲಿಸಿದರೆ ಟ್ರಂಪ್?

ವಾಶಿಂಗ್ಟನ್: ಸರಕಾರಿ ವೆಚ್ಚ ಇಲಾಖೆಯ ಮುಖ್ಯಸ್ಥ ಎಲಾನ್ ಮಸ್ಕ್, ತಮ್ಮ ನಾಲ್ಕು ವರ್ಷದ ಪುತ್ರನೊಂದಿಗೆ ಓವಲ್ ಕಚೇರಿಗೆ ಭೇಟಿ ನೀಡಿದ ನಂತರ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ 145 ವರ್ಷಗಳಷ್ಟು ಪುರಾತನವಾದ ಐತಿಹಾಸಿಕ ರೆಸಲ್ಯೂಟ್ ಡೆಸ್ಕ್ ಅನ್ನು ತಾತ್ಕಾಲಿಕವಾಗಿ ಬದಲಿಸಲು ಆದೇಶಿಸಿದ್ದು, ಅದರ ಬದಲು ತಮ್ಮ ಕಚೇರಿಯಲ್ಲಿ ಸಿ ಆ್ಯಂಡ್ ಒ ಡೆಸ್ಕ್ ಅಳವಡಿಸಲು ಸೂಚಿಸಿದ್ದಾರೆ. ಡೊನಾಲ್ಡ್ ಟ್ರಂಪ್ ರ ಈ ದಿಢೀರ್ ನಿರ್ಧಾರ ಹಲವು ಊಹಾಪೋಹಗಳಿಗೆ ಕಾರಣವಾಗಿದೆ.

ಕಳೆದ ವಾರ ಸರಕಾರಿ ವೆಚ್ಚವನ್ನು ತಗ್ಗಿಸುವ ಕಾರ್ಯಾದೇಶಗಳಿಗೆ ಸಹಿ ಮಾಡಲು ಸರಕಾರಿ ವೆಚ್ಚ ಇಲಾಖೆ ಮುಖ್ಯಸ್ಥ ಎಲಾನ್ ಮಸ್ಕ್ ತಮ್ಮ ನಾಲ್ಕು ವರ್ಷದ ಪುತ್ರ ಲಿಟಲ್ ಎಕ್ಸ್ ನೊಂದಿಗೆ ಓವಲ್ ಕಚೇರಿಗೆ ಭೇಟಿ ನೀಡಿದ್ದರು. ಈ ವೇಳೆ ಟಿವಿ ನೇರ ಪ್ರಸಾರವಾಗುತ್ತಿರುವಾಗಲೇ ತನ್ನ ಮೂಗಿನ ಹೊಳ್ಳೆಗಳಿಗೆ ಕೈ ಹಾಕಿದ್ದ ಎಲಾನ್ ಮಸ್ಕ್ ಪುತ್ರ, ಸಿಂಬಳವನ್ನು ಡೊನಾಲ್ಡ್ ಟ್ರಂಪ್ ಆಸೀನರಾಗಿದ್ದ ರೆಸಲ್ಯೂಟ್ ಡೆಸ್ಕ್ ಗೆ ಒರೆಸಿದ್ದನು. ಇದು ಟಿವಿ ಕ್ಯಾಮೆರಾಗಳಲ್ಲಿ ಸೆರೆಯಾಗಿತ್ತು. ಇದರ ಬೆನ್ನಿಗೇ ರೆಸಲ್ಯೂಟ್ ಡೆಸ್ಕ್ ಅನ್ನು ತಾತ್ಕಾಲಿಕವಾಗಿ ಬದಲಿಸುವಂತೆ ಆದೇಶಿಸಿರುವ ಡೊನಾಲ್ಡ್ ಟ್ರಂಪ್, ಅದರ ಬದಲು ಸಿ ಆ್ಯಂಡ್ ಒ ಡೆಸ್ಕ್ ಅನ್ನು ತಮ್ಮ ಕಚೇರಿಯಲ್ಲಿ ಅಳವಡಿಸುವಂತೆ ಸೂಚಿಸಿದ್ದಾರೆ.

145 ವರ್ಷಗಳಷ್ಟು ಪುರಾತನವಾದ ಕಲಾತ್ಮಕ ರೆಸಲ್ಯೂಟ್ ಡೆಸ್ಕ್ ಐತಿಹಾಸಿಕ ಮಹತ್ವ ಹೊಂದಿದೆ. ಈ ಡೆಸ್ಕ್ ಅನ್ನು ಒಂದು ಕಾಲದಲ್ಲಿ ಆರ್ಕ್ಟಿಕ್ ಶೋಧನೆಗಾಗಿ ಬಳಸಿ, ನಂತರ ಕೈಬಿಡಲಾಗಿದ್ದ ಬ್ರಿಟನ್ ನ ಎಚ್ಎಂಎಸ್ ರೆಸಲ್ಯೂಟ್ ಹಡಗಿನಿಂದ ಕೆತ್ತನೆ ಮಾಡಲಾಗಿದೆ. ಈ ಹಡಗನ್ನು 1880ರಲ್ಲಿ ಅಮೆರಿಕ ಅಧ್ಯಕ್ಷ ರುದರ್ ಫೋರ್ಡ್ ಹೇಯ್ ಗೆ ರಾಣಿ ವಿಕ್ಟೋರಿಯಾ ಉಡುಗೊರೆ ನೀಡಿದ್ದರು. ಈ ಐತಿಹಾಸಿಕ ಡೆಸ್ಕ್ ಅನ್ನು ಪಶ್ಚಿಮ ಪಾರ್ಶ್ವದಲ್ಲಿರುವ ಬಹುತೇಕ ಎಲ್ಲ ಅಮೆರಿಕ ನಾಯಕರು ಬಳಸಿದ್ದಾರೆ.

ಈ ಐತಿಹಾಸಿಕ ರೆಸಲ್ಯೂಟ್ ಡೆಸ್ಕ್ ಅನ್ನು ಅಮೆರಿಕದ ನಿಕಟಪೂರ್ವ ಅಧ್ಯಕ್ಷ ಜೋ ಬೈಡನ್, ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಬಳಸಿದ್ದರು. ಜೋ ಬೈಡನ್ ಗೂ ಮುನ್ನ ನಾಲ್ಕು ವರ್ಷಗಳ ಕಾಲ ಅಧ್ಯಕ್ಷರಾಗಿದ್ದ ಡೊನಾಲ್ಡ್ ಟ್ರಂಪ್ ಕೂಡಾ ಈ ಡೆಸ್ಕ್ ಅನ್ನು ತಮ್ಮ ಅಧಿಕಾರಾವಧಿಯುದ್ದಕ್ಕೂ ಬಳಸಿದ್ದರು. ಆದರೀಗ, ದಿಢೀರನೆ ಈ ರೆಸಲ್ಯೂಟ್ ಡೆಸ್ಕ್ ಬದಲಿಸಲು ಆದೇಶಿಸಿರುವ ಡೊನಾಲ್ಡ್ ಟ್ರಂಪ್, ಅಮೆರಿಕದ ಮಾಜಿ ಅಧ್ಯಕ್ಷ ಜಾರ್ಜ್ ಡಬ್ಲ್ಯೂ. ಬುಶ್ ಮತ್ತಿತರರು ಬಳಸಿದ್ದ ಸಿ ಆ್ಯಂಡ್ ಒ ಡೆಸ್ಕ್ ಅನ್ನು ಓವಲ್ ಕಚೇರಿಯಲ್ಲಿ ಅಳವಡಿಸುವಂತೆ ಆದೇಶಿಸಿದ್ದಾರೆ.

1909ರಲ್ಲಿ ಓವಲ್ ಕಚೇರಿ ನಿರ್ಮಾಣವಾದಾಗಿನಿಂದ ಅಲ್ಲಿರುವ ಸಿ ಆ್ಯಂಡ್ ಒ, ತೆಡೋರ್ ರೂಸ್ವೆಲ್ಟ್, ಹೂವರ್, ಜಾನ್ಸನ್ ಹಾಗೂ ವಿಲ್ಸನ್ ಡೆಸ್ಕ್ ಗಳೊಂದಿಗೆ ರೆಸಲ್ಯೂಟ್ ಡೆಸ್ಕ್ ಕೂಡಾ ಜಾಗ ಪಡೆದಿದೆ. ಈ ಡೆಸ್ಕ್ ಅನ್ನು ಅಧ್ಯಕ್ಷೀಯತೆಯ ಸಂಕೇತವಾಗಿ ಅಲ್ಲಿ ಅಳವಡಿಸಲಾಗಿದ್ದು, ಅದು ಪ್ರಾಯೋಗಿಕ ಕೆಲಸದ ಸ್ಥಳವಾವಕಾಶವನ್ನು ಒದಗಿಸುತ್ತಾ ಬರುತ್ತಿದೆ ಎಂದು The Independent ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ರೆಸಲ್ಯೂಟ್ ಡೆಸ್ಕ್ ಅನ್ನು ಬದಲಿಸುತ್ತಿರುವ ಕುರಿತು ಟ್ರುತ್ ಸಾಮಾಜಿಕ ಮಾಧ್ಯಮ ವೇದಿಕೆಯಲ್ಲಿ ಪೋಸ್ಟ್ ಮಾಡಿರುವ ಡೊನಾಲ್ಡ್ ಟ್ರಂಪ್, “ಸುಂದರವಾದ ರೆಸಲ್ಯೂಟ್ ಡೆಸ್ಕ್ ಮರುನವೀಕರಣಗೊಳ್ಳಬೇಕಿರುವುದರಿಂದ, ಅದನ್ನು ತಾತ್ಕಾಲಿಕವಾಗಿ ಬದಲಿಸಲಾಗುತ್ತಿದೆ” ಎಂದು ಸ್ಪಷ್ಟನೆ ನೀಡಿದ್ದಾರೆ. ಆದರೆ, ಎಲಾನ್ ಮಸ್ಕ್ ರ ಪುತ್ರ ತನ್ನ ಸಿಂಬಳವನ್ನು ರೆಸಲ್ಯೂಟ್ ಡೆಸ್ಕ್ ಗೆ ಒರೆಸಿದ್ದರಿಂದಲೇ ಅದನ್ನು ಬದಲಿಸಲಾಗುತ್ತಿದೆ ಎಂಬ ಊಹಾಪೋಹ ಸಾಮಾಜಿಕ ಮಾಧ್ಯಮಗಳಲ್ಲಿ ಹರಿದಾಡುತ್ತಿದೆ.