ಕಲಬುರಗಿ | ಲಾರಿ-ಬೈಕ್ ನಡುವೆ ಢಿಕ್ಕಿ : ಅಪ್ಪ, ಮಗ ಮೃತ್ಯು
ಕಲಬುರಗಿ : ಲಾರಿಯೊಂದು ರಾಂಗ್ ಸೈಡ್‌ ನಿಂದ ಬಂದು ಬೈಕ್‌ಗೆ ಢಿಕ್ಕಿ ಹೊಡೆದ ಪರಿಣಾಮ ಅಪ್ಪ ಮತ್ತು ಮಗ ಸ್ಥಳದಲ್ಲೇ ಮೃತಪಟ್ಟಿದ್ದು, ಮತ್ತಿಬ್ಬರಿಗೆ ಗಾಯಗಳಾಗಿರುವ ಘಟನೆ ನಗರದ ಸುಲ್ತಾನಪುರ ರಿಂಗ್ ರಸ್ತೆಯಲ್ಲಿ ನಡೆದಿರುವುದಾಗಿ ವರದಿಯಾಗಿದೆ.
ಮೃತರನ್ನು ಅಫಜಲಪುರ ತಾಲ್ಲೂಕಿನ ಟಾಕಳಿ ಗ್ರಾಮದ ಮುನೀರ್ ಮಕಾನದಾರ (35) ಮತ್ತು ಅವರ ಮಗ ಅಮೀರ್ ಮಕಾನದಾರ (6) ಎಂದು ಗುರುತಿಸಲಾಗಿದೆ. ಅಪಘಾತದಲ್ಲಿ ಮುನೀರ್ ಪತ್ನಿ ಮಾಶಾ ಮತ್ತು ಎರಡುವರೆ ವರ್ಷದ ಮಗು ಅದ್ನಾನ್ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.
ನಿನ್ನೆ ತವರು ಮನೆಗೆ ಹೋಗಿದ್ದ ಪತ್ನಿ ಮಾಶಾ ಅವರನ್ನು ಮುನೀರ್ ಇಂದು ಬೈಕ್ ನಲ್ಲಿ ಪತ್ನಿ ಹಾಗೂ ಮಕ್ಕಳನ್ನು ಕರೆದುಕೊಂಡು ಸ್ವಗ್ರಾಮವಾದ ಟಾಕಳಿಗೆ ಹೋಗುತ್ತಿದ್ದಾಗ ರಾಂಕ್ ಸೈಡ್‌ ನಿಂದ ಅತೀ ವೇಗ ಹಾಗೂ ಅಲಕ್ಷತನದಿಂದ ಬಂದ ಲಾರಿಯೊಂದು ಢಿಕ್ಕಿ ಹೊಡೆದಿದ್ದು, ಬೈಕ್ ನಲ್ಲಿದ್ದ ತಂದೆ ಮುನೀರ್ ಹಾಗೂ ಮಗ ಅಮೀನ್ ಇಬ್ಬರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ ಎನ್ನಲಾಗಿದೆ.
ಘಟನಾ ಸ್ಥಳಕ್ಕೆ ಡಿಸಿಪಿ ಕನೀಕಾ ಸಿಕ್ರೆವಾಲ್ ಭೇಟಿ ನೀಡಿ, ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದು, ಸಂಚಾರಿ ಪೊಲೀಸ್ ಠಾಣೆ-2ರಲ್ಲಿ ಪ್ರಕರಣ ದಾಖಲಾಗಿದೆ ಎಂದು ತಿಳಿದು ಬಂದಿದೆ.
