ಕಲಬುರಗಿ | ಜಿಲ್ಲಾ ಮಟ್ಟದ ಯುವಜನೋತ್ಸವಕ್ಕೆ ಶಾಸಕ ಅಲ್ಲಮಪ್ರಭು ಪಾಟೀಲ್ ಚಾಲನೆ

ಕಲಬುರಗಿ : ನಮ್ಮ ನಾಡಿನ ಸಂಸ್ಕೃತಿಯನ್ನು ಉಳಿಸಿ ಹಾಗೂ ಬೆಳಸಿಕೊಂಡು ಹೋಗಲು ಯುವಜನೋತ್ಸವ ಒಂದು ಉತ್ತಮ ವೇದಿಕೆಯಾಗಿದೆ ಎಂದು ದಕ್ಷಿಣ ಮತಕ್ಷೇತ್ರದ ಶಾಸಕ ಅಲ್ಲಮಪ್ರಭು ಪಾಟೀಲ್ ಅಭಿಪ್ರಾಯಪಟ್ಟರು.

ನಗರದ ಚಂದ್ರಶೇಖರ ಪಾಟೀಲ್ ಕ್ರೀಡಾಂಗಣದಲ್ಲಿ ಜಿಲ್ಲಾಡಳಿತ, ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ, ನೆಹರು ಯುವ ಕೇಂದ್ರ, ಜಿಪಂ ವತಿಯಿಂದ ಶನಿವಾರ ಆಯೋಜಿಸಿದ್ದ ʼಜಿಲ್ಲಾ ಮಟ್ಟದ ಯುವಜನೋತ್ಸವʼಕ್ಕೆ ಚಾಲನೆ ನೀಡಿ ಮಾತನಾಡಿದ ಅವರು, ಜಾನಪದ ಸಂಸ್ಕೃತಿ ಉಳಿಸುವಲ್ಲಿ ಈ ಕಾರ್ಯಕ್ರಮ ಪ್ರಮುಖ ಪಾತ್ರ ವಹಿಸುತ್ತದೆ ಎಂದರು.

ವಿದ್ಯಾರ್ಥಿಗಳಿಗೆ ತಮ್ಮಲ್ಲಿನ ಪ್ರತಿಭೆ ತೋರಿಸಲು ಯುವಜನೋತ್ಸವ ವೇದಿಕೆಯಾಗಿದೆ. ಈ ಅವಕಾಶವನ್ನು ಬಳಸಿಕೊಳ್ಳಬೇಕು. ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳಬೇಕು ಎನ್ನುವ ಕಾರಣಕ್ಕೆ ಈ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದರು.

ಜಿಲ್ಲಾಧಿಕಾರಿ ಫೌಝಿಯಾ ತರನ್ನುಮ್ ಮಾತನಾಡಿ, ಯುವಜನೋತ್ಸವದ ಅಂಗವಾಗಿ ಕಲೆ, ಸಾಹಿತ್ಯ, ಸಂಗೀತ, ನೃತ್ಯ ಸೇರಿದಂತೆ ಇತರ ಜಾನಪದ ಕಲೆಗಳನ್ನು ಆಯೋಜಿಸಿ ಪ್ರಜ್ಞಾವಂತ ಯುವ ಕಲಾ ಪ್ರತಿಭೆ ಗುರುತಿಸುವ ಉದ್ದೇಶದಿಂದ ಅವರ ಪ್ರತಿಭೆಗಳನ್ನು ಗ್ರಾಮ ಮಟ್ಟದಿಂದ ರಾಜ್ಯ, ರಾಷ್ಟ್ರಮಟ್ಟದವರೆಗೆ ಅನಾವರಣಗೊಳಿಸುವುದೇ ಯುವಜನೋತ್ಸವದ ಮುಖ್ಯ ಉದ್ದೇಶವಾಗಿದೆ. ಯುವಕರು ಹೆಚ್ಚಾಗಿ ಇದರಲ್ಲಿ ಪಾಲ್ಗೊಂಡು ತಮ್ಮ ಪ್ರತಿಭೆ ತೋರಿಸಿ ರಾಜ್ಯ, ರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಪಡೆಯಬೇಕು ಎಂದರು.

ಜಾನಪದ ನೃತ್ಯ, ಜಾನಪದ ಗೀತೆ, (ಗುಂಪು ಮತ್ತು ವೈಯಕ್ತಿಕ), ಭಾಷಣ ಸ್ಪರ್ಧೆ, ಕಥೆ-ಕವಿತೆ ಬರಹ, ಚಿತ್ರಕಲೆ, ಘೋಷಣೆ, ಗುಡಿ ಕೈಗಾರಿಕೆ ಕಲಾ ಪ್ರಕಾರ, ನೇಕಾರಿಕೆ, ಜವಳಿ, ಕೃಷಿ ಉತ್ಪನ್ನಗಳು, ಫೋಟೋಗ್ರಾಫಿ ಸ್ಪರ್ಧೆಗಳಲ್ಲಿ ಸುಮಾರು 150 ವಿದ್ಯಾರ್ಥಿಗಳು ಸ್ಪರ್ಧಿಸಿದ್ದು ಕಂಡು ಬಂತು. ನೃತ್ಯ, ಸಂಗೀತ, ಸಮೂಹ ಗೀತೆ, ನಾಟಕ ಮತ್ತಿತರ ಕಲಾ ಪ್ರಕಾರಗಳನ್ನು ಸ್ಪರ್ಧಿಗಳು ಪ್ರಸ್ತುತಪಡಿಸಿದರು.

ಜಿಪಂ ಸಿಇಒ ಭಂವಾರಸಿoಗ್ ಮೀನಾ, ರಾಜ್ಯ ಯುವ ಪ್ರಶಸ್ತಿ ಪುರಸ್ಕೃತ ಸುರೇಶ ಬಡಿಗೇರ, ಪಿ.ಆರ್.ಪಾಂಡು, ಸಂಜಯ ಬಾಣದ, ಪ್ರವೀಣ ಪುಣೆ, ದೇವೆಂದ್ರ ಕರಡಗಿ, ಅಶೋಕ ಎಂ., ಶಿವಾನಂದ ಅಣಜಗಿ ನಿರ್ವಹಿಸಿದರು.

ರಾಜ್ಯ ಮಟ್ಟಕ್ಕೆ ಆಯ್ಕೆಯಾದ ವಿದ್ಯಾರ್ಥಿಗಳು :

ಜಿಲ್ಲಾ ಮಟ್ಟದ ಯುವಜನೋತ್ಸವ ಸ್ಪರ್ಧಿಗಳು ರಾಜ್ಯಮಟ್ಟಕ್ಕೆ ಆಯ್ಕೆಯಾದರು. ಜಾನಪದ ಗೀತೆ ಮಲ್ಲಿಕಾರ್ಜುನ ಮತ್ತು ತಂಡ ಶರಣ ಬಸವೇಶ್ವರ ಕಲಾ ಕಾಲೇಜು(ಪ್ರಥಮ), ಜಾನಪದ ನೃತ್ಯ ಲಕ್ಷ್ಮಿ ಶರಣ ಬಸವೇಶ್ವರ ವಾಣಿಜ್ಯ ಕಾಲೇಜು(ಪ್ರಥಮ), ಜಾನಪದ ಗೀತೆ ವೈಯಕ್ತಿಕ ಸಿಂಧು ಪಾಟೀಲ್ ಶರಣ ಬಸವೇಶ್ವರ ಕಲಾ ಕಾಲೇಜು(ಪ್ರಥಮ), ಜಾನಪದ ನೃತ್ಯ ವೈಯಕ್ತಿಕ ಮಧುಶ್ರೀ ಡಾ.ಅಂಬೇಡ್ಕರ ಪದವಿ ಮಹಾವಿದ್ಯಾಲಯ(ಪ್ರಥಮ), ಭಾಷಣ ಸ್ಪರ್ಧೆ ವೈಯಕ್ತಿಕ ಸಿಮ್ರಾನ್ ಸುಲ್ತಾನ(ಪ್ರಥಮ), ಕವಿತೆ ಬರಹ ವೈಯಕ್ತಿಕ ಸುಷ್ಮಿತಾ ಶಿವಕುಮಾರ(ಪ್ರಥಮ), ಕಥೆ ಬರಹ ವೈಯಕ್ತಿಕ ಆಶಾರಾಣಿ ಸಿ.ಸಿ.ಆಳಂದ(ಪ್ರಥಮ), ಚಿತ್ರಕಲೆ ವೈಯಕ್ತಿಕ ಸಂಜನ ಕಲಬುರಗಿ(ಪ್ರಥಮ), ಛಾಯಾ ಗ್ರಹಣ ವೈಯಕ್ತಿಕ ಮನೋಜ ಕಲಬುರಗಿ(ಪ್ರಥಮ) ರಾಜ್ಯ ಮಟ್ಟಕ್ಕೆ ಆಯ್ಕೆಯಾದರು.