'ನಮ್ಮ ಅತ್ತೆ ಬೇಗ ಸಾಯಬೇಕು ಸ್ವಾಮಿ': ದೇವಸ್ಥಾನದ ಹುಂಡಿಯಲ್ಲಿ ವಿಕೃತ ಬರಹದ ಹರಕೆ ನೋಟು ಪತ್ತೆ!

ಕಲಬುರಗಿ, ಮಾ.3: ಜನರು ತಮ್ಮ ಇಷ್ಟ ಸಿದ್ಧಿಗಾಗಿ ಧಾರ್ಮಿಕ ಕೇಂದ್ರಗಳ ಹರಕೆ ಹುಂಡಿಗೆ ಕಾಣಿಕೆ ಹಾಕುವುದು ಸಾಮಾನ್ಯ. ಆದರೆ ಇಲ್ಲೊಂದು ದೇವಸ್ಥಾನದ ಹುಂಡಿಯಲ್ಲಿ 'ನಮ್ಮ ಅತ್ತೆ ಬೇಗ ಸಾಯಬೇಕು ಸ್ವಾಮಿ' ಎಂದು ಬರೆದು ಹಾಕಿರುವ 50 ರೂ. ಮುಖಬೆಲೆಯ ಪತ್ತೆಯಾಗಿದೆ.

ಅಝ್ಝಲಪುರ ತಾಲೂಕಿನ ಸುಕ್ಷೇತ್ರ ದೇವಲ್ ಗಾಣಗಾಪುರ ದತ್ತಾತ್ರೇಯ್ ದೇವಸ್ಥಾನದ ಹುಂಡಿಯಲ್ಲಿ ಈ ವಿಕೃತಿ ಬರಹದ ನೋಟು ಪತ್ತೆಯಾಗಿದೆ.

ಕೆಲವು ದಿನಗಳ ಹಿಂದೆ ದೇವಸ್ಥಾನ ಹುಂಡಿ ಎಣಿಕೆ ಕಾರ್ಯ ಮಾಡಲಾಗಿದ್ದು, ಈ ವೇಳೆ 50 ರೂ. ಮುಖಬೆಲೆಯ ನೋಟೊಂದರ ಮೇಲೆ "ನಮ್ಮ ಅತ್ತೆ ಬೇಗ ಸಾಯಬೇಕು ಸ್ವಾಮಿ" ಎಂಬ ಹರಕೆಯನ್ನು ಬರೆದಿದ್ದು ಪತ್ತೆಯಾಗಿದೆ. ಈ ನೋಟಿನ ಫೋಟೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ.