ನಮ್ಮ ಸರಕಾರ ಬಂದಾಗಿನಿಂದಲೂ ಬಿಜೆಪಿಯಿಂದ ಸರಕಾರ ಕೆಡವಲು ಪ್ರಯತ್ನ : ಸಚಿವ ಶಿವರಾಜ್‌ ತಂಗಡಗಿ

ಕೊಪ್ಪಳ : ʼನಮ್ಮ ಸರಕಾರ ಬಂದಾಗಿನಿಂದಲೂ ಸರಕಾರ ಕೆಡವಲು ಪ್ರಯತ್ನಿಸಿದ್ದಾರೆ. ನಮ್ಮ ಸರಕಾರ ಬೀಳುವುದಿಲ್ಲ, ಅವರ ಪ್ರಯತ್ನ ವಿಫಲವಾಗುತ್ತದೆʼ ಎಂದು ಕೊಪ್ಪಳ ಜಿಲ್ಲಾ ಉಸ್ತುವಾರಿ ಸಚಿವ ಶಿವರಾಜ ತಂಗಡಗಿ ಹೇಳಿದ್ದಾರೆ.

ಕೊಪ್ಪಳ ಜಿಲ್ಲೆಯಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ʼನಿಶ್ಚಿತವಾಗಿ ಬಿಜೆಪಿಯವರು ಇಂತಹ ಒಂದು ಕೆಲಸ ನಡೆಸಿದ್ದಾರೆ, ಬಿಜೆಪಿ ಅವರು ಎಂದೂ ಕೂಡ ಸ್ವಂತ ಬಲದಿಂದ ಅಧಿಕಾರಕ್ಕೆ ಬಂದಿಲ್ಲ. ಬಿಜೆಪಿಯವರು ಭ್ರಷ್ಟಾಚಾರದಲ್ಲಿ ನಿಸ್ಸೀಮರುʼ ಎಂದರು.

ಕಾಂಗ್ರೆಸ್ ಗೆಲ್ಲುತ್ತೆ : ʼನಾನು ಸಂಡೂರು ಶಿಗ್ಗಾಂವಿ ಚುನಾವಣೆಗೆ ಮಾತ್ರ ಹೋಗಿದ್ದೆ, ಚನ್ನಪಟ್ಟಣ ಚುನಾವಣೆಗೆ ನಾನು ಹೋಗಿಲ್ಲ, ನನಗೆ ವಿಶ್ವಾಸ ಇದೆ ಮೂರು ಕ್ಷೇತ್ರದಲ್ಲಿ ಕಾಂಗ್ರೆಸ್ ಗೆಲ್ಲುತ್ತೆ. ಸಂಡೂರು ಕ್ಷೇತ್ರದಲ್ಲಿ ಕನಿಷ್ಠ 20 ರಿಂದ 25 ಸಾವಿರ ಮತಗಳ ಅಂತರದಲ್ಲಿ ಗೆಲ್ಲುತ್ತೇವೆ ಮತ್ತು ಶಿಗ್ಗಾವಿಯಲ್ಲಿ 10-15 ಸಾವಿರ ಮತಗಳಿಂದ ಗೆಲ್ಲುತ್ತೇವೆʼ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಸ್ವಾಮೀಜಿ ಕಾವಿ ಬಟ್ಟೆ ತೊಟ್ಟು ಹಗುರವಾಗಿ ಮಾತನಾಡಬಾರದು :

ʼಸ್ವಾಮೀಜಿಗಳಾಗಲಿ, ಯಾರೇ ಆಗಲಿ ಮುಖ್ಯಮಂತ್ರಿಗಳ ಬಗ್ಗೆ ಬಾಯಿ ಹಿಡಿತದಲ್ಲಿಟ್ಟುಕೊಂಡು ಮಾತನಾಡಬೇಕು. ಸ್ವಾಮೀಜಿಗಳ ಬಗ್ಗೆ ನಮಗೆ ಗೌರವವಿದೆ. ಸಮಾಜದಲ್ಲಿ ಅವರದ್ದೇ ಆದ ಗೌರವ ಇದೆ. ಅವರನ್ನು ನೋಡಿ ಬದುಕುವಂತ ಕೆಲಸವಾಗುತ್ತಿದೆ. ಸಮಾಜದಲ್ಲಿ ಅವರನ್ನು ಅನುಕರಣೆ ಮಾಡಲಾಗುತ್ತೆ. ಹಾಗಾಗಿ ಸ್ವಾಮೀಜಿಗಳು ಕಾವಿ ಬಟ್ಟೆ ತೊಟ್ಟು ಹಗುರವಾಗಿ ಮಾತನಾಡಬಾರದುʼ ಎಂದು ಮನಗೂಳಿ ಹಿರೇಮಠದ ಅಭಿನವ ಸಂಗನಬಸವ ಸ್ವಾಮೀಜಿ ಹೇಳಿಕೆಗೆ ಪ್ರತಿಕ್ರಿಯಿಸಿದರು.