ಜೆಲೆನಾ ಒಸ್ಟಾಪೆಂಕೊಗೆ ಶರಣಾಗಿ ಯು.ಎಸ್ . ಓಪನ್ ನಿಂದ ನಿರ್ಗಮಿಸಿದ ವಿಶ್ವದ ನಂ.1 ಆಟಗಾರ್ತಿ ಸ್ವಿಯಾಟೆಕ್

ನ್ಯೂಯಾರ್ಕ್: ಅಗ್ರ ಶ್ರೇಯಾಂಕದ ಇಗಾ ಸ್ವಿಯಾಟೆಕ್ ವಿಶ್ವದ ನಂ. 21 ನೇ ಆಟಗಾರ್ತಿ ಜೆಲೆನಾ ಒಸ್ಟಾಪೆಂಕೊ ವಿರುದ್ಧ ಅಮೆರಿಕ ಓಪನ್ ನ ಮಹಿಳೆಯರ ಸಿಂಗಲ್ಸ್ ವಿಭಾಗದ ಅಂತಿಮ 16 ರ ಸ್ಪರ್ಧೆಯಲ್ಲಿ 6-3, 3-6, 1-6 ರಿಂದ ಸೋಲನುಭವಿಸಿ ಟೂರ್ನಿಯಿಂದ ಹೊರ ನಡೆದಿದ್ದಾರೆ.

ಹಾಲಿ ಚಾಂಪಿಯನ್ ಆಗಿದ್ದ ಸ್ವಿಯಾಟೆಕ್ ಅವರು ಒಸ್ಟಾಪೆಂಕೊ ವಿರುದ್ಧ ಉತ್ತಮ ಆರಂಭವನ್ನು ಪಡೆದರು, ಮೊದಲ ಸೆಟ್ ಅನ್ನು 6-3 ಅಂತರದಿಂದ ಗೆದ್ದರು ಆದರೆ ನಂತರದ ಎರಡು ಸೆಟ್ ಗಳಲ್ಲಿ ಸೋಲನುಭವಿಸಿದರು.

ಕಳೆದೆರಡು ವರ್ಷಗಳಿಂದ WTA ಟೂರ್ ನಲ್ಲಿ ಪ್ರಾಬಲ್ಯವನ್ನು ಸಾಧಿಸಿರುವ ಸ್ವಿಯಾಟೆಕ್ ಈ ಬಾರಿ ಪ್ರಶಸ್ತಿ ಗೆಲ್ಲುವ ಫೇವರಿಟ್ ಎಂದು ಭಾವಿಸಲಾಗಿತ್ತು. ಆದರೆ ಮೈದಾನದಲ್ಲಿ ಒಸ್ಟಾಪೆಂಕೊ ಅವರು ಪೋಲ್ಯಾಂಡ್ ಆಟಗಾರ್ತಿಗೆ ಸೋಲಿನ ರುಚಿ ಉಣಿಸಿದರು.

ವಾಸ್ತವವಾಗಿ, ಇಂದಿನ ಮುಖಾಮುಖಿಯ ಮೊದಲು, ಒಸ್ಟಾಪೆಂಕೊ ಅವರು ಸ್ವಿಯಾಟೆಕ್ ವಿರುದ್ದ ಆಡಿರುವ ಹಿಂದಿನ ಎಲ್ಲಾ ಮೂರು ಪಂದ್ಯಗಳನ್ನು ಗೆದ್ದಿದ್ದರು.