ಮಂಡ್ಯ: ಯುವಕನ ಬರ್ಬರ ಹತ್ಯೆ

ಮಂಡ್ಯ: ಯುವಕನನ್ನು ಬರ್ಬರವಾಗಿ ಹತ್ಯೆ ಮಾಡಲಾಗಿರುವ ಘಟನೆ ಮದ್ದೂರು ತಾಲೂಕಿನ ಕುದರಗುಂಡಿ ಗ್ರಾಮದ ಮಲ್ಲಯ್ಯ ನಗರದಲ್ಲಿ ನಡೆದಿರುವುದು ವರದಿಯಾಗಿದೆ.

ಚಿಕ್ಕಲಿಂಗೇಗೌಡ ಹಾಗೂ ಪದ್ಮ ದಂಪತಿ ಪುತ್ರ ಶಿವಾನಂದ(19) ಕೊಲೆಯಾದ ಯುವಕನಾಗಿದ್ದು, ಈ ಸಂಬಂಧ ಆತನ ಸಹೋದರಿ ಚೈತ್ರ ಪೊಲೀಸರಿಗೆ ದೂರು ನೀಡಿದ್ದಾರೆ.

ಮೂಲತಃ ಮದ್ದೂರು ತಾಲೂಕಿನ ಅರೆಚಾಕನಹಳ್ಳಿಯವರಾದ ಪದ್ಮ ತನ್ನ ಪುತ್ರ ಶಿವಾನಂದ, ಪುತ್ರಿ ಚೈತ್ರ ಜತೆ ಕುದುರಗುಂಡಿ ಮಲ್ಲಯ್ಯ ನಗರದಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದರು ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ತನ್ನ ತಾಯಿ ಪದ್ಮ ಅವರ ಜತೆಯಲ್ಲಿ ಸಲುಗೆಯಿಂದ, ಮಹೇಶ ಎಂಬಾತ ನಮ್ಮ ಜತೆಯಲ್ಲೇ ವಾಸವಿದ್ದ. ನಾಲ್ಕುದಿನದ ಹಿಂದೆ ತಾಯಿ ಬೆಂಗಳೂರಿನಲ್ಲಿದ್ದ ನನ್ನ ತಂದೆಯ ಬಳಿಗೆ ತೆರಳಿದ ಹಿನ್ನೆಲೆಯಲ್ಲಿ ಕೋಪಗೊಂಡು ಆತ ನನ್ನ ಅಣ್ಣ ಮಹೇಶನ್ನು ಕೊಲೆಗೈದಿದ್ದಾನೆ ಎಂದು ಚೈತ್ರ ದೂರಿನಲ್ಲಿ ಆಪಾದಿಸಿದ್ದಾರೆ.

ಮದ್ದೂರು ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.