ಈವರೆಗಿನ ಸಾಧನೆ ಕೇವಲ ಟ್ರೇಲರ್, ಸಿನಿಮಾ ಇನ್ನೂ ಬಾಕಿ ಇದೆ : ರಾಜಸ್ಥಾನದ ಚುನಾವಣಾ ಸಮಾವೇಶದಲ್ಲಿ ಪ್ರಧಾನಿ ಮೋದಿ

ಜೈಪುರ: ಈವರೆಗಿನ ಸಾಧನೆ ಕೇವಲ ಟ್ರೇಲರ್ ಆಗಿದ್ದು, ಸಿನಿಮಾ ಇನ್ನೂ ಬಾಕಿ ಇದೆ ಎಂದು ಶುಕ್ರವಾರ ರಾಜಸ್ಥಾನದ ಚುರುವಿನಲ್ಲಿ ನಡೆದ ಚುನಾವಣಾ ಸಮಾವೇಶವೊಂದರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ.

"ನೀವು ದೊಡ್ಡ ಹೋಟೆಲ್‌ಗಳಿಗೆ ಊಟಕ್ಕೆಂದು ಹೋದರೆ, ಅವರು ಮೊದಲು ಜೀರ್ಣಕಾರಕಗಳನ್ನು ತರುತ್ತಾರೆ. ಅವರು ಎರಡು ಅಥವಾ ನಾಲ್ಕು ಸಿಹಿ ತಿನಿಸನ್ನು ಬಡಿಸುತ್ತಾರೆ. ಕೆಲವೊಮ್ಮೆ ನಿಮಗೆ ಅದರಿಂದಲೇ ಹೊಟ್ಟೆ ಭರ್ತಿಯಾದಂತೆ ಅನ್ನಿಸುತ್ತದೆ. ಮೋದಿ ಈವರೆಗೆ ಏನು ಮಾಡಿದ್ದಾರೆ ಅದು ಜೀರ್ಣಕಾರಕ ಮಾತ್ರ. ಸಂಪೂರ್ಣ ತಟ್ಟೆಯ ಊಟ ಇನ್ನೂ ಬಾಕಿ ಇದೆ. ತುಂಬಾ ಕೆಲಸ ಮಾಡಬೇಕಿದೆ. ತುಂಬಾ ಕನಸುಗಳಿವೆ. ನಾವು ದೇಶವನ್ನು ಮತ್ತಷ್ಟು ಮುಂದಕ್ಕೆ ತೆಗೆದುಕೊಂಡು ಹೋಗಬೇಕಿದೆ" ಎಂದು ಅವರು ಹೇಳಿದ್ದಾರೆ.

ಚುರು ಲೋಕಸಭಾ ಕ್ಷೇತ್ರದಲ್ಲಿ ಎಪ್ರಿಲ್ 19ರಂದು ಮತದಾನ ನಡೆಯಲಿದ್ದು, ಬಿಜೆಪಿಯು ಈ ಕ್ಷೇತ್ರದಿಂದ ಪ್ಯಾರಾಲಿಂಪಿಕ್ಸ್ ಪದಕ ವಿಜೇತ ಕ್ರೀಡಾಪಟು ದೇವೇಂದ್ರ ಝಝಾರಿಯಾರನ್ನು ಕಣಕ್ಕಿಳಿಸಿದೆ. ಕಾಂಗ್ರೆಸ್ ಪಕ್ಷದಿಂದ ಇತ್ತೀಚೆಗೆ ಬಿಜೆಪಿ ತೊರೆದಿರುವ ರಾಹುಲ್ ಕಸ್ವಾನ್ ಸ್ಪರ್ಧಿಸುತ್ತಿದ್ದಾರೆ.