ಮಧ್ಯಪ್ರದೇಶ: ಚುನಾವಣೆಗೆ ಮುನ್ನ ಬಿಜೆಪಿಗೆ ಜಿಗಿದ ಮೂವರು ಕಾಂಗ್ರೆಸ್ ನಾಯಕರು

ಭೋಪಾಲ: ಮಧ್ಯಪ್ರದೇಶದ ಮೂವರು ಕಾಂಗ್ರೆಸ್ ನಾಯಕರು ಮಂಗಳವಾರ ಕೇಂದ್ರ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರ ಉಪಸ್ಥಿತಿಯಲ್ಲಿ ಬಿಜೆಪಿಗೆ ಸೇರ್ಪಡೆಗೊಂಡಿದ್ದಾರೆ. ಬಿಜೆಪಿ ಮತ್ತು ಕಾಂಗ್ರೆಸ್ ಪಾಳಯಗಳಲ್ಲಿ ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಟಿಕೆಟ್ ವಂಚಿತ ನಾಯಕರ ಬೆಂಬಲಿಗರ ಪ್ರತಿಭಟನೆಗಳ ನಡುವೆಯೇ ಈ ಬೆಳವಣಿಗೆ ನಡೆದಿದೆ.

ಅಶೋಕನಗರ ಜಿಲ್ಲೆಯಿಂದ ಕಾಂಗ್ರೆಸ್ ಟಿಕೆಟ್ ಗಾಗಿ ಪ್ರಬಲ ಸ್ಪರ್ಧಿಯಾಗಿದ್ದ ಆಶಾ ದೊಹ್ರೆ, ಕೌನ್ಸಿಲರ್ ಅನಿತಾ ಜೈನ್ ಮತ್ತು ವಿಭಾಗ ಅಧ್ಯಕ್ಷ ವಿಕಾಸ ಜೈನ್ ಅವರು ಮಂಗಳವಾರ ಸಿಂದಿಯಾ ನಿವಾಸದಲ್ಲಿ ಬಿಜೆಪಿಗೆ ಸೇರ್ಪಡೆಗೊಂಡ ಕಾಂಗ್ರೆಸ್ ನಾಯಕರಾಗಿದ್ದಾರೆ. ಮಾಜಿ ಶಿವಪುರಿ ನಗರಾಧ್ಯಕ್ಷ ರಾಕೇಶ ಜೈನ ಅವರೂ ಬಿಜೆಪಿಗೆ ಸೇರ್ಪಡೆಗೊಂಡಿದ್ದಾರೆ.

ಸುದ್ದಿಗಾರರೊಂದಿಗೆ ಮಾತನಾಡಿದ ಸಿಂದಿಯಾ,‘ಅನಿತಾ ಮತ್ತು ರಾಕೇಶ್ ಜೊತೆ ನಾನು ಹಿಂದಿನಿಂದಲೂ ಆತ್ಮೀಯ ಸಂಬಂಧವನ್ನು ಹೊಂದಿದ್ದೇನೆ. ನಾನು ರಾಜಕೀಯದಲ್ಲಿ ಇಲ್ಲ, ಜನಸೇವೆಯಲ್ಲಿ ತೊಡಗಿಕೊಂಡಿದ್ದೇನೆ. ಯಾವುದೋ ಕಾರಣದಿಂದ ಅವರು ನಮ್ಮೊಂದಿಗಿರಲಿಲ್ಲ, ಇಂದು ಅವರು ನಮ್ಮನ್ನು ಮರಳಿ ಸೇರಿದ್ದಾರೆ. ನಾವು ಅವರನ್ನು ಬಿಜೆಪಿಗೆ ಸ್ವಾಗತಿಸುತ್ತೇವೆ ’ಎಂದು ಹೇಳಿದರು.