ವಿಶೇಷಚೇತನ ಅಭಿಮಾನಿಯ ಕನಸನ್ನು ನನಸು ಮಾಡಿದ ಸಂಜು ಸ್ಯಾಮ್ಸನ್: ವಿಡಿಯೊ ವೈರಲ್

ಹೊಸದಿಲ್ಲಿ: ಭಾರತದ ವಿಕೆಟ್ ಕೀಪರ್ ಬ್ಯಾಟರ್ ಸಂಜು ಸ್ಯಾಮ್ಸನ್ ಗೆ ವಿಶ್ವದಾದ್ಯಂತ ಅಭಿಮಾನಿಗಳ ಪಡೆ ಇದೆ. ಆಯ್ಕೆದಾರರು ಅವರನ್ನು ಅವಗಣನೆ ಮಾಡಿದರೂ, ತಮ್ಮ ಅಭಿಮಾನಿಗಳೆದುರು ಮಾತ್ರ ಅವರು ಸಶಕ್ತ ವ್ಯಕ್ತಿತ್ವವನ್ನು ಕಾಪಾಡಿಕೊಂಡು ಬಂದಿದ್ದಾರೆ. ಕಳೆದ ವರ್ಷ ನಡೆದ ಏಕದಿನ ವಿಶ್ವಕಪ್ ಕ್ರೀಡಾಕೂಟದಿಂದ ಅವರನ್ನು ನಿರ್ಲಕ್ಷಿಸಿದರೂ, ಡಿಸೆಂಬರ್ ನಲ್ಲಿ ದಕ್ಷಿಣ ಆಫ್ರಿಕಾ ತಂಡದೆದುರು ನಡೆದಿದ್ದ ಮೂರನೆಯ ಪಂದ್ಯದಲ್ಲಿ ಅವರು ಶತಕ ಬಾರಿಸಿದ್ದರು. ಇತ್ತೀಚೆಗೆ ವಿಶೇಷ ಚೇತನ ಮಗುವೊಂದರ ಆಸೆಯನ್ನು ಈಡೇರಿಸುವ ಮೂಲಕ ಈ ತಾರಾ ಬ್ಯಾಟರ್ ಮತ್ತೆ ಸುದ್ದಿಯಲ್ಲಿದ್ದಾರೆ.

ರಾಜಸ್ಥಾನ ರಾಯಲ್ಸ್ ತಂಡದ ನಾಯಕರೂ ಆದ ಸಂಜು ಸ್ಯಾಮ್ಸನ್ ಅವರನ್ನು ಒಮ್ಮೆಯಾದರೂ ಭೇಟಿಯಾಗಬೇಕು ಎಂಬ ಬಯಕೆ ಹೊಂದಿದ್ದ ವಿಶೇಷ ಚೇತನ ಮಗುವಿನೊಂದಿಗೆ ಸಂಜು ಸ್ಯಾಮ್ಸನ್ ಆಟವಾಡುತ್ತಿರುವ ವಿಡಿಯೊ ವೈರಲ್ ಆಗಿದೆ.

ಈ ಹಿಂದೆ ತಮ್ಮ ಎಳೆಯ ಅಭಿಮಾನಿಯನ್ನು ಭೇಟಿಯಾಗುವುದಾಗಿ ಸಂಜು ಸ್ಯಾಮ್ಸನ್ ಭರವಸೆ ನೀಡಿದ್ದರು. ಅದರಂತೆ ರಣಜಿ ಟ್ರೋಫಿಯಲ್ಲಿ ಆಟವಾಡಿ ಕೇರಳವನ್ನು ತಲುಪಿದ ನಂತರ ಸ್ಯಾಮ್ಸನ್ ಆ ಪುಟ್ಟ ಬಾಲಕ ಬಯಕೆಯನ್ನು ಈಡೇರಿಸಿದ್ದು, ಆತನೊಂದಿಗಿನ ಸುಮಧುರ ಕ್ಷಣದ ವಿಡಿಯೊವನ್ನು ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿದ್ದಾರೆ ಎಂದು ndtv ವರದಿ ಮಾಡಿದೆ.

ಸಂಜು ಸ್ಯಾಮ್ಸನ್ ಅವರ ಈ ನಡವಳಿಕೆಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗಿದ್ದು, ಸಾಮಾಜಿಕ ಮಾಧ್ಯಮಗಳಲ್ಲಿ ಬಿರುಗಾಳಿಯ ವೇಗದಲ್ಲಿ ವೈರಲ್ ಆಗಿದೆ.