ಬರದ ನಡುವೆಯೂ ಪ್ರವಾಸಿಗರನ್ನು ಸೆಳೆಯುತ್ತಿರುವ ಅಯ್ಯನಕೆರೆ

ಚಿಕ್ಕಮಗಳೂರು, ಫೆ.18: ಹಚ್ಚಹಸಿರಿನ ಮುಗಿಲೆತ್ತರದ ಗಿರಿಶ್ರೀಣಿಗಳು, ಝರಿ ಜಾಲಪಾತಗಳು, ಧಾರ್ಮಿಕ ಶ್ರದ್ಧಾ ಕೇಂದ್ರಗಳು, ಅಭಯಾರಣ್ಯ, ದಟ್ಟ ಕಾನನ ಕಾಫಿನಾಡಿನ ಪ್ರವಾಸೋದ್ಯಮದ ಆಕರ್ಷಣೆಯಾಗಿದ್ದು, ಜಿಲ್ಲೆಯ ಬಯಲು ಭಾಗದಲ್ಲಿರುವ ಅಯ್ಯನಕೆರೆ ಬರದ ನಡುವೆಯೂ ನೀರಿನಿಂದ ಮೈದುಂಬಿಕೊಂಡು ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿದೆ.

ಮಳೆಯ ಕೊರತೆಯಿಂದಾಗಿ ಈ ಬಾರಿ ಚಿಕ್ಕಮಗಳೂರು ಜಿಲ್ಲೆಯ 9 ತಾಲೂಕುಗಳ ಪೈಕಿ 8 ತಾಲೂಕುಗಳನ್ನು ಬರಪೀಡಿತ ತಾಲೂಕೆಂದು ಸರಕಾರ ಘೋಷಣೆ ಮಾಡಿದೆ. ಇದರಲ್ಲಿ ಕಡೂರು ತೀವ್ರ ಬರ ಪೀಡಿತ ತಾಲೂಕಾಗಿದೆ. ಇಂತಹ ತೀವ್ರ ಬರದ ನಡುವೆಯೂ ಕಡೂರು ತಾಲೂಕಿನ ಸಖರಾಯಪಟ್ಟಣ ಹೋಬಳಿ ವ್ಯಾಪ್ತಿಯಲ್ಲಿರುವ ಅಯ್ಯನಕೆರೆ ಮಾತ್ರ ನೀರಿನಿಂದ ಮೈದುಂಬಿ ಕೊಂಡಿರುವುದು ಸೋಜಿಗ, ಆಶ್ಚರ್ಯಕ್ಕೂ ಕಾರಣವಾಗಿದೆ.

ಸಖರಾಯ ಪಟ್ಟಣದಿಂದ 5 ಕಿ.ಮೀ. ರೈತರ ಹೊಲಗದ್ದೆಗಳು, ಅಡಿಕೆ ತೋಟಗಳ ಮಧ್ಯೆ ಸಾಗಿದರೆ ಅಯ್ಯನಕೆರೆ ಸಿಗುತ್ತದೆ. ಸುಮಾರು 100 ಎಕರೆ ಪ್ರದೇಶದಲ್ಲಿ ಕೆರೆ ವ್ಯಾಪಿಸಿದ್ದು, ಬಿರು ಬಿಸಿಲು, ಬರದ ನಡುವೆಯೂ ಈ ಕೆರೆಯಲ್ಲಿ ಇಷ್ಟು ಪ್ರಮಾಣದಲ್ಲಿ ನೀರು ಸಂಗ್ರಹವಾಗಿರುವುದಾ ದರೂ ಹೇಗೆಂಬ ಪ್ರಶ್ನೆ ಕೆರೆ ವೀಕ್ಷಣೆ ಮಾಡಿದವರ ಮನದಲ್ಲಿ ಮೂಡುತ್ತದೆ. ಸಖರಾಯಪಟ್ಟಣ ಹೋಬಳಿ ವ್ಯಾಪ್ತಿಯಲ್ಲೂ ಈ ಬಾರಿ ಮಳೆ ಪ್ರಮಾಣ ಕಡಿಮೆಯಾಗಿದ್ದು, ಹೋಬಳಿ ವ್ಯಾಪ್ತಿಯಲ್ಲಿ ತೀವ್ರ ಬರದ ವಾತಾವರಣವಿದೆ.

ಕೆರೆಯ ಹಿಂಭಾಗದಲ್ಲಿ ಗಿರಿಶ್ರೇಣಿಗಳ ಸಾಲಿದ್ದು, ಮಳೆಗಾಲದಲ್ಲಿ ಇಲ್ಲಿನ ಗಿರಿಶ್ರೇಣಿಗಳ ವ್ಯಾಪ್ತಿಯಲ್ಲಿ ನಿರಂತರವಾಗಿ ಮಳೆ ನೀರು ಅಯ್ಯನಕೆರೆಗೆ ಹರಿದು ಬಂದಿದ್ದು, ಈ ನೀರಿನಿಂದಾಗಿ ಕೆರೆ ಕೋಡಿ ಬಿದ್ದಿದೆ. ಈ ಬಾರಿ ಗಿರಿ ವ್ಯಾಪ್ತಿಯಲ್ಲಿ ಉತ್ತಮ ಮಳೆಯಾದ ಪರಿಣಾಮ ಕೆರೆಯಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ನೀರು ಸಂಗ್ರಹವಾಗಿರುವುದರಿಂದ ಇಂದಿಗೂ ನೀರು ಬತ್ತದೇ ಉಳಿದುಕೊಂಡಿದೆ ಎಂಬುದು ಸ್ಥಳೀಯರ ಹೇಳಿಕೆಯಾಗಿದೆ. ಏನೇ ಆದರೂ ಬರದ ನಾಡಿನಲ್ಲಿ ನೀರಿನ ಕಾರಂಜಿಯಂತೆ ಕಂಗೊಳಿಸುತ್ತ ಪ್ರವಾಸಿಗರನ್ನು ತನ್ನತ್ತ ಸೆಳೆಯುತ್ತಿದೆ ಕೆರೆ.

ಅಯ್ಯನಕೆರೆ ದಂಡೆ ಮೇಲೇರಿ ನಿಂತರೆ ತಂಪಿನ ವಾತಾವರಣ ಮೈಮನಕ್ಕೆ ಮುದ ನೀಡುತ್ತದೆ. ಕೆರೆಯ ಒಂದು ಬದಿಯಲ್ಲಿರುವ ಮುಗಿಲೆತ್ತರದ ಗಿರಿಶ್ರೇಣಿಗಳ ಕಡೆಯಿಂದ ಬೀಸುವ ತಂಪಾದ ಗಾಳಿ ಬಿಸಿಲಧಗೆಯಿಂದ ರೋಸಿಹೋದವರಿಗೆ ಆಹ್ಲಾದ ನೀಡುತ್ತದೆ.

ಇಂತಹ ಅಪೂರ್ವ ರಮಣೀಯ ಪ್ರಾಕೃತಿಕ ಸೊಬಗಿನ ಅಯ್ಯನಕೆರೆ ಇತ್ತೀಚಿನ ದಿನಗಳಲ್ಲಿ ಜಿಲ್ಲೆಯ ಪ್ರಮುಖ ಪ್ರವಾಸಿ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ. ಜಿಲ್ಲಾಡಳಿತ ಅಯ್ಯನಕೆರೆಯನ್ನು ಪ್ರವಾಸಿ ಕೇಂದ್ರವನ್ನಾಗಿ ರೂಪಿಸಲು ಅಗತ್ಯ ಮೂಲಸೌಕರ್ಯ ಒದಗಿಸಲು ಮುಂದಾಗಿದೆ. ವಿಶೇಷ ಸಂದರ್ಭಗಳಲ್ಲಿ ಜಿಲ್ಲಾಡಳಿತ, ಪ್ರವಾಸೋದ್ಯಮ ಇಲಾಖೆ ವತಿಯಿಂದ ಈ ಕೆರೆಯಲ್ಲಿ ಬೋಟಿಂಗ್ ವಿಹಾರದ ವ್ಯವಸ್ಥೆಯನ್ನು ಸಾರ್ವಜನಿಕರು, ಪ್ರವಾಸಿಗರಿಗೆ ಕಲ್ಪಿಸುತ್ತಿದ್ದು, ಕೆರೆಯ ಅಭಿವೃದ್ಧಿಗೂ ಸರಕಾರ ಕ್ರಮವಹಿಸುತ್ತಿದೆ. ಕೆರೆ ವ್ಯಾಪ್ತಿಯಲ್ಲಿ ಸ್ವಚ್ಛತೆ ಸೇರಿದಂತೆ ಅಭಿವೃದ್ಧಿ, ಮೂಲಸೌಕರ್ಯ ಕಲ್ಪಿಸಲು ಅಯ್ಯನಕೆರೆ ಪ್ರವಾಸಿ ತಾಣ ವೀಕ್ಷಿಸಲು ಬರುವ ಪ್ರವಾಸಿಗರಿಗೆ ಶುಲ್ಕ ನಿಗದಿ ಮಾಡಲೂ ಚಿಂತನೆ ನಡೆಸಲಾಗುತ್ತಿದೆ.

ಒಟ್ಟಾರೆ ಬರದ ನಾಡಿನ ನೀರಿನ ಚಿಲುಮೆಯಂತೆ ಅಯ್ಯನಕೆರೆ ಸಖರಾಯಪಟ್ಟಣ ಹೋಬಳಿ ವ್ಯಾಪ್ತಿಯ ಕೃಷಿಗೆ ನೀರೊದಗಿಸುತ್ತಾ ರೈತರ ಜೀವನಾಡಿಯಾಗಿರುವುದಲ್ಲದೇ, ರಾಜ್ಯದ ಪ್ರಮುಖ ಪ್ರವಾಸಿ ಕೇಂದ್ರವನ್ನಾಗಿಸಲು ಸರಕಾರಗಳು ಈ ಭಾಗದಲ್ಲಿ ಮತ್ತಷ್ಟು ಅಭಿವೃದ್ಧಿ ಕೆಲಸಗಳೊಂದಿಗೆ ಅಗತ್ಯ ಮೂಲಸೌಕರ್ಯಗಳನ್ನೂ ಒದಗಿಸಬೇಕೆಂಬುದು ಪರಿಸರ ಪ್ರೇಮಿಗಳು ಆಗ್ರಹವಾಗಿದೆ.

ಚಿಕ್ಕಮಗಳೂರು ನಗರದಿಂದ 28ಕಿಮೀ ದೂರದ ಸಖರಾಯಪಟ್ಟಣ ಹೋಬಳಿ ಕೇಂದ್ರದಿಂದ ಕೇವಲ 5ಕಿಮೀ ದೂರದಲ್ಲಿರುವ ಅಯ್ಯನಕೆರೆ ಬರದ ಬೇಗೆಯಲ್ಲೂ ನೀರಿನಿಂದ ಮೈದುಂಬಿಕೊಂಡಿದೆ. ಈ ಕೆರೆ ಸಖರಾಯಪಟ್ಟಣ ಹೋಬಳಿ ವ್ಯಾಪ್ತಿಯ ರೈತರ ಜೀವನಾಡಿಯಾಗಿರುವುದು ಒಂದೆಡೆಯಾದರೆ, ಹಸಿರು ಹೊದ್ದು ಮಲಗಿರುವ ಗಿರಿಶ್ರೇಣಿಗಳ ಮಧ್ಯೆ ವಿಶಾಲವಾದ ಪ್ರದೇಶದಲ್ಲಿ ಪವಡಿಸಿಕೊಂಡಿರುವ ಅಯ್ಯನಕೆರೆ ನೋಡಲು ಪ್ರವಾಸಿಗರ ದಂಡೇ ಹರಿದು ಬರುತ್ತಿದೆ.