ಬಾಂಬೆಯಲ್ಲಿ ಗಮನಸೆಳೆದ ಕನ್ನಡಿಗ ಶಾಂತಕುಮಾರ್ ಕಲಾಕೃತಿ

ಕಲಬುರಗಿ : ಬಾಲ್ಯದಲ್ಲಿ ನಾವೇನು ಅಂದುಕೊಂಡಿರು ತ್ತೇವೆಯೋ ಅದನ್ನು ಸಾಧಿಸಲು ಸಾಕಷ್ಟು ದಾರಿಗಳನ್ನು ಹುಡುಕಿ ನಾನಾ ಪ್ರಯತ್ನಗಳಲ್ಲಿ ತೊಡಗಿರುತ್ತೇವೆ. ಆ ಪ್ರಯತ್ನಗಳು ಕೆಲವರಲ್ಲಿ ಯಶಸ್ಸು ಕಂಡರೆ, ಹಲವರು ವಿಫಲ ಆಗುವುದು ಸಾಮಾನ್ಯ. ಆದರೆ ಬಾಲ್ಯದ ಕನಸನ್ನೇ ಬೆನ್ನೇರಿ ಬಾಂಬೆಯಂತಹ ಬೃಹತ್ ನಗರದಲ್ಲಿ ವಾಸಿಸುತ್ತ ಕನಸಿನ ಗುರಿಯತ್ತ ಬೆನ್ನತ್ತುವುದು ಸಾಹಸವೇ ಸರಿ. ಅಂತಹ ಸಾಹಸದಲ್ಲಿ ಯಶಸ್ಸು ಕಂಡವರಲ್ಲಿ ಕಲ್ಯಾಣ ಕರ್ನಾಟಕ ಮೂಲದ ಚಿತ್ರ ಕಲಾವಿದ ಶಾಂತಕುಮಾರ್ ಹತ್ತರಕಿ ಅವರು ನಮ್ಮನ್ನು ಆಕರ್ಷಿಸುತ್ತಾರೆ.

ಖ್ಯಾತ ಬಾಂಬೆ ಕಲಾವಿದ ಎಂದು ಗುರುತಿಸಿಕೊಳ್ಳುವ ಶಾಂತಕುಮಾರ್ ಹತ್ತರಕಿ ಅವರು ಮೂಲತಃ ಕಲಬುರಗಿ ಜಿಲ್ಲೆಯ ಆಳಂದ ತಾಲೂಕಿನ ತಂಬಾಕವಾಡಿ ಗ್ರಾಮದವರು.

ಶಿವಶರಣಪ್ಪ-ಸಂಗಮ್ಮ ದಂಪತಿಯ ಐವರು ಗಂಡು ಮಕ್ಕಳಲ್ಲಿ ಮೂರನೆಯ ಪುತ್ರನಾಗಿ ಜನಿಸಿದ್ದಾರೆ. ಒಂದನೇ ತರಗತಿಯಿಂದ 4ನೇ ತರಗತಿವರೆಗೆ ತಂಬಾಕವಾಡಿಯಲ್ಲಿ, 5ರಿಂದ 10ನೇ ತರಗತಿವರೆಗೆ ತಡಕಲ್‌ನಲ್ಲಿರುವ ಅನುದಾನಿತ ಪ್ರೌಢ ಶಾಲೆಯೊಂದರಲ್ಲಿ ವಿದ್ಯಾಭ್ಯಾಸ ಮುಗಿಸಿಕೊಂಡು, ಕಲಬುರಗಿ ನಗರದಲ್ಲಿರುವ ವಿಜಿ ಅಂದಾನಿ ಅವರ ಐಡಿಯಲ್ ಫೈನ್ ಆರ್ಟ್ಸ್ ಕಾಲೇಜಿನಲ್ಲಿ ವ್ಯಾಸಂಗ ಮಾಡಿದರು. ಅದೇ ಕಾಲೇಜಿನಲ್ಲಿ ಅವರು ಜಿ.ಡಿ ಆರ್ಟ್,(ಡ್ರಾಯಿಂಗ್ ಪೇಂಟಿಂಗ್), ಐ.ಎಫ್.ಎ.ಐ ವಿದ್ಯಾರ್ಹತೆ ಪಡೆದುಕೊಂಡಿದ್ದಾರೆ.

ಶಾಂತಕುಮಾರ್ ಹತ್ತರಕಿ ಅವರು 1997ರಲ್ಲಿ ಕಲಬುರಗಿಯ ಚಿತ್ರಕಲಾವಿದೆ ಜ್ಯೋತಿ ಪಾಟೀಲ್ ಅವರನ್ನು ವರಿಸಿದರು. ಇದೀಗ ಅವರ ದಂಪತಿಗೆ ಈರ್ವರು ಮಕ್ಕಳಿದ್ದು, ದೊಡ್ಡ ಮಗಳು ಭಕ್ತಿ ಹತ್ತರಕಿ, ಬರೋಡಾದಲ್ಲಿ ಪದವಿ ಮುಗಿಸಿ, ಈಗ ಕಲ್ಕತ್ತಾದಲ್ಲಿ ಇಂಟರ್ನ್‌ಶಿಪ್ ಮಾಡುತ್ತಿದ್ದಾರೆ. ಕಿರಿಯ ಪುತ್ರ ಓಂ ಹತ್ತರಕಿ ವಿಜ್ಞಾನಿ ಆಗುವ ಬಯಕೆಯಲ್ಲಿ ವಿದ್ಯಾಭ್ಯಾಸ ಮುಂದುವರಿಸುತ್ತಿದ್ದಾರೆ.

ಶಾಂತಕುಮಾರ್ ಹತ್ತರಕಿ ಅವರ ಕುಟುಂಬದಲ್ಲಿ ಕೇವಲ ಅವರೊಬ್ಬರೇ ಮಾತ್ರ ಚಿತ್ರ ಕಲಾವಿದರಾಗಿ ಹೊರಬಿದ್ದಿಲ್ಲ. ಬದಲಾಗಿ ಅವರ ಕುಟುಂಬದಲ್ಲೇ ನಾಲ್ಕೈದು ಮಂದಿ ಕಲಾವಿದರೇ ಇದ್ದಾರೆ ಎನ್ನುವುದು ಇಂತಹ ಕಾಲದಲ್ಲಿ ಬಹುವಿಪರ್ಯಾಸ. ಹೌದು, ಹತ್ತರಕಿ ಕುಟುಂಬದಲ್ಲಿ ಶಾಂತಕುಮಾರ್ ಅವರ ತಾತ(ತಂದೆಯ ಅಪ್ಪ) ಮಲಕಾಜಪ್ಪ ಹತ್ತರಕಿ ಅವರು ಮುಂಬೈ ಮೂಲದಿಂದ ಕಲಾ ವಿಭಾಗದಲ್ಲಿ ಪದವಿ ಪಡೆದಿದ್ದರು. ಆಗಲೇ ಅವರು ಕಲೆಯಲ್ಲಿ ವಿದ್ಯಾಭ್ಯಾಸ ಮುಗಿಸಿಕೊಂಡು ವಾಲ್ ಪೇಂಟಿಂಗ್‌ನಲ್ಲಿ ಹೆಸರು ಪಡೆದಿದ್ದರು. ತಾತ ಮಲಕಾಜಪ್ಪ ಅವರು ಮನೆಯಲ್ಲೇ ‘ಬಸವೇಶ್ವರರ ನಿರ್ಗಮನ’, ‘ಭಗವಾನ ಸತ್ಯನಾರಾಯಣ’ ಹೀಗೆ ಹಲವು ಕಲಾಕೃತಿಗಳ ವಾಲ್ ಪೇಂಟಿಂಗ್ ಮಾಡಿದ್ದರು. ಅವರಿಂದಲೇ ಬಾಲ್ಯದಲ್ಲಿ ಆಕರ್ಷಿತರಾದ ಶಾಂತಕುಮಾರ್ ಅವರು ಮುಂದೊಂದು ದಿನ ತಾನೂ ಕೂಡ ಕಲಾವಿದನಾಗಬೇಕೆಂದು ಬಯಸಿದ್ದರು.

ಬಾಲ್ಯದಲ್ಲೇ ಕನಸು ಕಂಡಿದ್ದ ಶಾಂತಕುಮಾರ್ ಅವರು ಇಂದು ಸಾಧಕರಾಗಿದ್ದಾರೆ. ಪತ್ನಿ ಜ್ಯೋತಿ ಪಾಟೀಲ್ ಕೂಡ ಕಲಬುರಗಿಯ ಶರಣಬಸವೇಶ್ವರ ಆರ್ಟ್ ಕಾಲೇಜಿನಲ್ಲಿ ಪಿ.ಜಿ ಮುಗಿಸಿ, ಗೋದುತಾಯಿ ಕಾಲೇಜಿನಲ್ಲಿ ಉಪನ್ಯಾಸಕರಾಗಿ ಕೆಲಸ ನಿರ್ವಹಿಸಿದ್ದಾರೆ. ಮದುವೆಯಾದ ಬಳಿಕ ಇದೀಗ ದಂಪತಿ ಇಬ್ಬರೂ ಕಲಾಕೃತಿಗಳನ್ನು ‘ಜಂಟಿ’ ಯಾಗಿ ಪ್ರದರ್ಶಿಸುತ್ತಿದ್ದಾರೆ. ಅಲ್ಲದೆ ಮಗಳು ಭಕ್ತಿ ಕೂಡ ಇದೇ ಚಿತ್ರ ಕಲಾವಿದರ ರಂಗಿನಲ್ಲಿ ಬೆಳೆಯುತ್ತಿದ್ದಾರೆ. ಹೀಗೆ ಕುಟುಂಬದಲ್ಲಿ ತಾತ, ದಂಪತಿ ಸೇರಿದಂತೆ ಪುತ್ರಿ ಕೂಡ ಚಿತ್ರ ಕಲಾವಿದರಾಗಿರುವುದು ಕುಟುಂಬ ಸಮೇತ ಕಲಾವಿದರ ರಂಗು ತುಂಬಿದೆ ಎಂದರೆ ತಪ್ಪಾಗಲಾರದು. ಕಲಬುರಗಿ ಕಲಾವಿದನ ಬಾಂಬೆ ಪಯಣ: ಜಾಹೀರಾತು ಏಜೆನ್ಸಿಯಲ್ಲಿ ಕೆಲಸ ಮಾಡಲು ಮುಂಬೈ ಉತ್ತಮ ಸ್ಥಳವಾಗಿದ್ದರಿಂದ ಅಲ್ಲಿಗೆ 1988ರಲ್ಲಿ ಹೋಗಿದ್ದೆ. ಪ್ರಾರಂಭದಲ್ಲಿ ತಿಂಗಳಿಗೆ 300 ರೂ. ಸಂಬಳಕ್ಕಾಗಿ ಖಾಸಗಿ ಕಂಪೆನಿಯೊಂದರಲ್ಲಿ ಕೆಲಸ ಮಾಡಲು ಶುರು ಮಾಡಿದ್ದೆ. 12 ವರ್ಷಗಳ ಕಾಲ ಪೈಂಟಿಂಗ್ಸ್ ಕೆಲಸಗಳನ್ನು ಮಾಡಿ, ಅದೇ ಸಮಯದಲ್ಲೇ 1992ರಲ್ಲಿ ಮುಂಬೈನಲ್ಲಿರುವ ‘ಬಜಾಜ್ ಆರ್ಟ್ ಗ್ಯಾಲರಿ’ಯಲ್ಲಿ ಮೊದಲ ಕಲಾಕೃತಿಯನ್ನು ಪ್ರದರ್ಶಿಸಿದೆ ಎನ್ನುತ್ತಾರೆ ಶಾಂತಕುಮಾರ್.

ಮುಂಬೈ ಸೇರಿದಂತೆ ಹಲವು ಕಡೆಗಳಲ್ಲಿ ಕಲಾಕೃತಿಗಳನ್ನು ಪ್ರದರ್ಶಿಸುತ್ತ, ರಾಷ್ಟ್ರೀಯ ಮತ್ತು ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಹರಾಜು ಪ್ರಕ್ರಿಯೆಯಲ್ಲಿ ಶಾಂತಕುಮಾರ್ ಗಮನ ಸೆಳೆದಿದ್ದಾರೆ. ಚಿತ್ರ ಕಲಾಕೃತಿಗಳನ್ನು ಮಾಡುತ್ತಾ ಇಂದು ಅವರು, ಮುಂಬೈನ ಪ್ರತಿಷ್ಠಿತ ನಗರದಲ್ಲಿ ಮನೆಯೊಂದು ಮಾಡಿ, ಸ್ವತಃ 3,000 ಸ್ಕ್ವಯರ್ ಫೀಟ್ ಆರ್ಟ್ ಗ್ಯಾಲರಿಯೊಂದು ಸ್ಥಾಪಿಸಿದ್ದಾರೆ. ಬಾಂಬೆಯಲ್ಲಿದ್ದುಕೊಂಡು ಹೆಸರು ಪಡೆದಿರುವ ಶಾಂತಕುಮಾರ್ ಅವರು ‘ಬಾಂಬೆ ಕಲಾವಿದ’ ಎಂದು ಗುರುತಿಸಿಕೊಳ್ಳುತ್ತಿದ್ದಾರೆ.

ಕನ್ನಡ, ಇಂಗ್ಲಿಷ್, ಮರಾಠಿ, ಹಿಂದಿ, ಗುಜರಾತಿ ಭಾಷೆ ಬಲ್ಲವರಾಗಿರುವ ಶಾಂತಕುಮಾರ್ ಹತ್ತರಕಿ ಅವರು, 40 ವರ್ಷಗಳಿಂದ ಕಲಾಕೃತಿಗಳನ್ನು ಬಿಡಿಸುತ್ತಾ ಬಂದಿದ್ದಾರೆ. ಈವರೆಗೆ 300ಕ್ಕೂ ಹೆಚ್ಚು ಪ್ರಮುಖ ಕಲಾಕೃತಿಗಳನ್ನು ಶಾಂತಕುಮಾರ್ ರಚಿಸಿದ್ದಾರೆ.