ಡೈಮಂಡ್ ಲೀಗ್ ಫೈನಲ್-2024 | 3,000 ಮೀ. ಪುರುಷರ ಸ್ಟೀಪಲ್‌ಚೇಸ್ : ಅವಿನಾಶ್ ಸಾಬ್ಳೆಗೆ 9ನೇ ಸ್ಥಾನ

ಹೊಸದಿಲ್ಲಿ : ಬೆಲ್ಜಿಯಮ್‌ನ ರಾಜಧಾನಿ ಬ್ರಸೆಲ್ಸ್‌ನಲ್ಲಿ ನಡೆಯುತ್ತಿರುವ 2024ರ ಡೈಮಂಡ್ ಲೀಗ್ ಫೈನಲ್‌ನಲ್ಲಿ 3,000 ಮೀ. ಪುರುಷರ ಸ್ಟೀಪಲ್‌ಚೇಸ್‌ನಲ್ಲಿ 8:17.09 ಸೆಕೆಂಡ್‌ನಲ್ಲಿ ಗುರಿ ತಲುಪಿದ ಅವಿನಾಶ್ ಸಾಬ್ಳೆ 9ನೇ ಸ್ಥಾನ ಪಡೆದಿದ್ದಾರೆ.

ಶನಿವಾರ ನಡೆದ ಸ್ಪರ್ಧೆಯಲ್ಲಿ ಕೀನ್ಯದ ಅಮೊಸ್ ಸೆರೆಮ್(8:06.90)ಮೊದಲ ಸ್ಥಾನ ಪಡೆದರೆ, ಮೊರೊಕ್ಕೊದ ಸೂಫಿಯಾನ್ ಅಲ್ ಬಕ್ಕಾಲಿ (8:08.60)ಎರಡನೇ ಸ್ಥಾನ ಪಡೆದರು. ಟ್ಯುನಿಶಿಯದ ಮುಹಮ್ಮದ್ ಅಮಿನ್(8:09.68)ಮೂರನೇ ಸ್ಥಾನ ಪಡೆದರು.

3,000 ಮೀ. ಸ್ಟೀಪಲ್‌ಚೇಸ್‌ನಲ್ಲಿ ರಾಷ್ಟ್ರೀಯ ದಾಖಲೆ ನಿರ್ಮಿಸಿರುವ ಸಾಬ್ಳೆ ಅವರು ಎರಡು ಕ್ರೀಡಾಕೂಟಗಳಲ್ಲಿ ಎರಡು ಅಂಕ ಗಳಿಸಿ ಡೈಮಂಡ್ ಲೀಗ್ ಅಂಕಪಟ್ಟಿಯಲ್ಲಿ 14ನೇ ಸ್ಥಾನ ಪಡೆದಿದ್ದಾರೆ.

ಜುಲೈನಲ್ಲಿ ಪ್ಯಾರಿಸ್‌ನಲ್ಲಿ ನಡೆದಿದ್ದ ಡೈಮಂಡ್ ಲೀಗ್‌ನಲ್ಲಿ 29ರ ಹರೆಯದ ಸಾಬ್ಳೆ 8:09.91 ಸೆಕೆಂಡ್‌ನಲ್ಲಿ ಗುರಿ ತಲುಪಿ ಆರನೇ ಸ್ಥಾನ ಪಡೆದಿದ್ದರು. ಆಗಸ್ಟ್ 25ರಂದು ಸಿಲೇಸಿಯಾದಲ್ಲಿ ನಡೆದ ಡೈಮಂಡ್ ಲೀಗ್‌ನಲ್ಲಿ 8:29.96 ಸೆಕೆಂಡ್‌ನಲ್ಲಿ ಗುರಿ ತಲುಪಿ 14ನೇ ಸ್ಥಾನ ಪಡೆದಿದ್ದರು.

ಇತ್ತೀಚೆಗೆ ಕೊನೆಗೊಂಡಿರುವ ಪ್ಯಾರಿಸ್ ಒಲಿಂಪಿಕ್ಸ್-2024ರಲ್ಲಿ ಸಾಬ್ಳೆ ಪುರುಷರ 3,000 ಮೀ. ಸ್ಟೀಪಲ್‌ಚೇಸ್ ಫೈನಲ್‌ನಲ್ಲಿ 8:14.18 ಸೆಕೆಂಡ್‌ನಲ್ಲಿ ಗುರಿ ತಲುಪಿ 11ನೇ ಸ್ಥಾನ ಪಡೆದಿದ್ದರು.