ಗುಜರಾತ್ ಟೈಟಾನ್ ಆಟಗಾರನಿಗೆ ಬೈಕ್ ಅಪಘಾತದಲ್ಲಿ ಗಾಯ

ಅಹ್ಮದಾಬಾದ್: ಜಾರ್ಖಂಡ್ ನ ಬುಡಕಟ್ಟು ಸಮುದಾಯದಿಂದ ಬಂದಿರುವ ಭರವಸೆಯ ಕ್ರಿಕೆಟಿಗ ರಾಬಿನ್ ಮಿಂಝ್ ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದಾರೆ ಎಂದು ಅವರ ತಂದೆ ರವಿವಾರ ತಿಳಿಸಿದ್ದಾರೆ.

21 ವರ್ಷದ ಕ್ರಿಕೆಟಿಗ ಮಿಂಝ್ ಐಪಿಎಲ್ 2024ರ ಹರಾಜಿನ ವೇಳೆ ಭಾರೀ ಸುದ್ದಿಯಾಗಿದ್ದರು. ಅವರನ್ನು ಗುಜರಾತ್ ಟೈಟಾನ್ಸ್ ತಂಡವು ಬರೋಬ್ಬರಿ 3.60 ಕೋಟಿ ರೂ.ಗೆ ಖರೀದಿಸಿತ್ತು. ದೊಡ್ಡ ಹೊಡೆತಗಳನ್ನು ಹೊಡೆಯಬಲ್ಲ ಸಾಮರ್ಥ್ಯಕ್ಕಾಗಿ ಅವರನ್ನು ಗುರುತಿಸಲಾಗುತ್ತಿದೆ.

ಅವರ ಕವಾಸಕಿ ಸೂಪರ್ ಬೈಕ್ ಇನ್ನೊಂದು ಬೈಕ್ ಗೆ ಢಿಕ್ಕಿಯಾಗಿ ಅಪಘಾತ ಸಂಭವಿಸಿದೆ ಎನ್ನಲಾಗಿದೆ. “ಅವರು ಸವಾರಿ ಮಾಡುತ್ತಿದ್ದ ಬೈಕ್ ಇನ್ನೊಂದು ಬೈಕ್ ಗೆ ಢಿಕ್ಕಿ ಹೊಡೆದಿದೆ. ಗಂಭೀರ ಗಾಯವೇನೂ ಆಗಿಲ್ಲ. ಅವರು ಈಗ ವೈದ್ಯಕೀಯ ನಿಗಾದಲ್ಲಿದ್ದಾರೆ’’ ಎಂದು ಅವರ ತಂದೆ ಫ್ರಾನ್ಸಿಸ್ ಮಿಂಝ್ ಹೇಳಿದ್ದಾರೆ.

ಅಪಘಾತದಿಂದಾಗಿ ಅವರ ಬೈಕಿನ ಮುಂಭಾಗದ ಅರ್ಧ ಭಾಗಕ್ಕೆ ತೀವ್ರ ಹಾನಿಯಾಗಿದೆ. ಆದರೆ, ಅವರ ಬಲ ಮಂಡಿಗೆ ತರಚು ಗಾಯವಾಗಿದೆ.

ಭಾರತ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿಗೆ ತರಬೇತಿ ನೀಡಿರುವ ಕ್ರಿಕೆಟ್ ಕೋಚ್ ಚಂಚಲ್ ಭಟ್ಟಾಚಾರ್ಯ ರಾಬಿನ್ ಮಿಂಝ್ ಅವರಿಗೂ ತರಬೇತಿ ನೀಡುತ್ತಿದ್ದಾರೆ.