ಭಾರತದ ಕುಸ್ತಿಪಟು ಅಮನ್ ಸೆಹ್ರಾವತ್ ಸೆಮಿ ಫೈನಲ್ ಗೆ

ಪ್ಯಾರಿಸ್ : ಪ್ಯಾರಿಸ್ ಒಲಿಂಪಿಕ್ಸ್ ನಲ್ಲಿ ಪುರುಷರ 57 ಕೆಜಿ ಫ್ರೀಸ್ಟೈಲ್ ಸ್ಪರ್ಧೆಯಲ್ಲಿ ಭಾರತದ ಕುಸ್ತಿಪಟು ಅಮನ್ ಸೆಹ್ರಾವತ್ ಸೆಮಿ ಫೈನಲ್ ಗೆ ಲಗ್ಗೆ ಇಟ್ಟಿದ್ದಾರೆ. ಪದಕ ಗೆಲ್ಲುವುದರಿಂದ ಒಂದು ಹೆಜ್ಜೆ ಹಿಂದಿದ್ದಾರೆ.

21ರ ಹರೆಯದ ಅಮನ್ ಅವರು ಸೆಮಿ ಫೈನಲ್ ನಲ್ಲಿ ಜಪಾನ್ ನ ಅಗ್ರ ಶ್ರೇಯಾಂಕದ ರಿ ಹಿಗುಚಿ ಅವರಿಂದ ಕಠಿಣ ಸವಾಲು ಎದುರಿಸಲಿದ್ದಾರೆ.

ಗುರುವಾರ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಅಮನ್ ಅವರು ಅಲ್ಬೇನಿಯಾದ ಮಾಜಿ ವಿಶ್ವ ಚಾಂಪಿಯನ್ ಝೆಲಿಮ್ಖಾನ್ರನ್ನು 12-0 ಅಂತರದಿಂದ ಸುಲಭವಾಗಿ ಮಣಿಸಿದರು.

ಇದಕ್ಕೂ ಮೊದಲು ನಡೆದ ಪ್ರಿ-ಕ್ವಾರ್ಟರ್ ಫೈನಲ್ನಲ್ಲಿ ಅಮನ್ ಅವರು ನಾರ್ತ್ ಮೆಸಿಡೋನಿಯಾದ ವ್ಲಾಡಿಮಿರ್ ಎಗೊರೊವ್ರನ್ನು ತಾಂತ್ರಿಕ ಶ್ರೇಷ್ಠತೆ ಆಧಾರದಲ್ಲಿ 10-0 ಅಂತರದಿಂದ ಮಣಿಸಿದರು. ಈ ಮೂಲಕ ಅಂತಿಮ-8 ಘಟ್ಟ ತಲುಪಿದ್ದಾರೆ.

ಅಮನ್ರ ಆಲ್ರೌಂಡ್ ದಾಳಿಗೆ ತತ್ತರಿಸಿದ ಎಗೊರೊವ್ ಅವರು ವೈದ್ಯರಿಂದ ಉಪಚಾರ ಪಡೆದರು.ಮೊದಲ ಸುತ್ತಿನ ನಂತರ ಸ್ವಲ್ಪ ತೊಂದರೆಗೆ ಒಳಗಾದಂತೆ ಕಂಡುಬಂದರು. ಅಮನ್ ಇನ್ನೂ ಎರಡು ಅಂಕ ಗಳಿಸಿದ ಕಾರಣ ಇಗೊರೊವ್ ಪುಟಿದೇಳಲು ಸಾಧ್ಯವಾಗಲಿಲ್ಲ. ಅಮನ್ ಮಾಜಿ ಯುರೋಪಿಯನ್ ಚಾಂಪಿಯನ್ ಇಗೊರೊವ್ರನ್ನು ಏಕಪಕ್ಷೀಯವಾಗಿ ಮಣಿಸಿದರು.

ಅಮನ್ ಒಲಿಂಪಿಕ್ಸ್ ನಲ್ಲಿ ಭಾರತವನ್ನು ಪ್ರತಿನಿಧಿಸುತ್ತಿರುವ ಏಕೈಕ ಪುರುಷರ ಕುಸ್ತಿಪಟುವಾಗಿದ್ದಾರೆ.