ಇಂಗ್ಲೆಂಡ್‌ನ ಏಕದಿನ, ಟಿ20 ಕೋಚ್ ಆಗಿ ಮೆಕಲಮ್ ಆಯ್ಕೆ
ಬ್ರೆಂಡನ್ ಮೆಕಲಮ್ | PC : PTI
ಲಂಡನ್ : ಹಾಲಿ ಟೆಸ್ಟ್ ಕೋಚ್ ಆಗಿರುವ ಬ್ರೆಂಡನ್ ಮೆಕಲಮ್ ಮುಂದಿನ ವರ್ಷದ ಆರಂಭದಲ್ಲಿ ಏಕದಿನ ಹಾಗೂ ಟಿ20 ತಂಡಗಳ ತರಬೇತುದಾರರಾಗಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ಮಂಗಳವಾರ ಪ್ರಕಟಿಸಿದೆ.
ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ಪ್ರಕಟಿಸಿರುವ ನೂತನ ನಾಯಕತ್ವ ಸ್ವರೂಪದ ಭಾಗವಾಗಿ ಈ ನೇಮಕ ನಡೆದಿದ್ದು, ಮೆಕಲಮ್ ಅವರ ಗುತ್ತಿಗೆಯ ಅವಧಿಯನ್ನು 2027ರ ತನಕ ವಿಸ್ತರಿಸಲಾಗಿದೆ.
ಇಂಗ್ಲೆಂಡ್ ತಂಡ ತನ್ನ ಏಕದಿನ ಹಾಗೂ ಟಿ20 ಪ್ರಶಸ್ತಿಗಳನ್ನು ಉಳಿಸಿಕೊಳ್ಳುವಲ್ಲಿ ವಿಫಲವಾದ ನಂತರ ಸೀಮಿತ ಓವರ್ ಕ್ರಿಕೆಟ್ ತಂಡದ ಕೋಚ್ ಮ್ಯಾಥ್ಯೂ ಮೋಟ್ ಜುಲೈ 30ರಂದು ರಾಜೀನಾಮೆ ನೀಡಿದ್ದರು. 2022ರಲ್ಲಿ ಮೋಟ್ ಮಾರ್ಗದರ್ಶನದಲ್ಲಿ ಇಂಗ್ಲೆಂಡ್ ಟಿ20 ವಿಶ್ವಕಪ್ ಪ್ರಶಸ್ತಿಯನ್ನು ಜಯಿಸಿದ್ದರೂ ಅವರ ಅವಧಿಯಲ್ಲಿ ತಂಡದ ಪ್ರದರ್ಶನವು ನಿರೀಕ್ಷಿತ ಮಟ್ಟದಲ್ಲಿರಲಿಲ್ಲ.
ಮೆಕಲಮ್ ಅವರು ಜನವರಿಯಲ್ಲಿ ಹೆಚ್ಚುವರಿ ಜವಾಬ್ದಾರಿಯನ್ನು ವಹಿಸಿಕೊಳ್ಳಲಿದ್ದಾರೆ. ಇದೇ ಸಮಯದಲ್ಲಿ ಇಂಗ್ಲೆಂಡ್ ತಂಡವು ಭಾರತಕ್ಕೆ ಸೀಮಿತ ಓವರ್ ಕ್ರಿಕೆಟ್ ಸರಣಿಯನ್ನಾಡಲು ತೆರಳಲಿದೆ.
