ಒಂದೇ ಬಾಲ್ ನಲ್ಲಿ 14 ರನ್ ಗಳಿಸಿದ ವಿರಾಟ್ ಕೊಹ್ಲಿ!

ಪುಣೆ: ಪುಣೆಯಲ್ಲಿ ನಡೆಯುತ್ತಿರುವ ಬಾಂಗ್ಲಾದೇಶ ತಂಡದೆದುರಿನ ಪಂದ್ಯದಲ್ಲಿ ಭಾರತದ ತಾರಾ ಬ್ಯಾಟರ್ ವಿರಾಟ್ ಕೊಹ್ಲಿ ಒಂದೇ ಬಾಲ್ ನಲ್ಲಿ 14 ರನ್ ಸಿಡಿಸುವ ಮೂಲಕ ದಾಖಲೆ ನಿರ್ಮಿಸಿದ್ದಾರೆ! ಇದು ನಂಬಲಸಾಧ್ಯವಾದರೂ ಸತ್ಯ!!

13ನೇ ಓವರ್ ನಲ್ಲಿ ಬೌಲರ್ ಹಸನ್ ಮಹಮುದ್ ಅವರ ಅಶಿಸ್ತಿನ ಲಾಭವನ್ನು ವಿರಾಟ್ ಕೊಹ್ಲಿ ಪಡೆದರು. ನಾಯಕ ರೋಹಿತ್ ಶರ್ಮ ಔಟಾದ ನಂತರ ಕ್ರೀಸಿಗೆ ಬಂದ ವಿರಾಟ್ ಕೊಹ್ಲಿ, ತಾವೆದುರಿಸಿದ ಮೊದಲ ಬಾಲ್ ನಲ್ಲೇ ಎರಡು ರನ್ ಗಳಿಸಿದರು. ಆದರೆ, ಆ ಬಾಲ್ ಅನ್ನು ನೋಬಾಲ್ ಎಂದು ಅಂಪೈರ್ ತೀರ್ಪು ನೀಡಿದರು. ಹೀಗಾಗಿ ಬೌಲರ್ ಹಸನ್ ಮಹಮುದ್ ಫ್ರೀ ಹಿಟ್ ಬಾಲ್ ಬೌಲ್ ಮಾಡಿದರು. ವಿರಾಟ್ ಕೊಹ್ಲಿ ಆ ಬಾಲನ್ನು ಮಿಡ್ ಆನ್ ಮೇಲೆ ಬೌಂಡರಿಯ ಗೆರೆ ದಾಟಿಸಿ ಮತ್ತೆ ನಾಲ್ಕು ರನ್ ಅನ್ನು ತಮ್ಮ ಖಾತೆಗೆ ಜಮಾ ಮಾಡಿಕೊಂಡರು.

ದುರದೃಷ್ಟವಶಾತ್, ಆ ಬಾಲ್ ಕೂಡಾ ನೋಬಾಲ್ ಆಗಿತ್ತು. ನಂತರ ಬೌಲರ್ ಹಸನ್ ಮಹಮುದ್ ಎಸೆದ ಮತ್ತೊಂದು ಫ್ರೀ ಹಿಟ್ ಬಾಲನ್ನು ವಿರಾಟ್ ಕೊಹ್ಲಿ ಲಾಂಗ್ ಆನ್ ಮೇಲೆ ಭರ್ಜರಿ ಸಿಕ್ಸರ್ ಸಿಡಿಸಿದರು. ನಂತರದ ಬಾಲ್ ನಲ್ಲಿ ಮತ್ತೆ ಎರಡು ರನ್ ಗಳಿಸುವ ಮೂಲಕ ತಾವೆದುರಿಸಿದ ಕೇವಲ ಒಂದು ಬಾಲ್ ನಲ್ಲಿ ಅವರು 14 ರನ್ ಪೇರಿಸಿದರು ಎಂದು ndtv.com ವರದಿ ಮಾಡಿದೆ.

ಇದಕ್ಕೂ ಮುನ್ನ, ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಬಾಂಗ್ಲಾದೇಶ ತಂಡದ ಮೇಲ್ಪಂಕ್ತಿಯ ಬ್ಯಾಟರ್ ಗಳನ್ನು ಕಟ್ಟಿ ಹಾಕುವ ಮೂಲಕ ಸ್ಪಿನ್ ಬೌಲರ್ ಗಳಾದ ಕುಲದೀಪ್ ಯಾದವ್ ಹಾಗೂ ರವೀಂದ್ರ ಜಡೇಜಾ ಅದರ ಮೊತ್ತವನ್ನು 8 ವಿಕೆಟ್ ನಷ್ಟಕ್ಕೆ 256 ರನ್ ಗಳಿಗೆ ನಿಯಂತ್ರಿಸುವಲ್ಲಿ ಯಶಸ್ವಿಯಾದರು. ರವೀಂದ್ರ ಜಡೇಜಾ 10 ಓವರ್ ಗಳಲ್ಲಿ ಕೇವಲ 38 ರನ್ ನೀಡಿ ಎರಡು ಅತ್ಯಮೂಲ್ಯ ವಿಕೆಟ್ ಗಳನ್ನು ಕಿತ್ತರೆ, ಕುಲದೀಪ್ ಯಾದವ್ ಭಾರತಕ್ಕೆ ಆರಂಭಿಕ ಮೇಲುಗೈ ದೊರಕಿಸಿಕೊಡುವ ಮೂಲಕ 10 ಓವರ್ ಗಳಲ್ಲಿ 47 ರನ್ ನೀಡಿ ಒಂದು ವಿಕೆಟ್ ಕಬಳಿಸಿದರು.