ಬೆಂಗಳೂರು | ನಾಳೆಯಿಂದ ‘ಏರೋ ಇಂಡಿಯಾ’ ವೈಮಾನಿಕ ಪ್ರದರ್ಶನ
ಬೆಂಗಳೂರು : ರಕ್ಷಣಾ ಸಚಿವಾಲಯವು ಆಯೋಜಿಸುವ ‘ಏರೋ ಇಂಡಿಯಾ’ದ 15ನೇ ಆವೃತ್ತಿಯ ಪ್ರದರ್ಶನವು ಇಂದಿನಿಂದ(ಫೆ.10) ನಾಲ್ಕು ದಿನಗಳ ಕಾಲ ಇಲ್ಲಿನ ಯಲಹಂಕ ವಾಯುನೆಲೆಯಲ್ಲಿ ನಡೆಯಲಿದ್ದು, ಏರೋ ಇಂಡಿಯಾ ನವ ಭಾರತದ ಶಕ್ತಿ, ಸ್ಥಿತಿಸ್ಥಾಪಕತ್ವ ಮತ್ತು ಸ್ವಾವಲಂಬನೆಯನ್ನು ಪ್ರದರ್ಶಿಸುವ ವೇದಿಕೆಯಾಗಿದೆ ಎಂದು ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ತಿಳಿಸಿದ್ದಾರೆ.
ರವಿವಾರ ಇಲ್ಲಿನ ಖಾಸಗಿ ಹೋಟೆಲ್‍ನಲ್ಲಿ ಆಯೋಜಿಸಿದ್ದ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ ಅವರು, ‘ದಿ ರನ್‍ವೇ ಟು ಎ ಬಿಲಿಯನ್ ಆಪರ್ಚುನಿಟೀಸ್' ಎಂಬ ತತ್ವದೊಂದಿಗೆ ಈ ಬಾರಿಯ ‘ಏರ್ ಶೋ’ ನಡೆಯಲಿದೆ. ಆತ್ಮನಿರ್ಭರ್ ಭಾರತ್, ಮೇಕ್ ಫಾರ್ ದಿ ವರ್ಲ್ಡ್‌ ದೃಷ್ಟಿಗೆ ಅನುಗುಣವಾಗಿ ಏರೋ ಇಂಡಿಯಾ ವೈಮಾನಿಕ ಪ್ರದರ್ಶನವು ನಡೆಯಲಿದ್ದು, ಅಂತರರಾಷ್ಟ್ರೀಯ ಸಹಯೋಗಗಳನ್ನು ರೂಪಿಸಲು ವೇದಿಕೆಯನ್ನು ಒದಗಿಸುತ್ತದೆ. ಆ ಮೂಲಕ 2047ರ ವೇಳೆಗೆ ದೇಶವನ್ನು ವಿಕಸಿತ್ ಭಾರತವನ್ನಾಗಿ ಮಾಡುವ ಕೇಂದ್ರ ಸರಕಾರದ ಸಂಕಲ್ಪಕ್ಕೆ ಒತ್ತು ನೀಡುತ್ತದೆ ಎಂದು ನುಡಿದರು.
ಏರೋ ಇಂಡಿಯಾ-2025 ಭಾರತದ ರಕ್ಷಣಾ ಸನ್ನದ್ಧತೆಗೆ ಮಾತ್ರ ನಿರ್ಣಾಯಕವಾಗಿಲ್ಲ, ಬದಲಾಗಿ ಇದು ನಮ್ಮ ರಾಷ್ಟ್ರದ ಭವಿಷ್ಯವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ಇದು ನಮ್ಮ ರಕ್ಷಣಾ ಸಾಮರ್ಥ್ಯಗಳನ್ನು ಪ್ರದರ್ಶಿಸುತ್ತದೆ ಹಾಗೂ ಜಾಗತಿಕ ಪಾಲುದಾರಿಕೆಗಳನ್ನು ರೂಪಿಸುತ್ತದೆ. ನಮ್ಮ ಸ್ನೇಹಪರ ರಾಷ್ಟ್ರಗಳೊಂದಿಗೆ ಸಾಮಾನ್ಯ ಆಸಕ್ತಿಯ ಕ್ಷೇತ್ರಗಳಲ್ಲಿ ಸಹಯೋಗವನ್ನು ಹೆಚ್ಚಿಸುವುದು ಎಂದು ಅವರು ತಿಳಿಸಿದರು.
ಈ ಕಾರ್ಯಕ್ರಮವು ಕೇವಲ ತಂತ್ರಜ್ಞಾನ ಮತ್ತು ಆವಿಷ್ಕಾರದ ಪ್ರದರ್ಶನವಲ್ಲ, ಆದರೆ ನಮ್ಮ ಯುವಜನರಿಗೆ ಸ್ಫೂರ್ತಿಯ ಮೂಲವಾಗಿ ಕಾರ್ಯನಿರ್ವಹಿಸುತ್ತದೆ. ವೈಜ್ಞಾನಿಕ ಮನೋಧರ್ಮ ಮತ್ತು ನಾವೀನ್ಯತೆಯ ಮನೋಭಾವವನ್ನು ಬೆಳೆಸುತ್ತದೆ ಎಂದು ಅವರು ಹೇಳಿದರು.
ಲಘು ಯುದ್ಧ ವಿಮಾನ ತೇಜಸ್, ಲಘು ಯುದ್ಧ ಹೆಲಿಕಾಪ್ಟರ್ ಪ್ರಚಂದ್ ಮತ್ತು ಸಿ-295 ಸಾರಿಗೆ ವಿಮಾನಗಳಂತಹ ಸುಧಾರಿತ ವೇದಿಕೆಗಳನ್ನು ಈಗ ಭಾರತದಲ್ಲಿ ಉತ್ಪಾದಿಸಲಾಗುತ್ತಿದೆ. ಐದನೇ ತಲೆಮಾರಿನ ಯುದ್ಧ ವಿಮಾನಗಳನ್ನು ದೇಶದೊಳಗೆ ತಯಾರಿಸುವ ದೃಢ ಸಂಕಲ್ಪವನ್ನೂ ನಾವು ತೆಗೆದುಕೊಂಡಿದ್ದೇವೆ. ಅಗ್ನಿ ಕ್ಷಿಪಣಿ, ಅಸ್ತ್ರ ಕ್ಷಿಪಣಿ ವ್ಯವಸ್ಥೆ ಮತ್ತು ಪಿನಾಕಾ ಕ್ಷಿಪಣಿ ವ್ಯವಸ್ಥೆಗಳ ಸುಧಾರಿತ ರೂಪಾಂತರಗಳಿಂದ ಅತ್ಯಾಧುನಿಕ ಹೈಪರ್ಸಾನಿಕ್ ಕ್ಷಿಪಣಿ ವ್ಯವಸ್ಥೆ ಮತ್ತು ಆಕಾಶ್ ವಾಯು ರಕ್ಷಣಾ ವ್ಯವಸ್ಥೆಯವರೆಗೆ ನಾವು ಹಲವಾರು ಯಶಸ್ಸಿನ ಕಥೆಗಳನ್ನು ನಿರ್ಮಿಸಿದ್ದೇವೆ ಎಂದು ಅವರು ಹೇಳಿದರು.
ಸುದ್ದಿಗೋಷ್ಟಿಯಲ್ಲಿ ರಕ್ಷಣಾ ರಾಜ್ಯ ಮಂತ್ರಿ ಸಂಜಯ್ ಸೇಠ್, ಸೇನಾ ವ್ಯವಹಾರಗಳ ಇಲಾಖೆಯ ಕಾರ್ಯದರ್ಶಿ ಜನರಲ್ ಅನಿಲ್ ಚೌಹಾಣ್, ಸರಕಾರದ ಮುಖ್ಯ ಕಾರ್ಯದರ್ಶಿ ಡಾ.ಶಾಲಿನಿ ರಜನೀಶ್ ಸೇರಿದಂತೆ ರಕ್ಷಣಾ ಸಚಿವಾಲಯದ ಇತರ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
ಈಗಾಗಲೇ ರಕ್ಷಣಾ ಉತ್ಪಾದನೆಯು 1.27 ಲಕ್ಷ ಕೋಟಿ ರೂಪಾಯಿಗಳನ್ನು ದಾಟಿದ್ದು, 2025-26ರ ಅಂತ್ಯದ ವೇಳೆಗೆ 1.60 ಲಕ್ಷ ಕೋಟಿ ರೂಪಾಯಿಗಳನ್ನು ಮೀರಲಿದೆ. ರಕ್ಷಣಾ ರಫ್ತು ದಾಖಲೆಯ 21 ಸಾವಿರ ಕೋಟಿ ರೂ.ಗಳನ್ನು ಮುಟ್ಟಿದ್ದು, ಮುಂದಿನ ವರ್ಷದಲ್ಲಿ 30 ಸಾವಿರ ಕೋಟಿ ರೂ.ಗಳನ್ನು ಮೀರಲಿದೆ.
-ರಾಜನಾಥ್ ಸಿಂಗ್, ಕೇಂದ್ರ ರಕ್ಷಣಾ ಸಚಿವ
ಏರೋ ಇಂಡಿಯಾದ ವೈಶಿಷ್ಟ್ಯಗಳು:
ಫೆ.10ರಂದು ಕೇಂದ್ರ ರಕ್ಷಣಾ ಸಚಿವ ಏರೋ ಇಂಡಿಯಾ ಪ್ರದರ್ಶನವನ್ನು ಉದ್ಘಾಟಿಸಲಿದ್ದಾರೆ.
ಫೆ.10 ರಿಂದ 12ರ ವರೆಗೆ ವ್ಯಾಪಾರದ ದಿನಗಳಾಗಿ ಕಾಯ್ದಿರಿಸಲಾಗಿದೆ.
ಫೆ.13 ಮತ್ತು ಫೆ.14ರಂದು ಜನರು ಪ್ರದರ್ಶನ ವೀಕ್ಷಿಸಬಹುದು.
ಏಷ್ಯಾದ ಅತಿದೊಡ್ಡ ಏರೋಸ್ಪೇಸ್ ಮತ್ತು ರಕ್ಷಣಾ ಪ್ರದರ್ಶನವಾದ ಏರೋ ಇಂಡಿಯಾ-2025 ಒಟ್ಟು 42 ಸಾವಿರ ಚದರ ಮೀಟರ್ ಪ್ರದೇಶದಲ್ಲಿ ನಡೆಯಲಿದೆ. 150 ವಿದೇಶಿ ಕಂಪೆನಿಗಳು ಸೇರಿದಂತೆ 900ಕ್ಕೂ ಹೆಚ್ಚು ಪ್ರದರ್ಶಕರ ಭಾಗವಹಿಸುತ್ತಿದ್ದಾರೆ. ಇಲ್ಲಿಯ ವರೆಗಿನ ಅತಿದೊಡ್ಡ ಏರೋ ಇಂಡಿಯಾ ಇದಾಗಿದೆ.
90ಕ್ಕೂ ಹೆಚ್ಚು ದೇಶಗಳ ಭಾಗವಹಿಸುತ್ತಿದ್ದು, ಇದು ಭಾರತದ ವೈಮಾನಿಕ ಮತ್ತು ರಕ್ಷಣಾ ಸಾಮರ್ಥ್ಯಗಳಲ್ಲಿ ಹೆಚ್ಚುತ್ತಿರುವ ಜಾಗತಿಕ ವಿಶ್ವಾಸಕ್ಕೆ ಸಾಕ್ಷಿಯಾಗಿದೆ. 30 ದೇಶಗಳ ರಕ್ಷಣಾ ಸಚಿವರು, 43 ದೇಶಗಳ ವಾಯು ಮುಖ್ಯಸ್ಥರು ಏರ್ ಇಂಡಿಯಾದಲ್ಲಿ ಉಪಸ್ಥಿತರಿರುತ್ತಾರೆ. ಇದು ರಕ್ಷಣಾ ಮಂತ್ರಿಗಳ ಸಮಾವೇಶವನ್ನು ಒಳಗೊಂಡಿದೆ.
ದ್ವಿಪಕ್ಷೀಯ ಸಭೆಗಳು: ಏರೋ ಇಂಡಿಯಾ 2025ರ ಸಂದರ್ಭದಲ್ಲಿ ವಿವಿಧ ದೇಶಗಳ ರಕ್ಷಣಾ ಸಚಿವ/ ರಕ್ಷಣಾ ರಾಜ್ಯ ಮಂತ್ರಿ/ರಕ್ಷಣಾ ಸಿಬ್ಬಂದಿ/ಸೇವಾ ಮುಖ್ಯಸ್ಥರು/ ರಕ್ಷಣಾ ಕಾರ್ಯದಶಿ /ಕಾರ್ಯದರ್ಶಿ(ರಕ್ಷಣಾ ಉತ್ಪಾದನೆ) ಮಟ್ಟದಲ್ಲಿ ದ್ವಿಪಕ್ಷೀಯ ಸಭೆಗಳು ನಡೆಯುತ್ತವೆ.
ಸೆಮಿನಾರ್‌ಗಳು: ಏರೋ ಇಂಡಿಯಾ 2025ರ ಭಾಗವಾಗಿ ವಿವಿಧ ವಿಷಯಗಳ ಕುರಿತು ಹಲವಾರು ಸೆಮಿನಾರ್‌ ಗಳನ್ನು ಆಯೋಜಿಸಲಾಗಿದೆ. ಫೆ.11ರಂದು ಭಾರತೀಯ ವಾಯುಪಡೆಯು ಆಯೋಜಿಸಿರುವ ಸೆಮಿನಾರ್‌ ಅನ್ನು ಉದ್ದೇಶಿಸಿ ಸಚಿವ ರಾಜನಾಥ್ ಸಿಂಗ್ ಮಾತನಾಡಲಿದ್ದಾರೆ.
ಐದನೇ ತಲೆಮಾರಿನ ಯುದ್ಧ ವಿಮಾನಗಳು ಭಾಗಿ: ಇತಿಹಾಸದಲ್ಲಿ ಮೊದಲ ಬಾರಿಗೆ, ಏರೋ ಇಂಡಿಯಾ-2025 ವಿಶ್ವದ ಎರಡು ಅತ್ಯಾಧುನಿಕ ಐದನೇ ತಲೆಮಾರಿನ ಯುದ್ಧ ವಿಮಾನಗಳಾದ ರಷ್ಯಾದ ಎಸ್‍ಯು-57 ಮತ್ತು ಅಮೇರಿಕನ್ ಎಫ್-35 ಲೈಟ್ನಿಂಗ್-II ಭಾಗವಹಿಸುವಿಕೆಗೆ ಸಾಕ್ಷಿಯಾಗಲಿದೆ. ಇದು ಜಾಗತಿಕ ರಕ್ಷಣಾ ಸಹಯೋಗ ಮತ್ತು ತಾಂತ್ರಿಕ ಪ್ರಗತಿಯಲ್ಲಿ ಒಂದು ಮೈಲಿಗಲ್ಲನ್ನು ನಿರ್ಮಿಸುತ್ತದೆ.
ಭದ್ರತೆ ಮತ್ತು ತುರ್ತು ಸಿದ್ಧತೆ: ಅನಧಿಕೃತ ಡ್ರೋನ್ ಚಟುವಟಿಕೆಯನ್ನು ನಿಭಾಯಿಸಲು ರೆಡ್ ಡ್ರೋನ್ ವಲಯಗಳನ್ನು ನಿರ್ಮಿಸಲಾಗಿದೆ. ತ್ವರಿತ ನೆರವು ಮತ್ತು ತುರ್ತು ಬೆಂಬಲವನ್ನು ಒದಗಿಸಲು ರ್ಯಾಪಿಡ್ ಮೊಬೈಲ್ ಘಟಕಗಳನ್ನು ನಿಯೋಜಿಸಲಾಗಿದೆ.
ಸಂಪರ್ಕ ಮತ್ತು ಡಿಜಿಟಲ್ ಮೂಲಸೌಕರ್ಯ: ಸಂಪರ್ಕ ಸವಾಲುಗಳನ್ನು ಎದುರಿಸಲು, ಎಲ್ಲಾ ಟೆಲಿಕಾಂ ಸೇವಾ ಪೂರೈಕೆದಾರರು ತಡೆರಹಿತ ಸಂವಹನಕ್ಕಾಗಿ ತಾತ್ಕಾಲಿಕ ಮೊಬೈಲ್ ಟವರ್‌ಗಳು ಮತ್ತು ನೆಟ್‍ವರ್ಕ್ ಬೂಸ್ಟರ್‌ಗಳನ್ನು ನಿಯೋಜಿಸಿದ್ದಾರೆ. ಏರೋ ಇಂಡಿಯಾ 2025 ಮೊಬೈಲ್ ಅಪ್ಲಿಕೇಶನ್‍ಅನ್ನು ಬಿಡುಗಡೆ ಮಾಡಲಾಗಿದ್ದು, ಇದು ಲೈವ್ ಅಪ್‍ಡೇಟ್‍ಗಳು, ನ್ಯಾವಿಗೇಷನ್ ನೆರವು ಮತ್ತು ಈವೆಂಟ್ ವೇಳಾಪಟ್ಟಿಯನ್ನು ಒದಗಿಸುತ್ತದೆ.
ವಾಯುಪ್ರದೇಶ ನಿರ್ವಹಣೆ ಮತ್ತು ಪ್ರದರ್ಶನಗಳು: ಏರೋ ಇಂಡಿಯಾ ಪ್ರದರ್ಶನಗಳು ಮತ್ತು ವಿಮಾನ ಚಲನೆಗಳು ಏರೋ ಇಂಡಿಯಾ 2025ರ ಪ್ರಮುಖ ಪ್ರಮುಖ ಅಂಶಗಳಾಗಿವೆ. ಎಎಐ ಮತ್ತು ಎಚ್‍ಎಎಲ್ ಜೊತೆಗಿನ ಸಮನ್ವಯದಲ್ಲಿ, ನಿಗದಿತ ಪ್ರದರ್ಶನಗಳ ಸಮಯದಲ್ಲಿ ಸುರಕ್ಷತೆಯನ್ನು ಕಾಪಾಡಿಕೊಳ್ಳಲು ಯಲಹಂಕ ಏರ್ ಫೋರ್ಸ್ ಸ್ಟೇಷನ್ ಸುತ್ತಮುತ್ತಲೂ ತಾತ್ಕಾಲಿಕವಾಗಿ ವಿಮಾನ ಹಾರಾಟ ನಿರ್ಬಂಧ ಹಾಕಲಾಗಿದೆ.
