ಕುದುರೆಮುಖ ಕಬ್ಬಿಣ ಅದಿರು ಕಂಪೆನಿ ಹಿಡಿತದಲ್ಲಿರುವ ಜಾಗವನ್ನು ಅರಣ್ಯ ಇಲಾಖೆ ವಶಕ್ಕೆ ಪಡೆಯಲು ಆಗ್ರಹ
ಚಿಕ್ಕಮಗಳೂರು, ಸೆ.14: ಕುದುರೆಮುಖ ಕಬ್ಬಿಣ ಅದಿರು ಕಂಪೆನಿಯನ್ನು ಪೂರ್ಣವಾಗಿ ಮುಚ್ಚಿ ಸಂಪೂರ್ಣ ಜಾಗವನ್ನು ಅರಣ್ಯ ಇಲಾಖೆಗೆ ಹಸ್ತಾಂತರಿಸಲು ಸರ್ವೋಚ್ಚ ನ್ಯಾಯಾಲಯ ಆದೇಶಿಸಿ 18 ವರ್ಷಗಳಾದರೂ ಕಂಪೆನಿ ಹಸ್ತಾಂತರಕ್ಕೆ ಮುಂದಾಗುತ್ತಿಲ್ಲ. ಸರಕಾರವೂ ಕಂಪೆನಿಯನ್ನು ಅರಣ್ಯ ಇಲಾಖೆ ಸುಪರ್ದಿಗೆ ಪಡೆದುಕೊಳ್ಳುವ ಯತ್ನವನ್ನೂ ಮಾಡುತ್ತಿಲ್ಲ ಎಂದು ರಾಜ್ಯ ವನ್ಯಜೀವಿ ಮಂಡಳಿ ಮಾಜಿ ಸದಸ್ಯ ಗಿರಿಜಾಶಂಕರ್, ಭದ್ರಾ ವೈಲ್ಡ್‍ಲೈಫ್ ಕನ್ಸರ್ವೇಶನ್ ಟ್ರಸ್ಟ್ ಸಂಚಾಲಕ ಡಿ.ವಿ.ಗಿರೀಶ್, ವೈಲ್ಡ್ ಕ್ಯಾಟ್ ಸಿ ಸಂಸ್ಥೆಯ ಶ್ರೀದೇವ್ ಹುಲಿಕೆರೆ ಆರೋಪಿಸಿದ್ದಾರೆ.
ಈ ಸಂಬಂಧ ಪತ್ರಿಕಾ ಹೇಳಿಕೆ ನೀಡಿರುವ ಅವರು, ಕರಾವಳಿಗೆ ತಡೆಗೋಡೆಯಂತಿರುವ ಕುದುರೆಮುಖ ಬೆಟ್ಟ ಪ್ರದೇಶ ನಿತ್ಯ ಹರಿದ್ವರ್ಣ ಕಾಡುಗಳಿಂದ ಕೂಡಿದೆ. ಮಳೆಗಾಲದಲ್ಲಿ 7000 ಮಿ.ಮೀ. ಮಳೆ ಇಲ್ಲಿ ಸುರಿಯುತ್ತಿದ್ದು, ಈ ಬೆಟ್ಟ ಸಾಲು ತುಂಗಾ, ಭದ್ರಾ, ನೇತ್ರಾವತಿಯಂತಹ ಜೀವನದಿಗಳ ಉಗಮ ಸ್ಥಾನವಾಗಿದೆ. ಪರಿಸರಾಸಕ್ತರ ಹೋರಾಟದ ಫಲವಾಗಿ ಹಾಗೂ ಸರ್ವೋಚ್ಚ ನ್ಯಾಯಾಲಯದಲ್ಲಿ ನಡೆದ ಮೊಕದ್ದಮೆಯ ಹಿನ್ನೆಲೆಯಲ್ಲಿ ಕಬ್ಬಿಣದ ಅದಿರು ಉತ್ಖನನ 2005ರಲ್ಲೇ ಸ್ಥಗಿತಗೊಂಡಿದ್ದು, ನ್ಯಾಯಾಲಯದ ಆದೇಶದಂತೆ ಕಂಪೆನಿ ಪೂರ್ಣ ಜಾಗವನ್ನು ಅರಣ್ಯ ಇಲಾಖೆಗೆ ಹಸ್ತಾಂತರಿಸಬೇಕಿತ್ತು. ಆದರೆ ಈವರೆಗೂ ಈ ಆದೇಶಕ್ಕೆ ಕಂಪೆನಿ ಕಿಮ್ಮತ್ತು ನೀಡಿಲ್ಲ ಎಂದು ತಿಳಿಸಿದ್ದಾರೆ.
ಕುದುರೆಮುಖ ಕಬ್ಬಿಣ ಅದಿರು ಕಂಪೆನಿ ಉತ್ಖನನ ಆರಂಭಿಸಿದ್ದ ವೇಳೆ ಶೇ.27ರಷ್ಟು ಕಬ್ಬಿಣದ ಅದಿರಿನಲ್ಲಿದ್ದ ಮಣ್ಣನ್ನು ಲಕ್ಯಾಹೊಳೆಗೆ ಅಣೆಕಟ್ಟು ಕಟ್ಟಿ ಅಲ್ಲಿ ಸಂಗ್ರಹಿಸಿದ್ದು, ಪ್ರಸಕ್ತ ಈ ಅಣೆಕಟ್ಟೆಯಲ್ಲಿ 150 ದಶಲಕ್ಷ ಟನ್ ಮಣ್ಣು ಸಂಗ್ರಹವಾಗಿದೆ. ಇದರ ಜೊತೆಗೆ ಈ ಅಣೆಕಟ್ಟೆಯಲ್ಲಿ ಇನ್ನೂ ಹೆಚ್ಚಿನ ಮಣ್ಣು ಸಂಗ್ರಹಿಸಲು ಕಂಪೆನಿ ಅಣೆಕಟ್ಟೆಯ ಎತ್ತರವನ್ನು ಮತ್ತಷ್ಟು ಏರಿಸಿದ್ದು, ಈ ಏರಿಕೆಯಿಂದ 750 ಎಕರೆಯಷ್ಟು ರಾಷ್ಟ್ರೀಯ ಉದ್ಯಾನವನಕ್ಕೆ ಸೇರಿದ ಪ್ರದೇಶ ಮುಳುಗಡೆಯಾಗಿದೆ.. ಆಗಲೂ ಸಹ ಸರಕಾರ ಈ ಬಗ್ಗೆ ಯಾವುದೇ ರೀತಿ ಕಾನೂನು ಕ್ರಮ ಕೈಗೊಳ್ಳಲಿಲ್ಲ ಎಂದು ಆರೋಪಿಸಿದ್ದಾರೆ.
ಪರಿಷ್ಕರಿಸಿದ ಅದಿರನ್ನು ಮಂಗಳೂರು ಬಂದರಿಗೆ ಸಾಗಿಸಲು 103 ಕಿ.ಮೀ. ಪೈಪ್‍ಲೈನ್ ಅಳವಡಿಸಿದ್ದು, ಇದು ಅರಣ್ಯದೊಳಗೆ ಸಾಗಿದೆ. ಈ ರೀತಿ ಅರಣ್ಯೇತರ ಬಳಕೆಗೆ ಕಂಪೆನಿ ಸೂಕ್ತ ಅನುಮತಿಯನ್ನು ಪಡೆಯದಿರುವುದು ಹಾಗೂ ಸತತವಾಗಿ ವಿದ್ಯುತ್ ಪಡೆಯಲು ಎಕ್ಸ್‍ಪ್ರೆಸ್ ವಿದ್ಯುತ್ ಮಾರ್ಗವನ್ನು ಅರಣ್ಯದೊಳಗೆ ಹಾಕಲಾಗಿತ್ತು. ಈ ಎಲ್ಲಾ ಅವಾಂತರಗಳನ್ನು ಪರಿಗಣಿಸಿ ಪರಿಸರದ ಮೇಲಾಗುವ ಪರಿಣಾಮವನ್ನು ಅವಲೋಕಿಸಿ ಪರಿಸರಾಸಕ್ತರು ನ್ಯಾಯಾಲಯದ ಮೊರೆ ಹೊಕ್ಕಾಗ ಅದಿರು ಉತ್ಖನನಕ್ಕೆ ನ್ಯಾಯಾಲಯ ತಡೆ ಒಡ್ಡಿದೆ.
ಅದಿರು ಉತ್ಖನನದಿಂದ ಹೊರ ಬಂದ ಹೂಳು ಲಕ್ಯಾ ಅಣೆಕಟ್ಟೆಗೆ ಸೇರಿ ಅಲ್ಲಿಂದ ಭದ್ರಾ ನದಿಗೆ ಈ ಹೂಳು ಸೇರಿ ಭದ್ರಾ ನದಿಗೂ ಅಪಾಯಕ್ಕೆ ಎದುರಾಗಿತ್ತು. ಕಂಪೆನಿ ಆರಂಭವಾದಾಗ ಬಹಳಷ್ಟು ಮಂದಿಗೆ ಉದ್ಯೋಗ ಒದಗಿಸುವ ಭರವಸೆ ಸಹ ಗಗನಕುಸುಮವಾಗಿದ್ದು, ಕಂಪೆನಿಯಲ್ಲಿ ಮೇಲ್ಮಟ್ಟದಲ್ಲಿ ಕೆಲಸ ಮಾಡುವ ಉದ್ಯೋಗಿಗಳಿಗೆ ಕಂಪೆನಿ ಸ್ಥಗಿತಗೊಂಡ ನಂತರ ಸಾಕಷ್ಟು ನಿವೃತ್ತಿ ಸೌಲಭ್ಯಗಳು ದೊರೆತರೇ, ಕೆಳ ಮಟ್ಟದಲ್ಲಿ ಕೆಲಸ ಮಾಡುತ್ತಿದ್ದವರಿಗೆ ಹೆಚ್ಚಿನ ಲಾಭವೇನೂ ಆಗಲಿಲ್ಲ. ಈಗಲೂ ಸಹ ಅಂದಾಜು 130 ಮಂದಿ ಕಾರ್ಮಿಕರು ಯಾವುದೇ ರೀತಿ ಪರಿಹಾರ ಅಥವಾ ಸೌಲಭ್ಯ ಪಡೆಯದೆ ಅತಂತ್ರರಾಗಿದ್ದಾರೆ. ಸದ್ಯ ಈ ಕಾರ್ಮಿಕರು ಅಧಿಸೂಚಿತ ಪ್ರದೇಶದಲ್ಲೇ ವನವಾಸದಲ್ಲಿದ್ದಾರೆ. ಸರಕಾರ ಕೂಡಲೇ ಕಂಪೆನಿ ಹಿಡಿದಿಟ್ಟುಕೊಂಡಿರುವ ಜಾಗವನ್ನು ಅರಣ್ಯ ಇಲಾಖೆಗೆ ಒಪ್ಪಿಸಿ ಹಾಗೂ ಉತ್ಖನನದ ಸಮಯದಲ್ಲಿ ಆಗಿರುವ ಪರಿಸರದ ಹಾನಿಗೆ ಕಡ್ಡಾಯವಾಗಿ ನೀಡಬೇಕಾದ ದಂಢವನ್ನು ಪಾವತಿಸಲು ಸೂಚಿಸಿ ಕ್ರಮ ಕೈಗೊಳ್ಳಬೇಕು. ಅಲ್ಲಿರುವ ಕಟ್ಟಡಗಳನ್ನು ನೆಲಸಮ ಮಾಡಿ ಪೂರ್ಣ ಪ್ರದೇಶವನ್ನು ಉತ್ಖನನಕ್ಕೆ ಮುನ್ನ ಇದ್ದಂತೆಯೇ ಮೂಲ ಸ್ವರೂಪಕ್ಕೆ ಮರಳಿ ತರಲು ಕ್ರಮ ಕೈಗೊಳ್ಳಬೇಕೆಂದು ಅವರು ಆಗ್ರಹಿಸಿದ್ದಾರೆ.
