ಕಾಪು: ಕೈಪುಂಜಾಲು ದರ್ಗಾ ವಾರ್ಷಿಕ ಸಫರ್ ಝಿಯಾರತ್

ಕಾಪು: ಪೊಲಿಪು ಜಾಮಿಯಾ ಮಸೀದಿಯ ಅಧೀನದಲ್ಲಿರುವ ಸರ್ವಧರ್ಮೀಯರ ಭಕ್ತಿಯ ಕೇಂದ್ರವಾಗಿರುವ ಕೈಪುಂಜಾಲು ಸಮುದ್ರ ಕಿನಾರೆ ಬಳಿಯ ಸಯ್ಯಿದ್ ಅರಬೀ ವಲಿಯುಲ್ಲಾರವರ ದರ್ಗಾದ ವಾರ್ಷಿಕ ಸಫರ್ ಝಿಯಾರತ್ ಸಮಾರಂಭವು ಸೆ.4ರಂದು ಸಂಪನ್ನಗೊಂಡಿತು.

ಪ್ರತೀ ವರ್ಷ ಇಸ್ಲಾಮಿಕ್ ಕ್ಯಾಲೆಂಡರ್‌ನ ಸಫರ್ ತಿಂಗಳ ಕೊನೆಯ ಬುಧವಾರ ಸಫರ್ ಝಿಯಾರತ್ ನಡೆಯುವ ವಾರ್ಷಿಕ ಝಿಯಾರತ್ ಸಮಾರಂಭದಲ್ಲಿ ಜಿಲ್ಲೆಯ ಹಾಗೂ ಹೊರಜಿಲ್ಲೆಯ ಸಹಸ್ರಾರು ಮಂದಿ ಭಾಗವಹಿಸಿ ಹರಕೆಯನ್ನು ಸಲಿಸಿದರು.

ಕಾಪು ಶಾಸಕ ಗುರ್ಮೆ ಸುರೇಶ್ ಶೆಟ್ಟಿ ಸಹಿತ ವಿವಿಧ ಗಣ್ಯರು ಪಾಲ್ಗೊಂಡರು. ಪೊಲಿಪು ಜಾಮಿಯಾ ಮಸ್ಜಿದ್‌ನ ಆಡಳಿತ ಮಂಡಳಿ ಪದಾಧಿಕಾರಿಗಳು, ಸಫರ್ ಝಿಯಾರತ್ ಆಯೋಜನಾ ಸಮಿತಿ ಪ್ರಮುಖರು, ಸಮಾಜ ಭಾಂದವರು ಉಪಸ್ಥಿತರಿದ್ದರು.