ಹೊಸಪೇಟೆ: ಮಾಜಿ ನಗರ ಸಭೆ ಸದಸ್ಯ ಟಿ. ಚಿದಾನಂದ ಹೃದಯಾಘಾತದಿಂದ ನಿಧನ

ವಿಜಯನಗರ: ಸತತವಾಗಿ ಐದು ಬಾರಿ ನಗರಸಭೆ ಸದಸ್ಯರಾಗಿ ದಾಖಲೆ ನಿರ್ಮಿಸಿದ್ದ ಟಿ.ಚಿದಾನಂದ (72) ಅವರು ಹೃದಯಾಘಾತದಿಂದ ರವಿವಾರ ಬೆಳಿಗ್ಗೆ ನಿಧನರಾಗಿದ್ದಾರೆ.

25 ವರ್ಷಗಳಿಂದ ಸಮಾಜ ಸೇವೆಯಲ್ಲಿ ತೊಡಗಿದ್ದ ಟಿ.ಚಿದಾನಂದ ಅವರು ಹೊಸಪೇಟೆ ತಾಲೂಕಿನ 32ನೇ ವಾರ್ಡ್ ಚಪ್ಪರದಳ್ಳಿ ಏರಿಯಾದಲ್ಲಿ 3 ಬಾರಿ ಕಾಂಗ್ರೆಸ್ ಮತ್ತು ಪಕ್ಷೇತರ ಅಭ್ಯರ್ಥಿಯಾಗಿ 2 ಬಾರಿ ಜಯಗಳಿಸಿದ್ದರು.

ಇಂದು ಬೆಳಗಿನ ಜಾವ ವಾಕಿಂಗ್ ಹೋದ ಚಿದಾನಂದ ಅವರಿಗೆ ಎದೆ ನೋವು ಅನುಭವವಾಗಿತ್ತು. ತಕ್ಷಣವೇ ಪಕ್ಕದ ಸಾರ್ವಜನಿಕ ಆಸ್ಪತ್ರೆಗೆ ತೆರಳುತ್ತಿರುವ ಮಧ್ಯೆ ತಮ್ಮ ಕ್ಷೇಮ ವಿಚಾರಿಸಿದ ಪರಿಚಯಸ್ಥ ವ್ಯಕ್ತಿಯೊಂದಿಗೆ, " ಎದೆ ನೋವು ಅನುಭವವಾಗುತ್ತಿದೆ. ಚಿಕಿತ್ಸೆಗೆಂದು ಹೋಗುತ್ತಿದ್ದೇನೆ ಎಂದು ಹೇಳಿ ಆಸ್ಪತ್ರೆಯ ಒಳಗಡೆ ತೆರಳಿದ್ದಾರೆ. ಆದರೆ ಸಕಾಲದಲ್ಲಿ ಸೂಕ್ತ ವೈದ್ಯರ ಚಿಕಿತ್ಸೆ ಲಭಿಸದೇ ಅವರು ಮೃತಪಟ್ಟಿದ್ದಾರೆ ಎಂದು ಚಿದಾನಂದ ಅವರ ಆಪ್ತರ ಮೂಲಗಳಿಂದ ತಿಳಿದು ಬಂದಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಕರ್ತವ್ಯ ನಿರತ ವೈದ್ಯರು, ತೀವ್ರ ಹೃದಯಘಾತದಿಂದ ಚಿಕಿತ್ಸೆ ಫಲಕಾರಿಯಾಗದೆ ನಿಧನರಾಗಿರುತ್ತಾರೆ ಎಂದು ಪತ್ರಿಕೆಗೆ ತಿಳಿಸಿದ್ದಾರೆ.