ಚಂದ್ರಯಾನ, ಇತರ ಚಂದ್ರ ಅಭಿಯಾನಗಳ ಬಗ್ಗೆ ನಿಮಗೆ ಗೊತ್ತಿಲ್ಲದ ಐದು ವಿಷಯಗಳು ಇಲ್ಲಿವೆ…

ಹೊಸದಿಲ್ಲಿ: ಚಂದ್ರಯಾನ-3 ಅಭಿಯಾನವು ಭಾರತದ ಬಾಹ್ಯಾಕಾಶ ಕಾರ್ಯಕ್ರಮ ಮತ್ತು ಸಾರ್ವತ್ರಿಕವಾಗಿ ಚಂದ್ರ ಅಭಿಯಾನಗಳ ಕುರಿತು ಬಹಳಷ್ಟು ಚರ್ಚೆಯನ್ನು ಹುಟ್ಟು ಹಾಕಿದೆ. ನಿಮಗೆ ಗೊತ್ತಿಲ್ಲದಿರಬಹುದಾದ ಕೆಲವು ವಿಷಯಗಳು ಇಲ್ಲಿವೆ.....

► ಚಂದ್ರಯಾನ-1 ಚಂದ್ರನ ಮೇಲೆ ತನ್ನ ಕುರುಹು ಬಿಡುವುದನ್ನು ಖಚಿತಪಡಿಸಿದ್ದು ಡಾ.ಕಲಾಂ

2008ರಲ್ಲಿ ಭಾರತದ ಮೊದಲ ಚಂದ್ರ ಅಭಿಯಾನ ಚಂದ್ರಯಾನ-1 ಕೇವಲ ಒಂದು ಆರ್ಬಿಟರ್ ಅಥವಾ ಕಕ್ಷೆಗಾಮಿಯಾಗಿತ್ತು. ಬಿಡಿಭಾಗಗಳು ಜೋಡಣೆಗೊಳ್ಳುತ್ತಿದ್ದಾಗ ರಾಷ್ಟ್ರಪತಿ ಎಪಿಜೆ ಅಬ್ದುಲ್ ಕಲಾಂ ಅವರು ಇಸ್ರೋ ಕಚೇರಿಗೆ ಭೇಟಿ ನೀಡಿದ್ದರು. ಇಸ್ರೋದ ಮಾಜಿ ಅಧ್ಯಕ್ಷ ಜಿ.ಮಾಧವನ್ ನಾಯರ್ ಅವರ ಪ್ರಕಾರ, ಚಂದ್ರಯಾನ-1 ಚಂದ್ರನ ಬಳಿಗೆ ತೆರಳಿತ್ತು ಎನ್ನುವುದನ್ನು ತೋರಿಸಲು ಯಾವ ಸಾಕ್ಷ್ಯಾಧಾರವಿರಲಿದೆ ಎಂದು ಕಲಾಂ ವಿಜ್ಞಾನಿಗಳನ್ನು ಪ್ರಶ್ನಿಸಿದ್ದರು.

ಅದು ಚಂದ್ರನ ಮೇಲ್ಮೈನ ಚಿತ್ರಗಳನ್ನು ಹೊಂದಿರಲಿದೆ ಎಂದು ವಿಜ್ಞಾನಿಗಳು ತಿಳಿಸಿದಾಗ ಅದಷ್ಟೇ ಸಾಕಾಗುವುದಿಲ್ಲ ಎಂದು ಕಲಾಂ ಪ್ರತಿಕ್ರಿಯಿಸಿದ್ದರು. ಚಂದ್ರನ ಮೇಲೆ ಬೀಳಿಸಬಹುದಾದ ಸಾಧನವೊಂದನ್ನು ಚಂದ್ರಯಾನ-1 ಒಯ್ಯಬೇಕು ಎಂದು ಅವರು ಸೂಚಿಸಿದ್ದರು.

ಕಲಾಂ ಸಲಹೆಯನ್ನು ಸ್ವೀಕರಿಸಿದ ಇಸ್ರೋ ನೂತನ ಸಾಧನಕ್ಕೆ ಸ್ಥಳಾವಕಾಶ ಕಲ್ಪಿಸಲು ವಿನ್ಯಾಸ ಬದಲಾವಣೆಗಳನ್ನು ಮಾಡಿತ್ತು. ಈ ಮೂನ್ ಇಂಪ್ಯಾಕ್ಟ್ ಪ್ರೋಬ್ ಚಂದ್ರನ ಮೈಲ್ಮೈಯನ್ನು ಅಪ್ಪಳಿಸಿತ್ತು ಮತ್ತು ಚಂದ್ರನ ಮೇಲಿನ ಮೊದಲ ಭಾರತೀಯ ವಸ್ತುವಾಯಿತು.

► ಚಂದ್ರಯಾನ-2 ಲ್ಯಾಂಡರ್ ರಶ್ಯಾದಿಂದ ಬರಬೇಕಿತ್ತು

ರಶ್ಯಾದ ಲೂನಾ-25 ಗಗನಗೌಕೆ ಶನಿವಾರ ಚಂದ್ರನ ಮೇಲ್ಮೈ ಮೇಲೆ ಪತನಗೊಂಡಿದೆ. ಇದೇ ಲ್ಯಾಂಡರ್ ನ ಹಿಂದಿನ ಆವೃತ್ತಿಯು ಭಾರತದ ಚಂದ್ರಯಾನ-2 ಗಗನನೌಕೆಯಲ್ಲಿ ಹೋಗಬೇಕಿತ್ತು, ಆದರೆ ಅದು ಸಂಭವಿಸಿರಲಿಲ್ಲ.

ಲ್ಯಾಂಡರ್ ಮತ್ತು ರೋವರ್ ಹೊಂದಿದ್ದ ಚಂದ್ರಯಾನ-2 ಅನ್ನು 2011-12ರಲ್ಲಿ ಕೈಗೊಳ್ಳಲು ಮೊದಲು ಯೋಜಿಸಲಾಗಿತ್ತು. ಆ ಸಮಯದಲ್ಲಿ ಭಾರತವು ತನ್ನದೇ ಆದ ಲ್ಯಾಂಡರ್ ಮತ್ತು ರೋವರ್ ಅನ್ನು ಅಭಿವೃದ್ಧಿಗೊಳಿಸಿರಲಿಲ್ಲ. ಮೂಲ ಚಂದ್ರಯಾನ-2 ಗಗನನೌಕೆಯು ರಶ್ಯಾದೊಂದಿಗಿನ ಜಂಟಿ ಅಭಿಯಾನವಾಗಬೇಕಿತ್ತು. ಭಾರತವು ರಾಕೆಟ್ ಮತ್ತು ಆರ್ಬಿಟರ್ ಒದಗಿಸಬೇಕಿತ್ತು ಹಾಗೂ ಲ್ಯಾಂಡರ್ ಮತ್ತು ರೋವರ್ ರಶ್ಯಾದಿಂದ ಬರಬೇಕಿದ್ದವು.

ಚಂದ್ರಯಾನ-2ಕ್ಕಾಗಿ ರಶ್ಯಾ ಅಭಿವೃದ್ಧಿಗೊಳಿಸುತ್ತಿದ್ದ ಲ್ಯಾಂಡರ್ ಮತ್ತು ರೋವರ್ ಮಾದರಿಯು ಭಿನ್ನ ಕಾರ್ಯಾಚರಣೆಯಲ್ಲಿ ಸಮಸ್ಯೆಗಳನ್ನು ತೋರಿಸಿತ್ತು ಮತ್ತು ಇದು ರಶ್ಯಾದ ಬಾಹ್ಯಾಕಾಶ ಸಂಸ್ಥೆ ರಾಸ್ಕಾಸ್ಮಾಸ್ ವಿನ್ಯಾಸ ಬದಲಾವಣೆಗಳನ್ನು ಮಾಡುವುದನ್ನು ಅನಿವಾರ್ಯವಾಗಿಸಿತ್ತು. ಆದರೆ ನೂತನ ವಿನ್ಯಾಸವು ದೊಡ್ಡ ಗಾತ್ರದ್ದಾಗಿದ್ದು,ಭಾರತೀಯ ರಾಕೆಟ್ ನಲ್ಲಿ ಅಳವಡಿಸಲು ಸಾಧ್ಯವಿರಲಿಲ್ಲ.

ರಶ್ಯಾ ಅಂತಿಮವಾಗಿ ಈ ಸಹಭಾಗಿತ್ವದಿಂದ ಹಿಂದೆ ಸರಿದಿತ್ತು ಹಾಗೂ ಲ್ಯಾಂಡರ್ ಮತ್ತು ರೋವರ್ ಅನ್ನು ಸ್ಥಳೀಯವಾಗಿ ಅಭಿವೃದ್ಧಿಗೊಳಿಸಲು ಇಸ್ರೋ ಮುಂದಾಗಿತ್ತು. ಇದಕ್ಕೆ ಸಮಯಾವಕಾಶ ಅಗತ್ಯವಾಗಿತ್ತು,ಹೀಗಾಗಿ 2019ರಲ್ಲಷ್ಟೇ ಚಂದ್ರಯಾನ-2ರ ಉಡಾವಣೆ ಸಾಧ್ಯವಾಗಿತ್ತು.

► ಭಾರತದ ಮುಂದಿನ ಚಂದ್ರ ಅಭಿಯಾನ ಚಂದ್ರಯಾನ ಆಗಿರುವುದಿಲ್ಲ

ಚಂದ್ರ ಅಭಿಯಾನಗಳ ಸಂಪೂರ್ಣ ಸರಣಿಯನ್ನು ಯೋಜಿಸಿರುವ ಕೆಲವು ರಾಷ್ಟ್ರಗಳಿಗಿಂತ ಭಿನ್ನವಾಗಿ ಭಾರತವು ಈವರೆಗೂ ಚಂದ್ರಯಾನ-3ರ ಅನುಸರಣಾ ಅಭಿಯಾನಗಳನ್ನು ಪ್ರಕಟಿಸಿಲ್ಲ. ನಿಸ್ಸಂಶಯವಾಗಿ ಚಂದ್ರಯಾನ-4,5,6 ಅಥವಾ ಹೆಚ್ಚು ಇರಲಿವೆಯಾದರೂ ಇವುಗಳಿಗೂ ಮುನ್ನ ಭಾರತವು ಜಪಾನ್ ಸಹಭಾಗಿತ್ವದೊಂದಿಗೆ ಇನ್ನೊಂದು ಚಂದ್ರ ಅಭಿಯಾನವನ್ನು ಕೈಗೊಳ್ಳಲಿದೆ. ಅದನ್ನು ‘ಲುಪೆಕ್ಸ್’ ಎಂದು ಕರೆಯಲಾಗುವುದು. ಇದು 2024-25ರ ವೇಳೆಗೆ ಉಡಾವಣೆಗೊಳ್ಳುವ ಸಾಧ್ಯತೆಯಿದೆ.

► ಉಕ್ರೇನ್ ಯುದ್ಧದಿಂದಾಗಿ ಯುರೋಪ್ ರಶ್ಯಾದ ಲೂನಾ-25ರಿಂದ ಹಿಂದೆ ಸರಿದಿತ್ತು

ಲೂನಾ-25ಕ್ಕೆ ಮಾತ್ರವಲ್ಲ,ಈ ದಶಕದ ಉತ್ತರಾರ್ಧದಲ್ಲಿ ಯೋಜಿಸಲಾಗಿರುವ ಲೂನಾ-26 ಮತ್ತು ಲೂನಾ-27 ಅಭಿಯಾನಗಳಿಗೂ ಐರೋಪ್ಯ ಬಾಹ್ಯಾಕಾಶ ಸಂಸ್ಥೆ (ಇಎಸ್ಎ)ಯು ರಶ್ಯಾದ ರಾಸ್ಕಾಸ್ಮಾಸ್ನ ಪ್ರಮುಖ ಪಾಲುದಾರನಾಗಿತ್ತು. ಇಎಸ್ಎ ಲೂನಾ-25ರಲ್ಲಿ ನ್ಯಾವಿಗೇಷನ್ ಕ್ಯಾಮೆರಾ ಮತ್ತು ಆಪ್ಟಿಕಲ್ ನ್ಯಾವಿಗೇಷನ್ ಸಿಸ್ಟಮ್ ಅನ್ನು ಸ್ಥಾಪಿಸಲಿತ್ತು. ಲೂನಾ-26 ಮತ್ತು ಲೂನಾ-27ರಲ್ಲಿ ಹೆಚ್ಚಿನ ರೋಬೋಟ್ ಉಪಕರಣಗಳ ಅಳವಡಿಕೆಯನ್ನು ಅದು ಯೋಜಿಸಿತ್ತು. ರಶ್ಯಾದ ಮಂಗಳ ಅಭಿಯಾನಕ್ಕಾಗಿಯೂ ಇದೇ ರೀತಿಯ ಸಹಕಾರವನ್ನು ಇಎಸ್ಎ ನೀಡಲಿತ್ತು.

ಆದರೆ ಕಳೆದ ವರ್ಷ ರಶ್ಯಾಪಡೆಗಳಿಂದ ಉಕ್ರೇನ್ ಆಕ್ರಮಣದ ಬಳಿಕ ಎಪ್ರಿಲ್ನಲ್ಲಿ ಈ ಎಲ್ಲ ಸಹಯೋಗವನ್ನು ಇಎಸ್ಎ ಸ್ಥಗಿತಗೊಳಿಸಿತ್ತು. ಈ ಕಾರ್ಯಾಚರಣೆಗಳ ಮೂಲಕ ಯುರೋಪ್ ಹೊಂದಿದ್ದ ವೈಜ್ಞಾನಿಕ ಮತ್ತು ತಾಂತ್ರಿಕ ಗುರಿಗಳನ್ನು ಈಗ ನಾಸಾದ ಸಹಭಾಗಿತ್ವದೊಂದಿಗೆ ಸಾಧಿಸಲಾಗುತ್ತಿದೆ.

► ಜಪಾನ್, ಇಸ್ರೇಲ್ ಲ್ಯಾಂಡಿಂಗ್ ಪ್ರಯತ್ನಗಳು ಖಾಸಗಿಯಾಗಿದ್ದವು

ಕಳೆದ ದಶಕದಲ್ಲಿ ಚೀನಾ, ಇಸ್ರೇಲ್, ಭಾರತ, ಜಪಾನ್ ಮತ್ತು ಚೀನಾ ಈ ಐದು ದೇಶಗಳು ಚಂದ್ರನ ಮೇಲೆ ಇಳಿಯಲು ಪ್ರಯತ್ನಿಸಿದ್ದು, ಈ ಪೈಕಿ ಚೀನಾ ಮಾತ್ರ ಯಶಸ್ವಿಯಾಗಿತ್ತು. ಇಸ್ರೇಲ್ ಮತ್ತು ಜಪಾನಿನ ಚಂದ್ರ ಅಭಿಯಾನಗಳಾದ ಬೆರೆಶೀಟ್ ಮತ್ತು ಹಕುಟೊ-ಆರ್ ಅನ್ನು ಖಾಸಗಿ ಕಂಪನಿಗಳನ್ನು ಕೈಗೊಂಡಿದ್ದವು. ಇವು ಈವರೆಗೆ ಚಂದ್ರನ ಮೇಲಿಳಿಯಲು ಖಾಸಗಿ ಬಾಹ್ಯಾಕಾಶ ಸಂಸ್ಥೆಗಳ ಏಕೈಕ ಪ್ರಯತ್ನಗಳಾಗಿ ಉಳಿದುಕೊಂಡಿವೆ.

ಈ ತಿಂಗಳ ಅಂತ್ಯದಲ್ಲಿ ತನ್ನ ಮೊದಲ ಮೂನ್ ಲ್ಯಾಂಡಿಂಗ್ ಅಭಿಯಾನಕ್ಕಾಗಿ ಜಪಾನಿನ ಬಾಹ್ಯಾಕಾಶ ಸಂಸ್ಥೆ ಜೆಎಎಕ್ಸ್ಎ ಸಜ್ಜಾಗುತ್ತಿದೆ. ಅದನ್ನು ‘ಸ್ಲಿಮ್’ ಅಥವಾ ಸ್ಮಾರ್ಟ್ ಲ್ಯಾಂಡರ್ ಫಾರ್ ಇನ್ವೆಸ್ಟಿಗೇಟಿಂಗ್ ಮೂನ್ ಎಂದು ಹೆಸರಿಸಲಾಗಿದೆ.

ಕೃಪೆ : The Indian Express