ಸಿಂಡಿಕೇಟ್ ಬ್ಯಾಂಕ್‌ಗೆ 251 ಕೋಟಿ ನಿವ್ವಳ ಲಾಭ !

ಬೆಂಗಳೂರು, ನ.4: ಸಿಂಡಿಕೇಟ್ ಬ್ಯಾಂಕ್ 2019-20 ನೆ ಸಾಲಿನ ಆರ್ಥಿಕ ವರ್ಷದ ಎರಡನೆ ತ್ರೈಮಾಸಿಕದಲ್ಲಿ 251 ಕೋಟಿ ನಿವ್ವಳ ಲಾಭಗಳಿಸಿದ್ದು, 2019ರ ಸೆಪ್ಟೆಂಬರ್ ಅಂತ್ಯಕ್ಕೆ ಆಪರೇಟಿಂಗ್ ಲಾಭ ಶೇ.68ಕ್ಕೆ ಏರಿಕೆಯಾಗಿದೆ.

ಹಿಂದಿನ ವರ್ಷಕ್ಕೆ ಹೋಲಿಸಿದರೆ ಇದು ಅಧಿಕವಿದ್ದು, ಕಳೆದ ವರ್ಷ 570 ಕೋಟಿ ಇತ್ತು. ಈ ವರ್ಷ ಅದು 956 ಕೋಟಿ ರೂ.ಇದೆ. ಇತರೆ ಆದಾಯ ಶೇ.52 ಹೆಚ್ಚಳವಾಗಿದೆ. ಕಳೆದ ವರ್ಷ 490 ಕೋಟಿ ಇದ್ದದ್ದು, ಈ ವರ್ಷ 746 ಕೋಟಿಗೆ ತಲುಪಿದೆ.

ನಿವ್ವಳ ಬಡ್ಡಿ ಆದಾಯ(ಎನ್‌ಐಐ) ಶೇ.11 ಹೆಚ್ಚಳವಾಗಿದೆ. ಕಳೆದ ವರ್ಷ 1, 572 ಕೋಟಿ ರೂ.ಗಳಿತ್ತು. ಈ ವರ್ಷ 1, 739 ಕೋಟಿ ರೂ.ಗೆ ಏರಿಕೆಯಾಗಿದೆ. ಒಟ್ಟಾರೆ ವೆಚ್ಚ ಮತ್ತು ಆದಾಯದ ಸರಾಸರಿನುಪಾತ ಶೇ.72.25ಕ್ಕೆ ಇಳಿದಿದೆ. ಕಳೆದ ವರ್ಷ ಜಾಗತಿಕ ವ್ಯವಹಾರ 4,75,225 ಕೋಟಿ ರೂ. ಇದ್ದದ್ದು, ಈ ವರ್ಷ 4,81,081 ಕೋಟಿ ರೂ. ಕಂಡಿದೆ.

ರಿಟೇಲ್, ಕೃಷಿ, ಎಂಎಸ್‌ಎಂಇ ಕ್ಷೇತ್ರಕ್ಕೆ ಬ್ಯಾಂಕ್ ಅಧಿಕ ಆದ್ಯತೆ ಮೇರೆಗೆ ಸಾಲ ನೀಡಲಾಗುತ್ತಿದೆ. ಒಟ್ಟಾರೆ ಬ್ಯಾಂಕ್ ಠೇವಣಿ 2,59,443 ಕೋಟಿ ಇದೆ. ಇದು ಕಳೆದ ವರ್ಷ 2,68,222 ಕೋಟಿ ರೂ.ಇತ್ತು.

ಪ್ರಗತಿ ಕಡೆಗೆ: ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಹೆಚ್ಚಿನ ಪ್ರಗತಿ ಸಾಧಿಸಿದ್ದೇವೆ. ವ್ಯವಹಾರ ವೃದ್ಧಿ ಕಡೆಗೆ ಮತ್ತಷ್ಟು ಗಮನ ಹರಿಸುತ್ತೇವೆ. ರಿಟೇಲ್ ಷೇರು, ಐಟಿ ಸಂಬಂಧಿಸಿದ ಸೇವೆಗಳ ಠೇವಣಿ ಹೆಚ್ಚಳ ಹಾಗೂ ಎನ್‌ಪಿಎ ಮರು ವಸೂಲಿ ಮಾಡಲಿದ್ದೇವೆ ಎಂದು ಸಿಂಡಿಕೇಟ್ ಬ್ಯಾಂಕ್‌ನ ವ್ಯವಸ್ಥಾಪಕ ನಿರ್ದೇಶಕ ಮೃತ್ಯುಂಜಯ ಮಹಾಪಾತ್ರ ಹೇಳಿದ್ದಾರೆ.