ದಾಖಲೆ ಇಲ್ಲದ ಮದ್ಯ ಸಾಗಾಟ: ಚೆಕ್‌ಪೋಸ್ಟ್‌ನಲ್ಲಿ ವಶ

ಮಲ್ಪೆ: ಸರಿಯಾದ ದಾಖಲೆಗಳಿಲ್ಲದೆ ಕಾರಿನಲ್ಲಿ ಸಾಗಾಟ ಮಾಡುತ್ತಿದ್ದ ಮದ್ಯವನ್ನು ಪೊಲೀಸರು ಎ.16ರಂದು ರಾತ್ರಿ ಮೂಡುತೋನ್ಸೆ ಗ್ರಾಮದ ಹಂಪನಕಟ್ಟೆ ಚೆಕ್‌ಪೋಸ್ಟ್ ವಶಪಡಿಸಿಕೊಳ್ಳಲಾಗಿದೆ.

ಕಲ್ಯಾಣಪುರದ ಗಿರಿಧರ ಬಾಳಿಗ ಎಂಬವರು ಕೆಮ್ಮಣ್ಣುವಿನಿಂದ ನೇಜಾರಿನ ಕಡೆಗೆ ಚಲಾಯಿಸಿಕೊಂಡು ಬರುತ್ತಿದ್ದ ಕಾರನ್ನು ಪೊಲೀಸರು ತಪಾಸಣೆ ನಡೆಸಿದಾಗ ಕಾರಿನ ಹಿಂಬದಿ ಸೀಟಿನಲ್ಲಿ ಮದ್ಯದ ಬಾಟಲಿ ಪತ್ತೆಯಾಗಿದೆ. ಇದಕ್ಕೆ ಸರಿಯಾದ ದಾಖಲೆಗಳು ಇಲ್ಲದ ಕಾರಣ ಒಟ್ಟು 13280 ರೂ. ಮೌಲ್ಯದ ಮದ್ಯ ಮತ್ತು 3 ಲಕ್ಷ ರೂ. ಮೌಲ್ಯದ ಕಾರನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಬಗ್ಗೆ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.