ಯಶವಂತಪುರ- ಮುರ್ಡೇಶ್ವರ ಸಾಪ್ತಾಹಿಕ ರೈಲಿನ ಸಂಚಾರ ಒಂದು ತಿಂಗಳು ವಿಸ್ತರಣೆ

ಉಡುಪಿ, ಜೂ.27: ಈ ತಿಂಗಳ ಬಳಿಕ ಸಂಚಾರ ನಿಲ್ಲಿಸುವ ಸಾಧ್ಯತೆ ಇದ್ದ ರೈಲು ನಂ.06563/06564 ಯಶವಂತಪುರ- ಮುರ್ಡೇಶ್ವರ- ಯಶವಂತಪುರ ಸಾಪ್ತಾಹಿಕ ವಿಶೇಷ ಎಕ್ಸ್‌ಪ್ರೆಸ್ ರೈಲಿನ ಸಂಚಾರವನ್ನು ಇನ್ನೂ ಒಂದು ತಿಂಗಳಿಗೆ ವಿಸ್ತರಿಸಲು ಕೊಂಕಣ ರೈಲ್ವೆ ನಿಗಮ ನಿರ್ಧರಿಸಿದೆ.

ರೈಲ್ವೆ ಪ್ರಯಾಣಿಕರ ಆಕ್ರೋಶ ಹಾಗೂ ಬೇಡಿಕೆಯ ನಡುವೆ ಈ ಸಾಪ್ತಾಹಿಕ ರೈಲಿನ ಸಂಚಾರವನ್ನು ನೈಋತ್ಯ ರೈಲ್ವೆಯ ಸಹಯೋಗದೊಂದಿಗೆ ಅದೇ ಸಮಯ, ನಿಲುಗಡೆ, ಬೋಗಿಗಳ ಸಂಖ್ಯೆಗಳೊಂದಿಗೆ ಜುಲೈ ತಿಂಗಳುದ್ದಕ್ಕೂ ಓಡಿಸಲು ನಿರ್ಧರಿಸಲಾಗಿದೆ.

ರೈಲು ನಂ. 06563 ಯಶವಂತಪುರ-ಮುರ್ಡೇಶ್ವರ ಸಾಪ್ತಾಹಿಕ ರೈಲು ಜು.1, 8, 15, 22 ಹಾಗೂ 29ರಂದು ಪ್ರತಿ ಶನಿವಾರ ಯಶವಂತಪುರದಿಂದ ತೆರಳಲಿದೆ. ಅದೇ ರೀತಿ ರೈಲು ನಂ. 06564 ಮುರ್ಡೇಶ್ವರ ಸಾಪ್ತಾಹಿಕ ರೈಲು ಜು.2, 8, 16, 23 ಹಾಗೂ 30ರಂದು ಪ್ರತಿ ರವಿವಾರ ಮುರ್ಡೇಶ್ವರದಿಂದ ಸಂಚಾರ ನಡೆಸಲಿದೆ ಎಂದು ಕೊಂಕಣ ರೈಲ್ವೆ ಪ್ರಕಟಣೆ ತಿಳಿಸಿದೆ.